Bꞌabꞌel macan̈ slolonel vin̈aj Salomón
10
A juntzan̈ slolonel vin̈aj Salomón: A ebꞌ uninabꞌil ay spensar, syacꞌ tzalajbꞌoc scꞌool smam snun ebꞌ. Axo ebꞌ malaj spensar, syacꞌ cus scꞌol smam snun ebꞌ chiꞌ.2 Tato squicꞌ co bꞌeyumal dꞌa chucal, malaj scacꞌ yalaꞌ. Tato tojol co bꞌeybꞌal, tzon̈ colchajel yuj dꞌa yol scꞌabꞌ chamel.
3 A Jehová malaj bꞌaj ol scha cham ebꞌ vachꞌ sbꞌeybꞌal yuj vejel, palta axo ebꞌ chuc jun, max chajilaj yacꞌ sgana ebꞌ yuuj.
4 Tato malaj co gana tzon̈ munlaji, scot mebꞌail dꞌa quibꞌan̈. Tato tzon̈ munlaj sicꞌlabꞌil jun, tzon̈ och bꞌeyumal.
5 Tato ay co spensar, sco molbꞌejcan sat tas scavej dꞌa stiempoal. Tato ton̈ej tzon̈ vay dꞌa stiempoal smolchaj sat avbꞌen chiꞌ jun, scacꞌ qꞌuixvelal co bꞌa.
6 A ebꞌ anima vachꞌ spensar, man̈ jantacoc svachꞌcꞌolal Dios scha ebꞌ. Axo ebꞌ chuc jun, a yuj chucal scꞌulej ebꞌ, scotcan yaelal dꞌa yibꞌan̈ ebꞌ.
7 A ebꞌ vachꞌ spensar, dꞌa vachꞌilal ol aj snajicot ebꞌ. Axo pax ebꞌ chuc jun, man̈xa mach ol naancot ebꞌ.
8 Tato ay co pensar, ol co cꞌanabꞌajej tas schecji co cꞌulej. Palta tato ton̈ej tzon̈ comon lolon jun, ol on̈ satel yuuj.
9 Tato vachꞌ co bꞌeybꞌal, malaj bꞌaj ol on̈ xivoc. Tato a chucal sco cꞌulej jun, ol on̈ yamchajelta.
10 A ebꞌ stzꞌeptzꞌepan sat snaan junoc chucal, scotcan nivac yaelal yuj ebꞌ. Yujto ste comon lolon ebꞌ, yuj chiꞌ ol satel ebꞌ.
11 A slolonel ebꞌ vachꞌ spensar, a ol acꞌan vachꞌilal dꞌa scal ebꞌ anima. Axo ebꞌ chuc jun, a yuj chucal scꞌulej ebꞌ, ol cotcan yaelal dꞌa yibꞌan̈ ebꞌ.
12 Tato ay co chichoncꞌolal, a oval sqꞌue vaan cuuj. Palta tato sco xajanej ebꞌ quetanimail, scacꞌn̈ej nivancꞌolal ebꞌ.
13 Tato ay co pensar, scheclajel co jelanil dꞌa tas scalaꞌ. Tato malaj co pensar jun, tzon̈ macꞌjin̈ej dꞌa teꞌ jixcꞌabꞌ teꞌ.
14 Tato jelan co pensar, sco yaꞌilej tas scalaꞌ. Palta tato malaj co pensar jun, tzon̈ te loloni, an̈ej chucal sqꞌue vaan yuj tas scal chiꞌ.
15 A ebꞌ bꞌeyum, a sbꞌeyumal ebꞌ scolani. Axo pax ebꞌ mebꞌaꞌ jun, malaj tas syal scolan ebꞌ.
16 A co qꞌuinal sco cha spacoc co vachꞌ bꞌeybꞌal. Palta tato chuc scutej co bꞌa jun, a yaelal sco cha spacoc.
17 Tato sco cha cabꞌ co cachnabꞌil, snajatbꞌi co qꞌuinal. Tato max co cha cabꞌ jun, quenn̈ej tiempo squilaꞌ.
18 A ebꞌ elcꞌaltac schichon scꞌol dꞌa junocxo anima, esalvum ebꞌ. A ebꞌ an̈ej aloj pecal tzecꞌ yalaꞌ, malaj jabꞌoc spensar ebꞌ.
19 Tato tzon̈ te comon loloni, tzꞌoch co mul dꞌa scal tas scal chiꞌ. Tato max on̈ lolon jun, ay co pensar syal chiꞌ.
20 A slolonel ebꞌ vachꞌ spensar, te nivan yelcꞌoch icha qꞌuen plata te vachꞌ. Axo pax spensar ebꞌ chuc jun, malaj jabꞌoc yelcꞌochi.
21 A slolonel ebꞌ vachꞌ spensar, man̈ jantacoc ebꞌ scꞌaybꞌaj yuuj. Axo ebꞌ malaj spensar jun, scham ebꞌ yuj sman̈ pensaril chiꞌ.
22 A yuj svachꞌcꞌolal Jehová, tzon̈ och bꞌeyumal, man̈ yujoc bꞌaj tzon̈ te munlaji.
23 A ebꞌ malaj spensar, ste qꞌuechaan̈ ebꞌ ayic scꞌulan chucal ebꞌ. Axo ebꞌ ay spensar jun, syacꞌ tzalajbꞌoc scꞌool ebꞌ yuj sjelanil.
24 A tastac bꞌaj xiv ebꞌ chuc, a sjavi dꞌa yibꞌan̈ ebꞌ. Axo ebꞌ vachꞌ spensar jun, tzꞌelcꞌoch tas snibꞌej ebꞌ.
25 A ebꞌ chuc sbꞌeybꞌal, quenn̈ej tiempo tzꞌecꞌ ebꞌ icha junoc chacxuxum icꞌ. Axo pax ebꞌ vachꞌ spensar jun, ayn̈ejecꞌ ebꞌ dꞌa juneln̈ej.
26 Tato sco chec junoc jaragana, scabꞌ syail yuuj, ecꞌto dꞌa spajil yal nocꞌ vinagre dꞌa qꞌuen que, ecꞌto icha syail sbꞌat te tabꞌ dꞌa yol co sat.
27 Tato ay yelcꞌoch Jehová dꞌayon̈, snajatbꞌi co qꞌuinal. Palta tato chuc sco cꞌulej jun, stzap co qꞌuinal.
28 A tas sjavi dꞌa yichan̈ ebꞌ vachꞌ spensar, aton tzalajcꞌolal. Axo tas ayoch yipoc scꞌol ebꞌ chuc jun, max elcꞌochlaj.
29 A Jehová stan̈van ebꞌ vachꞌ sbꞌeybꞌal. Axo ebꞌ scꞌulan chucal jun, ol satjoquel ebꞌ yuuj.
30 A ebꞌ vachꞌ spensar tecꞌann̈ej yajecꞌ ebꞌ. Axo ebꞌ chuc spensar, man̈ nivanoc tiempo tzꞌecꞌ ebꞌ dꞌa yolyibꞌan̈qꞌuinal tic.
31 A ebꞌ vachꞌ spensar, an̈ej jelanil syal ebꞌ. Axo ebꞌ chuc slolon jun, maxtzac chajilaj lolon ebꞌ, ichato spolchajel yacꞌ ebꞌ.
32 A ebꞌ vachꞌ spensar, tzon̈ tzalaj yuj tas syal ebꞌ. Axo pax ebꞌ chuc spensar jun, an̈ej chucal lolonel syal ebꞌ.