Max schalaj sbꞌa jelanil yedꞌ man̈ pensaril
9
A ix vilani, ichato ay jun ix ix, ix sbꞌoqꞌue spat, te vachꞌ ix aj yilji, uqueꞌ val yoyal ix yaqꞌuem ix.2 Ix smilcham nocꞌ nocꞌ ix, ix sbꞌoan jun nivan vael ix, ix sbꞌoan vino ix te vachꞌ, ix sbꞌoanbꞌat ix dꞌa sat smexa.
3 Ix lajvi chiꞌ, ix schecanbꞌat ebꞌ schecabꞌ ix dꞌa juntzan̈ tzalquixtac ay dꞌa yol chon̈abꞌ.
4 Axo ebꞌ schecabꞌ ix chiꞌ ix alan icha tic: Ex quelemtac mantalaj e jelanil, cotan̈ec. Ex malaj e pensar, cotan̈ec.
5 Ol ex vaoc, ol eyucꞌan vino to vachꞌxo yaji.
6 Actejeccan e man̈ pensaril chiꞌ yic vachꞌ tzalajcꞌolal ol ex ajoc. Bꞌeybꞌalejec sbꞌeybꞌal ebꞌ te jelan spensar, xchi ebꞌ schecabꞌ ix chiꞌ. A jun ix ix chiꞌ, a jelanil schꞌoxoꞌ.
7 Tato tzal dꞌa ebꞌ bꞌuchumtac to chuc scꞌulej ebꞌ, an̈ej lolonel man̈ vachꞌoc ol yal ebꞌ dꞌayach. Tato tzal dꞌa ebꞌ chuc to man̈ vachꞌoc syutej sbꞌa ebꞌ, ton̈ej ol ach sbꞌaj ebꞌ.
8 Tato tza cach ebꞌ anima acꞌumtac, ol och ebꞌ ajcꞌolal dꞌayach. Tato tzal dꞌa ebꞌ ay spensar bꞌajtil tzꞌoch spaltail ebꞌ, ol ach xajanej ebꞌ.
9 Cꞌaybꞌej ebꞌ jelan yic vachꞌ ol te jelanbꞌoc ebꞌ. Cꞌaybꞌej ebꞌ anima vachꞌ spensar yic vachꞌ ol ste ojtaquejel ebꞌ.
10 Tato sco nibꞌej jelan tzon̈ aji, ayocabꞌ yelcꞌoch Jehová dꞌa co sat. Tato scojtaquejel Dios to Axon̈ej Ochi, tzꞌacan co pensar sicꞌlabꞌil syal chiꞌ.
11 A yuj jelanil chiꞌ, ol najatbꞌoc co qꞌuinal, te tzijtum abꞌil ol quilaꞌ.
12 Tato ay co jelanil, quicn̈ej yaj vachꞌilal. Tato bꞌuchumtac scutej co bꞌa jun, munil dꞌa quibꞌan̈ ol cotcan yaelal.
13 A junoc ix ix malaj spensar, man̈ jantacoc slolon ix, max qꞌuixvilaj jabꞌoc ix, malaj pax jabꞌoc tas snachajel yuj ix.
14 Ton̈ej tzꞌem cꞌojan ix dꞌa yol xila, dꞌa stiꞌ spat chaan̈ yajqꞌue dꞌa tzalan dꞌa yol chon̈abꞌ,
15 syavtancot ebꞌ tojoln̈ej tzꞌecꞌ dꞌa yol bꞌe chiꞌ ix, syalan ix icha tic:
16 Ex quelemtac mantalaj e jelanil, cotan̈ec, xchi ix. Syalanpax ix dꞌa ebꞌ malaj spensar:
17 A a aꞌ tzꞌelcꞌaji, te vachꞌ yucꞌji aꞌ. A jabꞌoc vael sco va dꞌa elcꞌaltac te vachꞌ,* xchi ix.
18 Axo ebꞌ vin̈ quelemtac chiꞌ, man̈ yojtacoc ebꞌ vin̈ tato a ebꞌ vin̈ yavtejnaccot ix, chamnacxo ebꞌ vin̈ ticnaic.