Vachꞌ lolonel dꞌa jelanil
8
Ex quelemtac abꞌec, yujto tzex avtaji yic tzeyicꞌ e jelanil, yic sqꞌuibꞌ pax e pensar.2 Yaln̈ej bꞌaj ayex eqꞌui, dꞌa junoc tzalan, ma dꞌa yol bꞌe, ma bꞌaj schalaj sbꞌa bꞌe, tzex avtaji.
3 An̈ejtonaꞌ dꞌa spuertail e chon̈abꞌ, tzex avtajpaxi.
4 E masanil ex anima ayex dꞌa yolyibꞌan̈qꞌuinal tic, abꞌec.
5 Ex quelemtac to mantalaj e pensar, cꞌaybꞌejec e bꞌa dꞌa jelanil. Ex chuc e pensar, sayec jelan pensaril.
6 Abꞌec val sicꞌlabꞌil, ol alchaj juntzan̈ tastac nivac yelcꞌoch dꞌayex, man̈xo jantacoc svachꞌil.
7 Te yel tas ol alchaj dꞌayex, malaj tas ton̈ej ol nachajqꞌueoc.
8 Masanil juntzan̈ lolonel tic vachꞌn̈ej, malaj jabꞌoc es dꞌay.
9 A ebꞌ jelan, secojtac tzꞌaj snachajel juntzan̈ lolonel tic yuj ebꞌ. A ebꞌ ay spensar yojtac ebꞌ tas syalelcꞌochi.
10 Aqꞌuec eyip eyicꞌan e jelanil yedꞌ aj pensaril, yujto yelxo val te nivan yelcꞌoch dꞌa yichan̈ qꞌuen oro yedꞌ qꞌuen plata.
11 Yelxo val te vachꞌ jelanil dꞌa yichan̈ qꞌuen qꞌueen te vachꞌ yilji yedꞌ dꞌa yichan̈ junoc tas snibꞌaj val ochi.
12 A jelanil, yetbꞌeyum sbꞌa yedꞌ vachꞌ pensaril. Syacꞌ cojtaquejel juntzan̈ vachꞌ razonal.
13 Tato ay yelcꞌoch Jehová dꞌayon̈, sco chaccanel chucal. Tato jelan on̈, max yal-laj quicꞌanchaan̈ co bꞌa. Max co nibꞌejochlaj chuc bꞌeybꞌal yedꞌ es.
14 Tato ay co jelanil, syal co naan junoc tas sco cꞌulej dꞌa stojolal, tzꞌeln̈ejpaxcꞌochi.
15 A yuj jelanil syacꞌ yajalil ebꞌ rey, tojol syutej ebꞌ schꞌolbꞌitan tastac yaj ebꞌ yetanimail.
16 Yuj jelanil chiꞌ, a ebꞌ ayoch yajalil, vachꞌ syutej ebꞌ stan̈van schon̈abꞌ, vachꞌ pax syutej ebꞌ sbꞌoan yaj yoval ebꞌ anima.
17 A mach sayanecꞌ jelanil yedꞌ smasanil scꞌool, tzꞌilchaj yuuj.
18 Yuj jelanil chiꞌ, tzꞌaj co bꞌeyumal, tzon̈ bꞌinaj yuuj, ay pax quelcꞌochi.
19 A tas tzꞌilchaj yuj jelanil chiꞌ, yelxo te vachꞌ dꞌa yichan̈ qꞌuen oro yedꞌ qꞌuen plata sicꞌbꞌileli.
20 Yuj jelanil, sco bꞌeybꞌalej vachꞌilal yedꞌ tojolal.
21 A mach snibꞌan jelanil, ol yicꞌ sbꞌeyumal yuuj. Ol bꞌudꞌjoc spat yuj masanil tastac vachꞌ.
22 A jelanil chiꞌ, aytaxoneqꞌui ayic ix el yich smunlajel Jehová, ayic manto sbꞌo masanil tastac,
23 ayic manto sbꞌo yolyibꞌan̈qꞌuinal tic,
24 ayic mantalaj aꞌ nivac mar, mantalaj pax sjaj aꞌ nivac aꞌ sqꞌueuli yedꞌ pax sjaj aꞌ cotac aꞌ.
25 Ayic manto sbꞌolaj lum tzalquixtac yedꞌ lum nivac vitz, ayxoecꞌ jelanil chiꞌ taꞌ.
26 Ix yicꞌcanel yich jelanil Jehová ayic manto sbꞌolaj lum luum tic, mantalaj spococal jun yolyibꞌan̈qꞌuinal tic taꞌ.
27 Ayic ix sbꞌoanqꞌue satchaan̈ masanto bꞌaj schalaj sbꞌa yedꞌ aꞌ mar, aytaxon ecꞌ jelanil chiꞌ taꞌ.
28 Ayic ix sbꞌoan asun ay dꞌa satchaan̈ yedꞌ pax yic ix syamanoch vaan aꞌ mar,
29 ayic ix yalan dꞌa aꞌ mar chiꞌ to man̈ ol el aꞌ bꞌaj aycani yedꞌ pax ix yacꞌanem yich lum luum tic, aytaxon ecꞌ jelanil chiꞌ taꞌ.
30 A yuj sjelanil Dios ix sbꞌoqꞌue masanil tastac, ste tzalaj yuj tastac ix sbꞌo chiꞌ, yujto aꞌ schꞌoxanel sjelanil.
31 Stzalaj yuj yolyibꞌan̈qꞌuinal yedꞌ ebꞌ anima sbꞌonac.
32 Axo ticnaic ex anima, abꞌec val tas tzꞌalchaj dꞌayex, bꞌeybꞌalejec jelanil yic te vachꞌ eyicoꞌ.
33 Chaec eyabꞌ e cꞌaybꞌubꞌal, man̈ e patiquejel jelanil.
34 Te vachꞌ yic mach scham val yabꞌan lolonel yic jelanil,
35 yujto a mach tzꞌilchaj jelanil chiꞌ yuuj, tzꞌilchajpax sqꞌuinal, syicꞌanpax svachꞌcꞌolal Jehová.
36 Palta a mach max chaan yabꞌ lolonel yic jelanil, munil syicꞌcot yaelal dꞌa yibꞌan̈.