Cachnabꞌil yuj smon ix ajmul ix
7
Ach vuninal, cha abꞌ in lolonel tic. A juntzan̈ in checnabꞌil svacꞌ tic dꞌayach, yovalil tza sicꞌcan dꞌa a pensar.2 Cꞌanabꞌajej in checnabꞌil tic yedꞌ in cꞌaybꞌubꞌal yic vachꞌ ol ach ecꞌoc. Icha scutej co yaꞌilan snenal yol co sat, icha chiꞌ tzutej a yaꞌilan a cachnabꞌil svacꞌ tic.
3 Naann̈ejocabꞌ uuj, tza sicꞌancan dꞌa a pensar.
4 Xajanej a jelanil yujto icha anabꞌ yaji, ma icha a vachꞌcꞌool.
5 Icha chiꞌ ol aj a colchajel dꞌa yol scꞌabꞌ ix ajmul ix, aton ix ayxo yetbꞌeyum, ix te vachꞌ smontan yedꞌ slolonel.
6 Ay junel ix vilelta dꞌa sventenail in pat,
7 ay juntzan̈ ebꞌ vin̈ quelemtac malaj jabꞌoc sjelanil ayeqꞌui. Axo ix vilani, ay jun vin̈ malaj jabꞌoc spensar dꞌa scal ebꞌ vin̈ chiꞌ.
8-9 Ayic vanxo yem cꞌu, vanxo sqꞌuicꞌbꞌi, ix eqꞌuixcꞌoch vin̈ dꞌa jun esquina, ix scꞌaxpitanecꞌ calle vin̈, dꞌa stojolal bꞌaj ay spat jun ix ix ay yetbꞌeyum.
10 Ix elta lemnaj ix scha vin̈. Icha spichul ebꞌ ix ajmul ix spichul ix ayochi, icha pax spensar ebꞌ ix chiꞌ spensar ix.
11 Comonn̈ej slolon ix, max qꞌuixvilaj jabꞌoc ix, max emlaj cꞌojan ix dꞌa spat.
12 An̈ej dꞌa yoltac calle tzꞌecꞌ ix, dꞌa mercado yedꞌ dꞌa yesquinailtac calle, ataꞌ smaclej ix yecꞌ junoc vinac.
13 A jun ix chiꞌ, ix och lacꞌnaj ix dꞌa vin̈ quelem chiꞌ, ix och tzꞌubꞌnaj ix dꞌa stiꞌ vin̈, maj qꞌuixvoclaj jabꞌoc ix, ix yalan ix icha tic:
14 A ticnaic ix vacꞌ in silabꞌ yic in juncꞌolal albꞌilxo vuuj, yuj chiꞌ ayto nocꞌ chibꞌej dꞌa in pat ticnaic.
15 Yuj chiꞌ ix in elta ach in maclej, yujto in gana tzach vilaꞌ. Tic ach ilchaj vuuj.
16 A dꞌa sat in chꞌat toxo ix in lichꞌem jun sábana nabꞌa lino, cotnac dꞌa Egipto.
17 Toxo ix vacꞌoch perfume dꞌay, toxon̈ej sucꞌuqꞌui sjabꞌ, aton mirra, áloes yedꞌ teꞌ canela.
18 Cotan̈ vedꞌoc, ol cacꞌ val co gana masanto ol sacbꞌoc. Ol cacꞌ val tzalajbꞌoc co cꞌool co xajanan co bꞌa.
19 A vin̈ vetbꞌeyum, malaj vin̈ ayecꞌ dꞌa in pat tic, yujto ay bꞌaj te najat ix bꞌat vin̈.
20 Ix yicꞌbꞌat jun mucuc qꞌuen tumin vin̈, yuj chiꞌ manto ol jalaj vin̈ masanto ol cꞌoch scꞌual scꞌojnaj qꞌuen uj, xchi ix ix chiꞌ.
21 A tas te vachꞌ ix yal ix chiꞌ, elan̈chamel ix montaj vin̈ quelem chiꞌ yuuj.
22 Yuj chiꞌ ix och tzacꞌan vin̈ yuj ix, icha yicꞌjibꞌat junoc nocꞌ vacax bꞌaj ol chamoc, ma icha junoc nocꞌ cꞌultaquil chej scan dꞌa chꞌan̈ yaal,
23 masanto ol ecꞌ junoc jul-labꞌ dꞌa spixan nocꞌ. Icha pax junoc nocꞌ much scan dꞌa teꞌ yaal, icha chiꞌ yaj vin̈, max snalaj jabꞌoc vin̈ tato a dꞌa spat ix chiꞌ ol cham vin̈.
24 Yuj chiꞌ ach vuninal, maclej abꞌ tas svalaꞌ. Tan̈vej val abꞌ in lolonel tic.
25 Man̈ a juel a vachꞌ bꞌeybꞌal dꞌa junoc ix ix icha chiꞌ spensar, yic vachꞌ man̈ ol ach sateloc.
26 Yujto tzijtumxo mach toxo ix cham yuj ebꞌ ix ix icha chiꞌ scꞌulej. Man̈xo bꞌischajbꞌenoc mach scham yuj ebꞌ ix.
27 Tato tzach bꞌat dꞌa sbꞌeal spat ebꞌ ix ix icha chiꞌ, van a bꞌatcan dꞌa sbꞌeal chamel.