Ay smay cacꞌanoch co bꞌa fiadoral
6
Ach vuninal, tato tzacꞌoch a bꞌa a majnan qꞌuen tumin yuj junoc chꞌoc animail dꞌa junoc etchon̈abꞌ,2 van acꞌanem a yaalil, ol cotcan dꞌa ibꞌan̈ yuj bꞌaj ix acꞌoch a bꞌa chiꞌ.
3 Ach vuninal, icha tic tzutej a colanel a bꞌa dꞌa yol scꞌabꞌ vin̈ aj tumin chiꞌ. Ixic, emnaquil tzutej a bꞌa tzach tevi dꞌa vin̈, tza cꞌanan nivancꞌolal a bꞌa dꞌa vin̈ yic max ach yacꞌ pural vin̈ a tupanel sbꞌoc vin̈ bꞌaj ix acꞌoch a bꞌa chiꞌ.
4 Smoj val maxtzac ach vay yuuj, mocxobꞌ icꞌ ip junoc rato
5 masanto tzach el dꞌa yalan̈, icha val yel junoc nocꞌ cꞌultaquil chej dꞌa junoc mach pechjinac, ma icha yel junoc nocꞌ much dꞌa junoc yaal.
A cꞌaybꞌubꞌal dꞌa ebꞌ max munlaji
6 Ach anima malaj a gana a munlaji, ilnabꞌ nocꞌ chꞌequem, sicꞌlabꞌil tzilaꞌ tas syutej nocꞌ smunlaji yic tzꞌilchaj svael nocꞌ, scham val a cꞌaybꞌan dꞌa nocꞌ.
7 Vachꞌchom malaj mach schecan munlaj nocꞌ, malaj yajal nocꞌ tzꞌalan yabꞌ tas scꞌulej,
8 palta ayic stiempoan svael nocꞌ, syacꞌ val yip nocꞌ smunlaji yic smolancan svael nocꞌ chiꞌ.
9 Ach anima malaj a gana a munlaji, cꞌocbꞌilxo chiꞌ tzach vayi. Cꞌocbꞌilxo chiꞌ tzach ecꞌ jichan.
10 Yacbꞌan scot numumoc a vayan̈, snecnecan a jolom, jeljumbꞌa tzꞌaj a cꞌabꞌ, te vachꞌ tzꞌaj a vayi,
11 axo tzꞌaji, scot mebꞌail dꞌa ibꞌan̈, ste bꞌat dꞌa ibꞌan̈ icha junoc vin̈ elcꞌum edꞌjinac junoc qꞌuen cuchilubꞌ.
A sbꞌeybꞌal ebꞌ chuc
12 A ebꞌ chuc spensar, an̈ej es tzecꞌ yal ebꞌ dꞌa scal ebꞌ anima.
13 Smutzꞌmutzꞌan sat ebꞌ yacꞌan yechel, schꞌoxanpax ebꞌ yedꞌ yiximal scꞌabꞌ.
14 Juneln̈ej te chuc spensar ebꞌ, axon̈ej malaj svachꞌil sna scꞌulej ebꞌ. A bꞌaj tzꞌecꞌ ebꞌ, an̈ej oval sqꞌuecan vaan yuj ebꞌ.
15 Yuj chiꞌ elan̈chamel ol ja yaelal dꞌa yibꞌan̈ ebꞌ. Junn̈ej mutzꞌsatil ol aj slajviem ebꞌ, man̈xa tas ol yal yuj ebꞌ.
A tastac chacbꞌilel yuj Jehová
16-19 Ay uqueꞌ tas chacbꞌilel yuj Jehová dꞌa juneln̈ej: Aton icꞌojchan̈bꞌail, esalvumal, macꞌojcham anima malaj smul, naojchaan̈ tas malaj svachꞌil, chucal scꞌulaji, acꞌojoch es dꞌa yibꞌan̈ junocxo mach yedꞌ icꞌojchaan̈ oval dꞌa scal anima.
A syaelal ajmulal
20 Ach vuninal, sicꞌcan juntzan̈ in cꞌaybꞌubꞌal tic dꞌa a pensar yedꞌ a cꞌaybꞌubꞌal syacꞌ ix a nun.
21 Sicꞌcan dꞌa a pensar, naann̈ejocabꞌ uuj dꞌa masanil tiempo.
22 A ol ach cuchbꞌan bꞌaj ol ach ecꞌoc, man̈ ol ach xivoc ayic ol ach vayoc. Ayic ol el a vayan̈, an̈ejaꞌ juntzan̈ tic naan uuj.
23 Dꞌa val yel a a cachnabꞌil yedꞌ a cꞌaybꞌubꞌal tic, icha sacqꞌuinal yaj dꞌayach. A a cachnabꞌil chiꞌ yedꞌ a pensar tzach cuchbꞌanbꞌat dꞌa sbꞌeal qꞌuinal.
24 A ol ach colanel dꞌa yol scꞌabꞌ ix ix chuc spensar yedꞌ ix ayxo vin̈ yetbꞌeyum to te vachꞌ smontan yedꞌ slolonel.
25 Man̈ acꞌoch a pensar dꞌa svachꞌil yilji ix, man̈ a cha somchajel a cꞌool yuj chajtil tzach aj yilanoch ix.
26 A mach smulan yedꞌ ix ajmul ix, scot mebꞌail dꞌa yibꞌan̈, axo mach smontaj yuj ix ay yetbꞌeyum yic smulan ix yedꞌoc, syicꞌcot chamel dꞌa yibꞌan̈.
27 Qꞌuinaloc ay junoc mach tzꞌicꞌanbꞌat teꞌ tzacꞌacꞌ dꞌa sn̈iꞌ scꞌool, max ecꞌbꞌatlaj stzꞌabꞌat spichul yuj teꞌ.
28 A mach sbꞌey dꞌa yibꞌan̈ teꞌ tzacꞌacꞌ, max ecꞌbꞌatlaj stzꞌabꞌat yoc yuj teꞌ.
29 A mach smulan yedꞌ ix ix ay yetbꞌeyum chiꞌ, yovalil scot dꞌa yibꞌan̈.
30 Tato ay junoc elcꞌum tzꞌelcꞌan junoc tasi yujto ay svejel, tzato naji val dꞌa yibꞌan̈,
31 palta vachꞌchom icha chiꞌ, tato syamchaji, yovalil uquel tzꞌaj stupan tas ix yelqꞌuej chiꞌ, taxon̈ej man̈xalaj tas scan dꞌay.
32 Tato ay mach tzꞌecꞌ yedꞌ ix ayxo vin̈ yetbꞌeyum, yelxo val malaj jabꞌoc spensar. A mach icha chiꞌ scꞌulej, an̈ej syacꞌ lajvoc sbꞌa.
33 Ol scha syaelal, ol macꞌjocpaxi, man̈xa bꞌaqꞌuin̈ ol bꞌat sqꞌuixvelal chiꞌ satcꞌolal yuj ebꞌ anima.
34 A vin̈ ix ixtaj ix yetbꞌeyum chiꞌ, te ov vin̈ icha te tzacꞌacꞌ, man̈ jabꞌoc syacꞌ nivancꞌolal vin̈ ayic scꞌoch stiempoal yacꞌanecꞌ spac vin̈.
35 A silabꞌ vin̈ ay smul chiꞌ syacꞌ dꞌa vin̈, max schalaj vin̈, vachꞌchom te nivan silabꞌ chiꞌ, palta max yacꞌlaj nivancꞌolal vin̈.