Tzil val a bꞌa dꞌa ebꞌ ix ix chuc spensar
5
Ach vuninal, cha abꞌ in jelanil tic, scham val a maclan abꞌ in razón vachꞌ svalaꞌ.2 Icha chiꞌ ol aj snachajel uuj, ol yal a lolon yedꞌ jelanil.
3 A junoc ix ix ay yetbꞌeyum, te vachꞌ slolon ix, cꞌununi slolon ix yic tzach smontejbꞌat ix dꞌa chucal.
4 Axo dꞌa slajvubꞌal, lajanxo tzꞌaj ix icha an̈ ixaj te cꞌaꞌ, icha val tzꞌaj co lajvi yuj qꞌuen espada chabꞌ ye.
5 A mach sbꞌeyecꞌ yedꞌ jun ix ix chiꞌ, ol chamoc. A sbꞌeybꞌal jun ix ix chiꞌ, bꞌeal chamel yaji.
6 A dꞌa ix chiꞌ malaj yelcꞌoch sbꞌeal qꞌuinal, max snalaj ix tato vachꞌ, mato chuc sbꞌeybꞌal ix chiꞌ.
7 Yuj chiꞌ ach vuninal, abꞌ tas svalaꞌ. Man̈ icꞌcanel a bꞌa dꞌa a cachnabꞌil svacꞌ tic.
8 Najat tzach el dꞌa stzꞌey ix ay yetbꞌeyum chiꞌ, xach cꞌochta val dꞌa spuertail spat ix.
9 Tato maay, ol satel a bꞌinaj dꞌa vachꞌil, elan̈chamel ol ach cham yuj junoc vin̈ malaj yoqꞌuelcꞌolal.
10 Tato icha chiꞌ tza cꞌulej, jantacn̈ej a bꞌeyumal ix ilchaj uuj ayic ix acꞌan val ip a munlaji, ol acꞌcanbꞌat dꞌa yol scꞌabꞌ junoc chꞌoc animail.
11 Tato tza cꞌanabꞌajej tas syal ix, toxon̈ej ol ach ocꞌcanecꞌoc, jabꞌjabꞌil ol lajvoquem a nivanil.
12 Axo ol alan icha tic: ¿Tas val yuj ix in patiquejel in cachnabꞌil? ¿Tas val yuj maj in cꞌanabꞌajej?
13 Maj yal in cꞌool ix in cha vabꞌ tas ix yal ebꞌ in cꞌaybꞌumal, octom ix in cha vabꞌ dꞌa ebꞌ.
14 Axo ticnaic jabꞌxon̈ej maj in juviel dꞌa yichan̈ masanil chon̈abꞌ dꞌa juneln̈ej, xa chama.
15 Ucꞌ a aꞌ ictaxon yaji yic vachꞌ tzꞌecꞌ staquin̈al a tiꞌ. (Syalelcꞌochi an̈ej yedꞌ ix etbꞌeyum tzacꞌ a gana.)
16 ¿Tas val yuj ol aj uninal yedꞌ ebꞌ ix ix tzꞌecꞌ dꞌa yoltac calle?
17 Vachꞌ scolvaj ebꞌ uninal edꞌoc, dꞌa yichan̈ junocxo mach bꞌaj scolvaj ebꞌ uninal chiꞌ.
18 Tzalajan̈, ayocabꞌ uninal yedꞌ ix etbꞌeyum chiꞌ, aton ix, ix icꞌ a bꞌa yedꞌoc ayic quelem achto.
19 Vachꞌocabꞌ yilji ix dꞌa yol a sat, icha val junoc nocꞌ cꞌultaquil chej. Mocabꞌ lajvoc a tzalajcꞌolal dꞌa ix, ayocabꞌ a tzalajcꞌolal chiꞌ yujto xajan ach yuj ix.
20 Ach vuninal, man̈ acꞌ somchajel a pensar yuj junoc ix ix ayxo yetbꞌeyum. ¿Tas yuj ol ach och chelchel dꞌa junxo ix ix chiꞌ?
21 A Jehová van ton yilan co bꞌeybꞌal junjun on̈, malaj junoc tas max uji yilani.
22 A ebꞌ chuc, an̈ejaꞌ schucal ebꞌ chiꞌ ol acꞌan juvoqueloc. An̈ejaꞌ schucal ebꞌ chiꞌ ol tzecꞌanoc, icha co tzecꞌji dꞌa junoc lasu.
23 Yujto max syamoch vaan sbꞌa ebꞌ, yuj chiꞌ ol bꞌatcan ebꞌ dꞌa chamel. Yuj sman̈ pensaril ebꞌ chiꞌ, ol satcanel ebꞌ.