A vachꞌilal sco cha yuj jelanil
4
Ex vuninal, chaec eyabꞌ in lolonel svalaꞌ. Maclejec eyabꞌi yic vachꞌ ol jelanbꞌoc e pensar yuuj.2 A cꞌaybꞌubꞌal te vachꞌ svacꞌ dꞌayex, yuj chiꞌ tzeyailejn̈ej dꞌa masanil tiempo.
3 Ayic quelem unin in, ayinto ecꞌ dꞌa yol spat in mam, yelxo val xajanabꞌil in yuj ix in nun.
4 A dꞌa jun tiempoal chiꞌ, icha tic ajnac yacꞌan in cꞌaybꞌubꞌal vin̈ in mam. Yalannac vin̈ icha tic: Sicꞌcan in lolonel tic dꞌa a pensar, cꞌanabꞌajej tas sval tic, yic vachꞌ ay a qꞌuinal.
5 Cha a jelanil yedꞌ a vachꞌ pensaril, man̈ acꞌbꞌat in lolonel tic satcꞌolal.
6 Xajanej a jelanil, man̈ a patiquejeli, yujto ol ach colchaj yuuj.
7 Yovalil tza sayecꞌ jelanil dꞌa junjun cꞌu. Vachꞌchom ajaltac tzꞌaj yilchaj uuj, palta te vachꞌ ama tato a tza bꞌabꞌlaj sayejecꞌ dꞌa yichan̈ juntzan̈xo tas ay dꞌayach.
8 Nibꞌejoch jelanil, yic vachꞌ ol ach icꞌjocchaan̈ yuuj, yic vachꞌ nivan ol aj elcꞌoch dꞌa yol sat ebꞌ etanimail.
9 A yuj jelanil chiꞌ, vachꞌ ol ach elcꞌochoc, ol och qꞌuelan ebꞌ anima yuj a jelanil chiꞌ, xchican vin̈ in mam chiꞌ dꞌayin.
10 Axo ticnaic ach vuninal, cha val abꞌ juntzan̈ in lolonel tic, yic vachꞌ ol najatbꞌoc a qꞌuinal.
11 A in ol ach vicꞌ bꞌey dꞌa sbꞌeybꞌal ebꞌ jelan, ol vacꞌan a bꞌeybꞌalej tojolal.
12 A dꞌa tojol bꞌeybꞌal chiꞌ, malaj tas ol ach yamanoch vaan, vachꞌchom yelcꞌolal ol ach bꞌatoc, palta man̈ ol ach telvoclaj.
13 Acꞌoch a pensar dꞌa cꞌaybꞌubꞌal tic, man̈ a patiquejeli. Yelxo val tza bꞌeybꞌalej yic vachꞌ ay a qꞌuinal.
14 Man̈ ach bꞌat tzacꞌan dꞌa spatic ebꞌ chuc sbꞌeybꞌal, man̈ a cꞌulej icha tas scꞌulej ebꞌ.
15 Bꞌesel a bꞌa dꞌa scal ebꞌ, acꞌ ip a bꞌeybꞌalan vachꞌil.
16 Max ochlaj svayan̈ ebꞌ tato max scꞌulej chucal ebꞌ, max yicꞌlaj yip ebꞌ, tato malaj junoc mach syixtej ebꞌ.
17 A chucal yedꞌ ixtoj anima, a juntzan̈ chiꞌ svael ebꞌ yaji.
18 A sbꞌeybꞌal ebꞌ tojol spensar, lajan icha ayic vanto sacbꞌi masanto sqꞌue cꞌu, scheclaj spatic yichan̈ ebꞌ yuuj.
19 Axo sbꞌeybꞌal ebꞌ chuc spensar jun, lajan icha yic tzon̈ bꞌeyecꞌ dꞌa scal qꞌuicꞌalqꞌuinal, man̈ chequeloc bꞌaj sco tenoch coc.
20 Ach vuninal, cha abꞌ in lolonel tic, maclej val abꞌ sicꞌlabꞌil.
21 Mocabꞌ iqꞌuel a sat dꞌay, sicꞌcan dꞌa a pensar,
22 yujto a juntzan̈ lolonel tic tzꞌacꞌan sqꞌuinal ebꞌ tzꞌilchaj yuuj.
23 Tza yaꞌilej a pensar dꞌa yichan̈ masanil tastac ay dꞌa yolyibꞌan̈qꞌuinal tic, yujto a a pensar chiꞌ tzach cuchbꞌan dꞌa vachꞌil, ma dꞌa chucal.
24 Man̈ esalvumoc tzutej a bꞌa, man̈ a comon alej pax chucal lolonel.
25 Te tojoln̈ej tzach bꞌat dꞌa ichan̈ dꞌa sbꞌeal vachꞌil, man̈ ach bꞌat qꞌuelan dꞌa tas malaj svachꞌil.
26 Tza yaꞌilej val tas tza cꞌulej icha val co sicꞌlan co bꞌe bꞌaj tzon̈ bꞌeyi, aocabꞌ val sbꞌeal vachꞌil bꞌaj tzach ochi.
27 Man̈ ach elcan dꞌa jun bꞌe te tojol, man̈ ach bꞌatcan dꞌa sbꞌeal chucal.