A tas scutej quicꞌan co jelanil
3
Ach vuninal, man̈ acꞌ sat a cꞌool dꞌa juntzan̈ in cꞌaybꞌubꞌal tic. Sicꞌcan in checnabꞌil tic dꞌa a pensar,2 yic vachꞌ ol najatbꞌoc a qꞌuinal yuuj, tzalajcꞌolaln̈ej ol ach ecꞌoc.
3 Man̈ actejcan a bꞌeybꞌalan vachꞌil, tza cꞌanabꞌajejn̈ej tas ix alaꞌ. Cham val a naani, satta a cꞌool dꞌay.
4 Yuj chiꞌ vachꞌ ach ol ach yil Dios, ol ach bꞌinajpax yuj ebꞌ anima.
5 Acꞌn̈ejoch a pensar dꞌa Jehová, man̈ acꞌoch a jelanil yipoc a cꞌool.
6 Nacot Jehová dꞌa masanil tas tza cꞌulej yic vachꞌ a ol colvaj edꞌoc dꞌa smasanil.
7 Man̈ a naꞌ to te jelan ach, nivanocabꞌ yelcꞌoch Jehová dꞌayach, tziqꞌuel a bꞌa dꞌa scal chucal.
8 Tato icha chiꞌ tza cꞌulej, juncꞌolal ol ach ajoc, tecꞌan ol ach ajoc.
9 Chꞌoxeli to nivan yelcꞌoch Jehová dꞌayach. Tzacꞌan junoc ofrenda dꞌay dꞌa tas ay dꞌayach yedꞌ pax dꞌa juntzan̈ sbꞌabꞌel sat tas tzavej.
10 Tato icha chiꞌ tza cꞌulej, malaj bꞌaqꞌuin̈ ol yacꞌ palta a vael yedꞌ tas tzuqꞌuej.
11 Ach vuninal, man̈ a patiquejel scachnabꞌil Jehová, mocabꞌ cot oval ayic tzach stumani.
12 Yujto a ebꞌ xajanabꞌil yuuj, aton ebꞌ chiꞌ scachaꞌ, icha val tzꞌaj scachan yuninal junoc mamabꞌil to stzalaj yedꞌoc.
13 Tzalajcꞌolal yic ebꞌ syicꞌ sjelanil, aton ebꞌ te ay spensar.
14 Yujto a tas tzꞌicꞌji dꞌa juntzan̈ chiꞌ yelxo te vachꞌ dꞌa yichan̈ tas tzꞌicꞌji dꞌa qꞌuen plata, ma qꞌuen oro.
15 A jelanil chiꞌ, yelxo val te vachꞌ dꞌa yichan̈ svachꞌil yilji qꞌuen tzꞌoch colcꞌabꞌil. Max yal-laj co lajbꞌan jun jelanil chiꞌ yedꞌ juntzan̈xo tastac te nibꞌabꞌil.
16 Yuj jelanil chiꞌ ol najatbꞌoc a qꞌuinal, yuuj ol icꞌ a bꞌeyumal, ol ach bꞌinaj pax yuuj.
17 Tato sco bꞌeybꞌalej jelanil, tzalajcꞌolal tzon̈ eqꞌui, juncꞌolal tzon̈ aji.
18 Tato tzꞌilchaj jelanil cuuj, ay co qꞌuinal, vachꞌ ol on̈ ecꞌoc, tzalajcꞌolal quicoꞌ.
19 A Jehová ix bꞌoan satchaan̈ yedꞌ sat lum tic yuj sjelanil yedꞌ yaj pensaril.
20 Yuj sjelanil chiꞌ sqꞌueul sjaj a aꞌ, scotpax yal acꞌval dꞌa scal asun.
21 Ach vuninal, man̈ actejcan a jelanil yedꞌ a vachꞌ pensaril, man̈ iqꞌuel a sat dꞌay.
22 Yujto ol najatbꞌoc a qꞌuinal yuuj, vachꞌ ol ach elcꞌoch dꞌa sat ebꞌ anima yuuj.
23 Te juncꞌolaln̈ej ol ach ecꞌoc, malaj bꞌaqꞌuin̈ ay tas ol ach icꞌanoc.
24 Ayic ol icꞌan ip, malaj mach bꞌaj ol ach xivoc, dꞌa tzalajcꞌolal ol ach vayoc.
25-26 Yujto ayoch Jehová yipoc a cꞌool, yuj chiꞌ man̈ ol ach schacan dꞌa junoc yaal, man̈ ol a naꞌ to ay tas ol ja dꞌa ibꞌan̈, icha sja dꞌa yibꞌan̈ ebꞌ chuc sbꞌeybꞌal.
27 Man̈ ach bꞌat mican dꞌa ebꞌ scꞌanan colval dꞌayach tato syal tzach colvaj dꞌa ebꞌ.
28 Tato syal a colvaj ticnaic, mocabꞌ alaꞌ to qꞌuicꞌanto tzach colvaji.
29 Man̈ a na acꞌ chucal dꞌa ebꞌ cajan dꞌa a lacꞌanil, yujto malaj schabꞌcꞌolal ebꞌ dꞌayach.
30 Man̈ icꞌbꞌat ebꞌ etanimail dꞌa yichan̈ ebꞌ yajal tato malaj tzach yutej ebꞌ.
31 Man̈ a nibꞌejoch bꞌeyumal icha syutej sbꞌa ebꞌ malaj jabꞌoc yoqꞌuelcꞌolal, man̈ a cꞌulej icha sbꞌeybꞌal ebꞌ chiꞌ.
32 Yujto max scha scꞌool Jehová ebꞌ chuc syutej sbꞌa chiꞌ, axo pax ebꞌ vachꞌ syutej sbꞌa, vachꞌ yacꞌan yedꞌ ebꞌ.
33 Scot scatabꞌ Jehová dꞌa yibꞌan̈ ebꞌ chuc sbꞌeybꞌal yedꞌ dꞌa yibꞌan̈ ebꞌ cajan yedꞌ ebꞌ, axo pax dꞌa ebꞌ tojol sbꞌeybꞌal, syacꞌ svachꞌcꞌolal.
34 Sbꞌuchvaj Jehová dꞌa ebꞌ bꞌuchumtac, axo dꞌa ebꞌ emnaquil syutej sbꞌa, syacꞌ svachꞌcꞌolal.
35 A ebꞌ sbꞌeybꞌalan vachꞌil, ol icꞌjocchaan̈ ebꞌ, axo ebꞌ chuc spensar, ol acꞌjoc qꞌuixvelal ebꞌ.