A Dios stan̈van tas sbꞌonac
104
Dꞌa smasanil in cꞌool sval vachꞌ lolonel dꞌa Jehová. Ach Jehová in Diosal, yelxo val te nivan elcꞌochi. A a tziquiquial yedꞌ a poder, a ayoch a pichuloc.2 A saquilqꞌuinal tzach pichani. A ach ix acꞌbꞌat jen̈an satchaan̈ icha junoc mantiado.
3 A ach ix a bꞌoqꞌue a pat dꞌa yibꞌan̈ a aꞌ. A asun tzꞌoch a carruajeoc. Icha sbꞌey icꞌ a bꞌeyeqꞌui.
4 A icꞌ tzacꞌ och a checabꞌoc, axo yoc cꞌacꞌ tzacꞌoch acꞌumaloc servil.
5 Ix a bꞌocanem lum luum tic dꞌa yibꞌan̈ sbꞌachnubꞌal. Malaj bꞌaqꞌuin̈ ol ibꞌxoc lum dꞌa yedꞌtal chiꞌ.
6 Ix a muc sat lum luum tic yedꞌ aꞌ nivan mar, ichato a aꞌ ix och spichuloc luum. A a aꞌ ix musan lum nivac vitz.
7 Palta a ach ix a cachoch vaan aꞌ, yuj chiꞌ ix bꞌat aꞌ elelal. Elan̈chamel ix bꞌatcan aꞌ ayic ix yabꞌan a jaj aꞌ icha scꞌan̈ cꞌu.
8 Ix qꞌuibꞌ lum jolomtac vitz, ix emcan lum chꞌolquixtac, masanto ix cꞌochcan aꞌ bꞌaj ix a chꞌoxcani.
9 Ix acꞌcanem stzꞌacan̈il bꞌaj scꞌochcan aꞌ, max ecꞌbꞌatlaj aꞌ dꞌa jun tzꞌacaan̈ chiꞌ. Man̈xo ol smuclaj lum luum chiꞌ aꞌ.
10 A ach ix acꞌcot a aꞌ ay sjaj yedꞌ aꞌ nivac aꞌ tzꞌecꞌ dꞌa scal lum nivac vitz.
11 Aton aꞌ chiꞌ syucꞌ nocꞌ cꞌultaquil nocꞌ. A aꞌ syucꞌ pax nocꞌ caltacteꞌal bꞌuru yic tzꞌecꞌ staquin̈al stiꞌ nocꞌ.
12 Dꞌa scꞌabꞌtac te teꞌ dꞌa stitac aꞌ nivac aꞌ chiꞌ sbꞌo soꞌ nocꞌ much, ataꞌ tzꞌocꞌ nocꞌ.
13 Ato dꞌa a cajnubꞌ dꞌa satchaan̈ tzacꞌcot n̈abꞌ dꞌa yibꞌan̈ lum vitz. Tzꞌacꞌanemta nivac n̈abꞌ yic satan tastac tzꞌavchaj dꞌa sat lum luum.
14 Tzacꞌ qꞌuibꞌ an̈ an̈cꞌultac yic vachꞌ scꞌux an̈ nocꞌ nocꞌ. Tzacꞌpax qꞌuibꞌ juntzan̈ tas scavej yic scabꞌlej:
15 Aton vino tzꞌacꞌan tzalajbꞌoc co cꞌool, aceite tzꞌicꞌan copopi tzꞌaj co sat yedꞌ pax ixim ixim tzꞌacꞌan quip.
16 Tzacꞌ yaxbꞌoc masanil te teꞌ yuj n̈abꞌ yedꞌ teꞌ cꞌuteꞌ ix avej dꞌa yol yic Líbano.
17 Ataꞌ sbꞌo soꞌ nocꞌ cotac much. Axo nocꞌ julumchay, a dꞌa scaltac teꞌ taj cajanecꞌ nocꞌ.
18 A dꞌa lum nivac vitz scajnaj nocꞌ cꞌultaquil chiva. Axo dꞌa yoltac n̈aqꞌueen scajnaj nocꞌ chich.
19 A ach ix a bꞌo qꞌuen uj yic tzꞌoch sbꞌisuloc tiempoal. Yojtac cꞌu janicꞌ ol bꞌatixcanoc.
20 A ach tzacꞌ ja qꞌuicꞌalqꞌuinal, axo tzꞌoch dꞌacꞌvalilal. Axo dꞌacꞌvalil chiꞌ tzꞌelta nocꞌ cꞌultaquil nocꞌ.
21 Tzꞌocꞌ nocꞌ choj yuj schibꞌej, scꞌanan svael nocꞌ dꞌayach.
22 Axo yic sjavi cꞌu jun, scꞌubꞌanxicanel sbꞌa nocꞌ. Axo dꞌa sn̈aqꞌueen nocꞌ tzꞌem cutzan svayi.
23 A on̈xo anima on̈ tic, tzon̈ elta, tzon̈ bꞌat munlajel. Tzon̈ munlaji tzꞌecꞌ cꞌu.
24 Mamin Jehová, man̈xo bꞌischajbꞌenoc jantac tas ix a bꞌocani. Masanil tas ix a bꞌocan yedꞌ a jelanil. Majnaquel sat lum luum tic yuj tas ix a bꞌocan chiꞌ.
25 Ina aꞌ mar, te nivan sat aꞌ, man̈ chequeloclaj stitac aꞌ. Man̈xo bꞌischajbꞌenoc nocꞌ nocꞌ ay dꞌa yol aꞌ: Ay nocꞌ nivac, ay pax nocꞌ cotac.
26 A dꞌa sat aꞌ tzꞌecꞌ teꞌ barco. A dꞌa yol aꞌ ay nocꞌ nivan leviatán, ix a bꞌo nocꞌ yic tzach tzalaj yedꞌ nocꞌ taꞌ.
27 Masanil juntzan̈ nocꞌ nocꞌ chiꞌ, ayn̈ejoch sat nocꞌ dꞌayach yic tzacꞌ svael nocꞌ dꞌa yorail.
28 A ach tzacꞌ svael nocꞌ chiꞌ, axo nocꞌ sicꞌanqꞌue vaan. Elbꞌen yel uuj yic a tastac vachꞌ sva nocꞌ.
29 Tato tzꞌel a sat dꞌa nocꞌ, xivqꞌue nocꞌ. Tato tziqꞌuecꞌ yicꞌ nocꞌ, scham nocꞌ, tzꞌochxican nocꞌ pococal.
30 Tato tzacꞌxi yicꞌ nocꞌ jun, sqꞌuibꞌ sbꞌisul nocꞌ. Vachꞌ tzꞌaj yiljixi sat lum luum tic a bꞌoani.
31 Mamin Jehová, ayn̈ej ecꞌ a tziquiquial dꞌa masanil qꞌuinal. Tzach tzalaj val yedꞌ tas ix a bꞌocani.
32 Tzꞌibꞌxiqꞌue lum luum tic ayic tzach och qꞌuelan dꞌa luum. Sqꞌue stabꞌil lum vitz ayic tza yaman luum.
33 Mamin Jehová, ol in bꞌitan dꞌayach yacbꞌan ayinto eqꞌui. Yacbꞌan pitzan into, ol in bꞌitan dꞌayach ach in Diosal.
34 Mamin, comonoc val stzalaj a cꞌool yedꞌ tas tzin na tic. An̈ej dꞌayach ay in tzalajcꞌolal.
35 Satocabꞌ el ebꞌ chuc sbꞌeybꞌal yedꞌ ebꞌ tzach paticanel dꞌa sat lum luum tic.
A in tic yedꞌ smasanil in cꞌool ol val vachꞌ lolonel dꞌa Jehová. Calec vachꞌ lolonel dꞌa Jehová chiꞌ.