Alchajocabꞌ vachꞌ lolonel dꞌa Jehová
Sbꞌit jun tic vin̈aj David.
103
Dꞌa smasanil in cꞌool yedꞌ smasanil in pixan, sval vachꞌ lolonel dꞌa Jehová.2 Dꞌa smasanil in cꞌool sval vachꞌ lolonel dꞌay. Man̈ ol sat in cꞌol dꞌa masanil svachꞌcꞌolal.
3 Aꞌ val sucan sat masanil in mul. Aꞌ tzꞌacꞌan bꞌoxoc in cꞌool dꞌa masanil ilya.
4 Aꞌ tzin colanel dꞌa yol scꞌabꞌ chamel. Syacꞌn̈ej svachꞌcꞌolal dꞌayin, tzꞌocꞌ pax scꞌool dꞌayin.
5 Aꞌ tzꞌacꞌan masanil tas vachꞌ dꞌayin yacbꞌan pitzan into, yuj chiꞌ ichato tzin ochxi quelemal icha nocꞌ nivac chꞌacbꞌa.
6 A Jehová sbꞌoan yaj dꞌa stojolal dꞌa ebꞌ tzꞌixtaj yuj ebꞌ ixtum anima.
7 Ix schꞌox sbꞌeybꞌal yedꞌ tas scꞌulej dꞌa vin̈aj Moisés yedꞌ dꞌayon̈ a on̈ israel on̈ tic.
8 A Jehová, xajan on̈ yuuj, te cꞌun yocꞌ scꞌol dꞌayon̈. Man̈ cꞌunoc scot yoval, te ay pax svachꞌcꞌolal.
9 Man̈ cotacoc scal tzon̈ stumani. Max chichonochlaj scꞌol dꞌayon̈ dꞌa masanil tiempo.
10 Max yacꞌlaj co yaelal icha dꞌa smojal yuj co chucal. Max spactzitejlaj dꞌayon̈ icha smojal yuj co mul chiꞌ.
11 Te nivan svachꞌcꞌolal dꞌa ebꞌ ay xivcꞌolal dꞌay. Icha val schaan̈il satchaan̈ dꞌa yibꞌan̈ lum luum tic, icha chiꞌ svachꞌcꞌolal chiꞌ dꞌa ebꞌ.
12 Najat ix yacꞌcanbꞌat co chucal dꞌayon̈, icha snajatil scal bꞌaj sjavi cꞌu yedꞌ bꞌaj tzꞌemxi.
13 Icha junoc mamabꞌil tzꞌocꞌ scꞌol dꞌa yuninal, icha chiꞌ yocꞌ scꞌol Jehová dꞌa ebꞌ ay xivcꞌolal dꞌay,
14 yujto yojtac tas ix aj co bꞌoi, yojtac sicꞌlabꞌil to pococ on̈.
15 Icha yaj sqꞌuinal an̈ an̈cꞌultac, icha chiꞌ yaj co qꞌuinal a on̈ anima on̈ tic. Sqꞌueul an̈, xumacan an̈,
16 ayic sjavi junoc icꞌ te ov dꞌa an̈, stacji an̈ yuuj. Malaj mach tzꞌabꞌan specal tas ix aj an̈.
17 Palta axo svachꞌcꞌolal Jehová, malaj slajvubꞌ, aytaxonecꞌ dꞌa ebꞌ ay xivcꞌolal dꞌay. Tzꞌelcꞌoch stiꞌ dꞌa yin̈tilal ebꞌ anima scꞌanabꞌajan strato,
18 aton ebꞌ max yactejcan scꞌanabꞌajan schecnabꞌil.
19 A dꞌa satchaan̈ ix sbꞌo sdespacho Jehová. Ataꞌ ayoch Yajalil dꞌa yibꞌan̈ smasanil.
20 Ex yángel Jehová, ex tecꞌan ex dꞌa e poder, alec vachꞌ lolonel dꞌa Jehová, a ex ton cꞌanabꞌajum ex dꞌa slolonel.
21 Masanil ex satchan̈il checabꞌ, alequel vachꞌ lolonel dꞌa Jehová, a ex ton tze cꞌanabꞌajej tas snibꞌej tze cꞌulej.
22 Masanil tas bꞌobꞌil yuj Jehová dꞌa yol smacbꞌen, yalocabꞌ vachꞌ lolonel dꞌa Jehová chiꞌ. Dꞌa smasanil in cꞌool ol val vachꞌ lolonel dꞌa Jehová.