Slesal junoc mach ilcꞌolal yaji
A junoc mach ayoch dꞌa syaelal yuj ilcꞌolal, axo dꞌa Jehová syal sbꞌa.
102
Mamin Jehová, abꞌ val jun in lesal tic. In gana to scꞌoch vav dꞌayach.2 Man̈ ach bꞌat mican dꞌayin ayic ay in och ilcꞌolal. Elocabꞌ dꞌa a cꞌool abꞌan in lesal. Comonoc elan̈chamel tzach tacꞌvi dꞌayin ayic tzach vavtani.
3 Van slajviem in qꞌuinal icha val satem teꞌ tabꞌ. Van stzꞌabꞌat in bꞌaquil icha teꞌ cuxcꞌacꞌ svabꞌi.
4 Man̈xalaj yip in pixan svabꞌi, icha val taquin̈ an̈cꞌultac in ticnaic. Maxtzac ochlaj in vejel.
5 Ix och lotzan in tzꞌumal dꞌa in bꞌaquil yuj bꞌaj tzin te oqꞌui.
6 Lajan in icha junoc nocꞌ cujubꞌ dꞌa tzꞌinan luum, ma icha nocꞌ xochꞌ bꞌaj ay teꞌ cꞌatac pat.
7 Max ochlaj in vayan̈. Lajan in yedꞌ nocꞌ much tzꞌecꞌ schꞌocojil dꞌa chontac pat.
8 A ebꞌ ayoch ajcꞌolal dꞌayin, junjun cꞌu stzuntzej cus in cꞌool ebꞌ. Tzin yacꞌanpax bꞌinaj ebꞌ dꞌa scatabꞌ.
9 Ichato ticꞌaqꞌuil taan̈ in vael tzin vaꞌa. Scalej sbꞌa yal in sat yedꞌ tas svuqꞌuej.
10 Yujn̈ej a cꞌacꞌalcꞌolal yedꞌ yoval a cꞌol dꞌayin, ix in icꞌanqꞌue vaan, ix lajvi chiꞌ ix in a yumancanbꞌat dꞌa najat.
11 Icha junoc en̈ul vanxo satemi, icha val chiꞌ in qꞌuinal. Van in tacjiem icha val an̈ an̈cꞌultac svabꞌi.
12 A achxo Mamin Jehová, Yajal ach dꞌa masanil tiempo. Ol ach nachajn̈ejcot dꞌa masanil qꞌuinal.
13 Cotan̈, ocꞌocabꞌ a cꞌol dꞌa Sion. Toxo ix ja stiempoal to tzacꞌxi a vachꞌcꞌolal dꞌay.
14 A on̈ a checabꞌ on̈ tic xajan Sion cuuj, vachꞌchom lan̈chajnac emi. Tzon̈ oqꞌui yujto ix jujiemi.
15 Masanil nación yedꞌ ebꞌ vin̈ sreyal yolyibꞌan̈qꞌuinal tic, ol xiv ebꞌ dꞌa stziquiquial Jehová te bꞌinajnac.
16 Ayic ol bꞌoxiqꞌue Sion, ol schꞌoxan sbꞌa dꞌa scal stziquiquial taꞌ.
17 Aꞌ ol chaan slesal ebꞌ malaj mach scolvaj yedꞌoc. Man̈ ol spatiquejel-laj ebꞌ, ayic ol yalan sbꞌa ebꞌ dꞌay.
18 Tzꞌibꞌchajocabꞌcan dꞌa yol chꞌan̈ uum tas ol scꞌuloc Jehová yic vachꞌ a ebꞌ manto aljoclaj, ol yal vachꞌ lolonel ebꞌ dꞌay.
19 Ato dꞌa scꞌojnubꞌ Jehová dꞌa satchaan̈ ol yilanemta lum luum tic,
20 yic vachꞌ ol bꞌo yaj bꞌaj stevi ebꞌ presovum. Ol scolancanel ebꞌ vin̈ preso yaji, ebꞌ ayoch chamel dꞌa yibꞌan̈,
21 yic ol aljoquel yabꞌixal dꞌa Sion, yic tzꞌalchajpax vachꞌ lolonel dꞌay dꞌa Jerusalén.
22 Yuj chiꞌ ol ja masanil nación ul yaqꞌuem sbꞌa dꞌa Jehová chiꞌ.
23 Ix yicꞌanel vip Jehová ayic ayto in qꞌuinal, ix tzap in qꞌuinal yuuj.
24 Ix valan dꞌay: Ach in Diosal, man̈ acꞌ tzap in qꞌuinal. A val a qꞌuinal a ach tic, malaj slajvubꞌ.
25 Atax dꞌa yichbꞌanil a bꞌonaccanem yich yolyibꞌan̈qꞌuinal tic, a ach pax a bꞌonaccan satchaan̈.
26 Ol satel masanil juntzan̈ tic, a achxo jun, ayachn̈ejeqꞌui. A juntzan̈ tic ol ixtaxoc, icha scꞌabꞌicꞌoch junoc cꞌapac, ol a qꞌuexcaneli, icha val sqꞌuexanel junoc scꞌa pichul ebꞌ anima, syumancaneli.
27 A achxo jun, an̈ejaꞌ aji, malaj bꞌaqꞌuin̈ ol ach sateloc.
28 A ebꞌ cuninal a on̈ a checabꞌ on̈ tic, juncꞌolal ol aj ebꞌ dꞌa ichan̈. Yuj a colval, malaj tas ol icꞌan ebꞌ.