Syacꞌ stiꞌ vin̈ rey dꞌa Dios
Sbꞌit jun tic vin̈aj David.
101
A vachꞌilal yedꞌ tojolal ol in bꞌitej. Mamin Jehová in gana tzin bꞌitan dꞌayach.2 Snibꞌej in cꞌol tzin bꞌeybꞌalej tojolal. ¿Bꞌaqꞌuin̈tax val ol ach och vedꞌoc? Malaj mach ol alan jabꞌoc chucal dꞌayin yuj in bꞌeybꞌal dꞌa in palacio.
3 Malaj bꞌaqꞌuin̈ ol in bꞌat qꞌuelan dꞌa chuc pensaril.
Ach in Diosal, max yal-laj in cꞌol sbꞌeybꞌal ebꞌ tzach paticaneli. Malaj bꞌaqꞌuin̈ ol in cha ja ebꞌ dꞌa in tzꞌey.
4 Najat ol vicꞌcanel chucal dꞌa in pensar. Malaj valan vic yedꞌ ebꞌ scꞌulan chucal chiꞌ.
5 Ol in satel ebꞌ cꞌubꞌeltac tzꞌalan specal ebꞌ anima. A ebꞌ acꞌumtac yedꞌ ebꞌ syicꞌchaan̈ sbꞌa, man̈ ol techajlaj ebꞌ vuuj.
6 Ol vilaꞌ mach ebꞌ cꞌanabꞌajum dꞌa sat lum luum tic, a ebꞌ ol munlaj vedꞌoc. An̈ej ebꞌ vachꞌ sbꞌeybꞌal ol och in checabꞌoc.
7 Man̈ ol in cha ajlaj ebꞌ ixtum anima dꞌa in palacio. A ebꞌ naumchaan̈ lolonel, man̈ ol in cha ajlaj ebꞌ dꞌa vichan̈.
8 Mamin Jehová, dꞌa junjun cꞌu ol in satel ebꞌ chuc cajan dꞌa sat co lum tic. Ol in satel masanil ebꞌ scꞌulan chucal dꞌa yol a chon̈abꞌ.