A spitalil ebꞌ israel
106
Calec vachꞌ lolonel dꞌa Jehová.Caqꞌuec yuj diosal dꞌay, yujto vachꞌ. Malaj bꞌaqꞌuin̈ slajvi svachꞌcꞌolal.
2 ¿Mach ol tzacꞌvan yalanel jantac tas satubꞌtac ix scꞌulej Jehová? ¿Mach ol yal sbꞌitan dꞌay icha val dꞌa smojal?
3 Te vachꞌ yic ebꞌ cꞌanabꞌajum dꞌay, ebꞌ sbꞌeybꞌalan tojolal dꞌa masanil tiempo.
4 Mamin Jehová, tzin a nacoti ayic ol acꞌan a vachꞌcꞌolal dꞌa ebꞌ a chon̈abꞌ. Tzin a nacoti ayic ol ach javoc colval,
5 yic vachꞌ ol vil a vachꞌcꞌolal dꞌa a chon̈abꞌ sicꞌbꞌilel uuj, yic ol in tzalaj yedꞌ ebꞌ, ol in qꞌuepaxchaan̈ yedꞌ ebꞌ.
6 Lajan ix aj co mul yedꞌ ebꞌ co mam quicham. Ix co pitej co bꞌa, ix co cꞌulej chucal.
7 Ayic yecꞌnac ebꞌ co mam quicham dꞌa Egipto, malaj ix elcꞌoch smilagro Jehová dꞌa ebꞌ. Ix bꞌatcan satcꞌolal snivan vachꞌcꞌolal yuj ebꞌ. Ix och ebꞌ ajcꞌolal dꞌay dꞌa stiꞌ aꞌ Chacchac Mar.
8 Axo ix colanel ebꞌ, ix schꞌoxanel spoder, yic vachꞌ malaj tas tzꞌalchaj dꞌa spatic.
9 Ix tumaj aꞌ Chacchac Mar chiꞌ yuuj, ix tacjiem aꞌ yic tzꞌecꞌta ebꞌ schon̈abꞌ dꞌa snan̈al aꞌ mar chiꞌ. Ichato taquin̈al luum bꞌaj ix ecꞌta ebꞌ.
10 Icha chiꞌ ix aj scolchajel ebꞌ dꞌa yol scꞌabꞌ ebꞌ ajcꞌool, aton ebꞌ schichon scꞌol dꞌa ebꞌ.
11 A aꞌ mar ix mucancan ebꞌ ajcꞌol yajoch chiꞌ dꞌa ebꞌ, man̈xa junoc ebꞌ ix eli.
12 Yuj chiꞌ ix yacꞌoch scꞌool ebꞌ dꞌa tas albꞌil yuj Dios. Ix yalan vachꞌ lolonel ebꞌ dꞌay dꞌa bꞌital.
13 Palta elan̈chamel ix bꞌatcan satcꞌolal tas ix scꞌulej Dios yuj ebꞌ. Maj stan̈vejlaj yil ebꞌ tas sna Dios chiꞌ dꞌa yibꞌan̈ ebꞌ.
14 Axo dꞌa tzꞌinan luum chiꞌ ix stzuntzejcot yoval scꞌool Dios ebꞌ. Yuj specꞌal ebꞌ ix yacꞌ proval Dios chiꞌ ebꞌ.
15 Ix ton yacꞌ Dios chiꞌ tas snibꞌej scꞌol ebꞌ, palta ix yacꞌcot jun nivan yaelal dꞌa scal ebꞌ yic scham ebꞌ.
16 A dꞌa yol smantiado ebꞌ, chuc tas ix sna ebꞌ dꞌa spatic vin̈aj Moisés yedꞌ vin̈aj Aarón sicꞌbꞌilel yuj Jehová.
17 Yuj chi, ix sjac sbꞌa lum luum, ix turjibꞌat vin̈aj Datán, vin̈aj Abiram yedꞌ ebꞌ ajun yedꞌ ebꞌ vin̈.
18 Ix bꞌat jun cꞌacꞌ dꞌa scal ebꞌ smasanil, ix laj tzꞌabꞌat ebꞌ scꞌulan chucal chiꞌ.
19 A dꞌa tzalan Horeb ix sbꞌo jun yechel vacax ebꞌ dꞌa qꞌuen oro, ix yacꞌanem sbꞌa ebꞌ dꞌay.
20 A Dios Nivan Yelcꞌochi ix yactejcan ebꞌ, axo dꞌa jun yechel vacax cꞌuxum an̈cꞌultac ix yaqꞌuem sbꞌa ebꞌ.
21 Ix bꞌat satcꞌolal Dios Scolumal ebꞌ yuuj, aton ix bꞌoan jantac tas satubꞌtac dꞌa Egipto.
22 A dꞌa smacbꞌen ebꞌ yin̈tilal vin̈aj Cam, satubꞌtac tas ix sbꞌoꞌo. Chꞌocxo val tas ix scꞌulej dꞌa aꞌ Chacchac Mar chiꞌ.
23 A Dios ix sna to satel ebꞌ, palta axo vin̈aj Moisés, vin̈ sicꞌbꞌilel yuuj, ix tevi yuj ebꞌ, yuj chiꞌ ix ecꞌcanbꞌat yoval scꞌol Dios, majxo satel-laj ebꞌ.
24 Axo ix ecꞌ janicꞌxo tiempo, ix spaticanel jun luum yax sat ebꞌ. Maj yacꞌochlaj ebꞌ dꞌa scꞌool tas ix yal Dios.
25 A dꞌa yoltac smantiado ebꞌ ix yalubꞌtan̈ej dꞌa spatic Jehová. A tas ix yal Dios, maj scꞌanabꞌajejlaj ebꞌ.
26 Yuj chiꞌ ix yacꞌ stiꞌ Dios dꞌa ebꞌ, ix yalani to ol cham ebꞌ yuuj dꞌa tzꞌinan luum,
27 to ol saclemcanbꞌat ebꞌ yin̈tilal ebꞌ dꞌa scal juntzan̈ chꞌoc chon̈abꞌil, axo taꞌ ol miljoccham ebꞌ.
28 Ix yacꞌanem sbꞌa ebꞌ dꞌa Baal-peor. Ix schiꞌan nocꞌ silabꞌ ebꞌ tzꞌacꞌji dꞌa juntzan̈ dios man̈ pitzanoc.
29 A yuj chucal scꞌulej ebꞌ, ix stzuntzejcot yoval scꞌol Dios ebꞌ, yuj chiꞌ ix javi yabꞌil dꞌa scal ebꞌ, ix cham ebꞌ yuuj.
30 Axo ix qꞌue vaan vin̈aj Finees, ix smilancham jun vin̈ ay smul chiꞌ vin̈, ix och vaan chamel chiꞌ.
31 Ix och tas ix scꞌulej vin̈ chiꞌ svachꞌiloc, to malaj bꞌaqꞌuin̈ ol bꞌat satcꞌolal yuj Dios.
32 An̈ejaꞌ dꞌa a aꞌ yic Meriba, ix tzuntzajcot yoval scꞌool Jehová yuj ebꞌ. Chuc ix elcꞌoch vin̈aj Moisés yuj tas ix scꞌulej ebꞌ chiꞌ.
33 Ix tzuntzaj tac scꞌol vin̈ yuj ebꞌ, yuj chiꞌ comonn̈ej ix lolon vin̈ dꞌa ebꞌ.
34 Maj satel-laj juntzan̈ chon̈abꞌ ebꞌ icha ix yutej Jehová yalani.
35 Palta axo tas ix scꞌulej ebꞌ, to ix yicꞌlaj sbꞌa ebꞌ yedꞌ ebꞌ chꞌoc chon̈abꞌil chiꞌ, ix sbꞌeybꞌalan sbꞌeybꞌal ebꞌ chiꞌ ebꞌ.
36 Ix yacꞌanem sbꞌa ebꞌ dꞌa juntzan̈ sdiosal ebꞌ chꞌoc chon̈abꞌil chiꞌ. A val yuj jun chiꞌ ix ixtaxel ebꞌ.
37 Ix laj sn̈us yal yuninal ebꞌ dꞌa ebꞌ demonio silabꞌil.
38 A schiqꞌuil ebꞌ unin malaj smul ix yiqꞌuel ebꞌ, aton schiqꞌuil ebꞌ yuninal ebꞌ yedꞌ ebꞌ yisil ebꞌ, axo dꞌa sdiosal ebꞌ aj Canaán ix yacꞌ ebꞌ silabꞌil. Axo lum luum, ix ixtaxbꞌat luum yuj schamel ebꞌ chiꞌ.
39 Ix ixtaxbꞌat ebꞌ yuj chucal ix scꞌulej chiꞌ, ix och ebꞌ ajmulal dꞌa yol sat Jehová.
40 Ix tzactzaj Jehová, ix cot yoval dꞌa ebꞌ schon̈abꞌ,
41 yuj chiꞌ ix actajcan ebꞌ dꞌa yol scꞌabꞌ ebꞌ chꞌoc chon̈abꞌil, ix can ebꞌ dꞌa yol scꞌabꞌ ebꞌ ajcꞌool chiꞌ.
42 Ix ixtaj ebꞌ yuj ebꞌ ajcꞌool chiꞌ, ix can ebꞌ dꞌa yalan̈ smandar ebꞌ.
43 Tzijtum el ix colchajel ebꞌ yuj Dios, palta ix och ebꞌ ajcꞌolal dꞌa tas nabꞌil yuj Dios chiꞌ. Yuj chiꞌ ix te juvibꞌat ebꞌ ste cꞌulan chucal chiꞌ.
44 Palta ayic ix yilan syaelal ebꞌ chiꞌ Jehová, ix yabꞌanpax stevi ebꞌ dꞌay,
45 ix snacot strato yedꞌ ebꞌ, ix sqꞌuexan spensar chiꞌ dꞌa ebꞌ, yujto yel te nivan svachꞌcꞌolal.
46 Aꞌ ix acꞌan scꞌulej ebꞌ ajcꞌool chiꞌ yic vachꞌ syutej spensar ebꞌ dꞌa ebꞌ.
47 Ach Mamin Jehová co Diosal, colon̈eli. Icꞌon̈elta dꞌa scal juntzan̈ nación yic vachꞌ scal vachꞌ lolonel dꞌayach, yic tzach co bꞌitej dꞌa tzalajcꞌolal.
48 Calec vachꞌ lolonel dꞌa Jehová co Diosal a on̈ israel on̈ tic dꞌa masanil tiempo. Ujocabꞌi, xchiocabꞌ masanil ebꞌ chon̈abꞌ.
Calec vachꞌ lolonel dꞌa Jehová.