LIBRO 5
(SALMOS 107—150)
Ayn̈ejecꞌ svachꞌcꞌolal Jehová
107
Calec vachꞌ lolonel dꞌa Jehová yujto vachꞌ, yujto ayn̈ej svachꞌcꞌolal dꞌa masanil tiempo.2 A on̈ colbꞌil on̈ xo yuuj, calec to toxo ix on̈ colchajel dꞌa yol scꞌabꞌ ebꞌ cajcꞌool.
3 Aꞌ ix on̈ molbꞌancot dꞌa juntzan̈ chon̈abꞌ, bꞌaj sjavi cꞌu yedꞌ bꞌaj tzꞌem cꞌu yedꞌ dꞌa norte yedꞌ dꞌa sur.
4 Ay mach sbꞌeyecꞌ dꞌa tzꞌinan luum bꞌaj malaj bꞌe, max ilchajlaj sbꞌeal junoc chon̈abꞌ yuj ebꞌ bꞌaj syal scajnaji.
5 Ay svejel ebꞌ, ay staquin̈tial ebꞌ, toxo val scham ebꞌ.
6 A yuj syaelal ebꞌ chiꞌ, ix yal sbꞌa ebꞌ dꞌa Jehová, axo ix colanel ebꞌ.
7 Aꞌ ix icꞌanbꞌat ebꞌ bꞌaj tojol sbꞌat sbꞌeal jun chon̈abꞌ bꞌaj syal scajnaj ebꞌ.
8 Yacꞌocabꞌ yuj diosal ebꞌ dꞌa Jehová yuj svachꞌcꞌolal, yuj pax scolval satubꞌtac dꞌayon̈ a on̈ anima on̈ tic.
9 Aꞌ tzꞌicꞌanecꞌ staquin̈tial mach stacji stiꞌ. Tzijtum pax tas svaji syacꞌ dꞌa mach ay svejel.
10 Ay mach cajanecꞌ dꞌa scal qꞌuicꞌalqꞌuinal bꞌaj ay smay chamel. Ichato ayoch ebꞌ preso yuj scuscꞌolal, ichato ay paxoch qꞌuen cadena dꞌa ebꞌ,
11 yujto max scꞌanabꞌajej slolonel Jehová ebꞌ. Ix spatiquejcanel ebꞌ tas nabꞌil yuj Dios Ecꞌto dꞌa yibꞌan̈ smasanil.
12 Ix acꞌchajoch ebꞌ dꞌa munlajel ya. Ix telvi ebꞌ, man̈xalaj mach ix colvaj dꞌa ebꞌ.
13 A yuj syaelal ebꞌ chiꞌ, ix yal sbꞌa ebꞌ dꞌa Jehová, axo ix colanel ebꞌ dꞌa syaelal chiꞌ.
14 Aꞌ ix ilancot ebꞌ dꞌa scal qꞌuicꞌalqꞌuinal, ix yicꞌanel qꞌuen cadena ayoch dꞌa ebꞌ.
15 Yacꞌocabꞌ yuj diosal ebꞌ dꞌa Jehová yuj svachꞌcꞌolal, yuj pax scolval satubꞌtac dꞌayon̈ a on̈ anima on̈ tic.
16 A ix jecchitan qꞌuen puerta bronce, ix scꞌocchitan qꞌuen yipumal spuertail chiꞌ.
17 A ebꞌ chuc spensar, ix laj och syaelal ebꞌ. Ayoch ebꞌ dꞌa ilcꞌolal yuj schucal.
18 Ix syajcanel svael ebꞌ. Toxo val scham ebꞌ syutej yabꞌani.
19 A yuj syaelal ebꞌ chiꞌ, ix yal sbꞌa ebꞌ dꞌa Jehová, axo ix colanel ebꞌ dꞌa syaelal chiꞌ.
20 Aꞌ ix alani, ix bꞌoxi scꞌool ebꞌ. Ix colchaj ebꞌ yuuj dꞌa yol scꞌabꞌ chamel.
21 Yacꞌocabꞌ yuj diosal ebꞌ dꞌa Jehová yuj svachꞌcꞌolal, yuj pax scolval satubꞌtac dꞌayon̈ a on̈ anima on̈ tic.
22 Yacꞌocabꞌ silabꞌ ebꞌ dꞌay dꞌa acꞌoj yuj diosal. Yalocabꞌ ebꞌ dꞌa tzalajcꞌolal tas ix scꞌulej Jehová.
23 Ay juntzan̈ ebꞌ chon̈vajum ix bꞌat dꞌa yibꞌan̈ aꞌ mar, ix ecꞌ ebꞌ yedꞌ sbarco dꞌa yibꞌan̈ aꞌ.
24 Ataꞌ ix yil ebꞌ tas satubꞌtac ix scꞌulej Jehová.
25 A Jehová ix alani, ix te ovaj aꞌ, ix qꞌue chulnaj aꞌ dꞌa chaan̈.
26 Ix icꞌjichaan̈ ebꞌ, ix icꞌjixiem ebꞌ yuj aꞌ, ix somchaj scꞌol ebꞌ yuj smay aꞌ.
27 Ix te xiv ebꞌ, ix ecꞌ quetcon ebꞌ icha val ucꞌum an̈, man̈xalaj ix aj yelcꞌoch sjelanil ebꞌ.
28 A yuj syaelal ebꞌ chiꞌ ix yal sbꞌa ebꞌ dꞌa Jehová, axo ix colanel ebꞌ dꞌa syaelal chiꞌ.
29 Aꞌ ix icꞌanel chacxuxum icꞌ, ichato chiꞌ ix och numnaj aꞌ.
30 Ix tzalaj ebꞌ ayic ix yilan ebꞌ snumcꞌaj aꞌ. Axo Dios ix icꞌanbꞌat ebꞌ dꞌa puerto bꞌaj dꞌin̈an scꞌoch ebꞌ chiꞌ.
31 Yacꞌocabꞌ yuj diosal ebꞌ dꞌa Jehová yuj svachꞌcꞌolal, yuj pax scolval satubꞌtac dꞌayon̈ a on̈ anima on̈ tic.
32 Yicꞌocabꞌ chaan̈ Jehová ebꞌ bꞌaj smolbꞌej sbꞌa ebꞌ chon̈abꞌ. Yicꞌocabꞌ chaan̈ Dios ebꞌ bꞌaj smolbꞌej sbꞌa ebꞌ ichamtac vinac.
33 A bꞌaj tzꞌecꞌ a nivac aꞌ yedꞌ bꞌaj sqꞌueul sjaj aꞌ, smeltzajoch taquin̈ lumal yuj Jehová.
34 Aꞌ sqꞌuexan lum luum yax sat yic man̈xalaj tas sqꞌuibꞌ dꞌa luum. Yuj val smul ebꞌ anima cajanecꞌ ta, yuj chiꞌ icha chiꞌ tzꞌaji.
35 A dꞌa lum taquin̈ luum, scheclaj aꞌ cotac n̈ajabꞌ yuj Jehová. Sqꞌuepaxul sjaj a aꞌ dꞌa lum yuuj.
36 Ataꞌ syacꞌ cajnaj ebꞌ anima ay svejel, sbꞌoan nivac chon̈abꞌ ebꞌ taꞌ.
37 Tzꞌavvi trigo ebꞌ yedꞌ uva dꞌa sat sluum. Te nivan sat yavbꞌen ebꞌ chiꞌ syicꞌaꞌ.
38 Aꞌ Jehová chiꞌ tzꞌacꞌan svachꞌcꞌolal dꞌa ebꞌ, yuj chiꞌ sqꞌuibꞌ sbꞌisul ebꞌ. Max emta sbꞌisul nocꞌ smolbꞌetzal nocꞌ ebꞌ.
39 Tato tzꞌemta sbꞌisul ebꞌ, emnaquilal, ilcꞌolal yedꞌ yaelal sja dꞌa yibꞌan̈ ebꞌ yuj ebꞌ ajcꞌool.
40 Palta a ebꞌ nivac vinac ajcꞌool chiꞌ, a Jehová tzꞌacꞌan satbꞌat ebꞌ dꞌa tzꞌinan luum bꞌaj man̈xalaj bꞌe. Man̈xalaj tzꞌajcan yelcꞌoch ebꞌ.
41 An̈ejaꞌ tzꞌicꞌanel cuscꞌolal dꞌa ebꞌ mebꞌaꞌ, syicꞌanchaan̈ sbꞌisul yuninal ebꞌ icha val sqꞌuibꞌ sbꞌisul nocꞌ calnel.
42 Ayic syilan jun tic ebꞌ anima vachꞌ spensar, stzalaj scꞌol ebꞌ, axo ebꞌ anima chuc spensar jun, man̈xalaj tas syal ebꞌ.
43 A ebꞌ jelan, snaocabꞌ juntzan̈ tic ebꞌ. Nachajocabꞌel svachꞌcꞌolal Jehová yuj ebꞌ.