Scꞌanchaj scolval Dios yuj ebꞌ ajcꞌool
Sbꞌit jun tic vin̈aj David.
108
Ach in Diosal, te bꞌecan in cꞌool in bꞌitan dꞌayach. Dꞌa smasanil in cꞌool ol in bꞌitej vachꞌ lolonel dꞌayach yujto nivan elcꞌochi.2 Ayic sacbꞌiqꞌuinal tzin bꞌitan dꞌayach yedꞌ teꞌ arpa yedꞌ pax salterio.
3 Mamin Jehová, ol in bꞌitej vachꞌ lolonel dꞌayach dꞌa scal anima dꞌa juntzan̈xo nación.
4 A val a vachꞌcꞌolal te nivan, tzꞌecꞌbꞌat dꞌa yibꞌan̈ satchaan̈. Malaj bꞌaqꞌuin̈ max aqꞌuelcꞌoch tas tzalaꞌ.
5 Ach in Diosal, checlajocabꞌ a bꞌinajnaquil dꞌa satchaan̈. Checlajocabꞌ a poder dꞌa masanil yolyibꞌan̈qꞌuinal tic.
6 Colon̈el yedꞌ a poder. Tacꞌvej on̈ yic vachꞌ tzon̈ colchaj a on̈ xajanabꞌil on̈ tic uuj.
7 Ix loloncot Dios masanto dꞌa scajnubꞌ, ix yalan icha tic: Ol tzalaj in cꞌool ayic ol in cotac pojanbꞌat lum Siquem yedꞌ yacꞌlical lum Sucot.
8 Axo lum Galaad yedꞌ lum Manasés vic yaj luum. A Efraín icha in qꞌuen xumpil yaji. Axo Judá icha scꞌocochal vopisio yaji.
9 A Moab, icha yedꞌtal bꞌaj tzin bꞌic in bꞌa yaji. A dꞌa yibꞌan̈ Edom ol vacꞌcanbꞌat in xan̈abꞌ. Dꞌa tzalajcꞌolal ol in avajoc yujto ol can ebꞌ filisteo dꞌa yalan̈ vuuj, xchi Dios.
10 Ach in Diosal, ¿mach tzin icꞌanbꞌat dꞌa jun chon̈abꞌ ayoch smuroal dꞌa spatic yichan̈? ¿Mach tzin icꞌanbꞌat dꞌa Edom?
11 Ach co Diosal, ix on̈ a patiquejeli. Maxtzac yal-laj a cꞌol tzach bꞌat yedꞌ ebꞌ co soldado dꞌa oval.
12 Ochan̈ quedꞌoc, colon̈el dꞌa ebꞌ ayoch ajcꞌolal dꞌayon̈. A scolval ebꞌ quetanimail dꞌayon̈, malaj yalani.
13 Ach co Diosal, a yedꞌ a colval ol cacꞌ ganar oval. Aꞌ ach ol a tecꞌcanem ebꞌ ayoch ajcꞌolal dꞌayon̈.