Lesal yic scꞌanchaj scolval Dios
A jun bꞌit tic namami sbꞌitaji. Aton jun bꞌit tic yic vin̈aj David yic tzon̈ scꞌaybꞌej. Ix stzꞌibꞌej vin̈ ayic ix yacꞌan oval vin̈ yedꞌ ebꞌ sirio aj Naharaim yedꞌ ebꞌ aj Soba. Ix bꞌatpax vin̈aj Joab smilcham 12,000 ebꞌ soldado aj Edom dꞌa schꞌolanil bꞌaj ay atzꞌam atzꞌam. Sbꞌitej jun bꞌit tic vin̈ cuchbꞌum dꞌa bꞌit yedꞌ sjajil jun bꞌit scuchan, An̈ Xumaac.
60
Ach co Diosal yedꞌ val yoval a cꞌool ix on̈ actancani. Ix on̈ actejcani, on̈ acꞌji ganar. Mamin, acꞌxicot quip ticnaic.2 Ix acꞌ ibꞌxoc jun lum tic, ix jatcanbꞌat luum. A ticnaic, macxi sjatelal lum chiꞌ, yic mantzac ibꞌxilaj luum.
3 A on̈ a chon̈abꞌ on̈ tic, nivan yaelal ix acꞌ quilaꞌ. Ichato te nivan vino ix acꞌ dꞌayon̈, ix qꞌue dꞌa co jolom.
4 Ix acꞌ jun chꞌoxnabꞌil dꞌa ebꞌ nivan elcꞌoch dꞌa yichan̈ yic vachꞌ max yamchaj ebꞌ yuj sjul-labꞌ ebꞌ ajcꞌool.
5 Tacꞌvan̈ dꞌayon̈, colon̈eli, yujto masanil syal uuj. Colon̈canel a on̈ xajanabꞌil on̈ tic uuj.
6 Ix loloncot Dios masanto dꞌa scajnubꞌ, ix yalan icha tic: Ol tzalaj in cꞌool ayic ol in cotac pojanbꞌat lum Siquem yedꞌ yacꞌlical lum Sucot.
7 Axo lum Galaad yedꞌ lum Manasés vic yaj luum. A Efraín icha in qꞌuen xumpil yaji. Axo Judá icha scꞌocochal vopisio yaji.
8 A Moab, icha yedꞌtal bꞌaj tzin bꞌic in bꞌa yaji. A dꞌa yibꞌan̈ Edom ol vacꞌcanbꞌat in xan̈abꞌ. Dꞌa tzalajcꞌolal ol in avajoc yujto ol vacꞌ ganar ebꞌ filisteo, xchi Dios.
9 Ach in Diosal ¿mach tzin icꞌanbꞌat dꞌa jun chon̈abꞌ ayoch smuroal dꞌa spatic yichan̈? ¿Mach tzin icꞌanbꞌat dꞌa Edom?
10 Ach co Diosal, ix on̈ a patiquejeli. Maxtzac yal-laj a cꞌol tzach bꞌat yedꞌ ebꞌ co soldado dꞌa oval.
11 Ochan̈ quedꞌoc, colon̈el dꞌa ebꞌ ayoch ajcꞌolal dꞌayon̈. A scolval ebꞌ quetanimail dꞌayon̈, malaj yalani.
12 Ach co Diosal, a yedꞌ a colval ol cacꞌ ganar oval. A ach ol a tecꞌcanem ebꞌ ayoch ajcꞌolal dꞌayon̈.