A Jehová tzin colani
Aton jun bꞌit namami sbꞌitaji. Aton tic sbꞌit vin̈aj David ayic ix yacꞌanbꞌat ebꞌ soldado vin̈aj Saúl dꞌa spat vin̈ yic smiljicham vin̈. Sbꞌitej jun bꞌit tic vin̈ cuchbꞌum dꞌa bꞌit yedꞌ sjajil jun bꞌit scuchan Man̈ a Sateli.
59
Ach in Diosal, colinel dꞌa yol scꞌabꞌ ebꞌ ayoch ajcꞌolal dꞌayin. Colinel dꞌa ebꞌ scot dꞌayin yuj yajcꞌolal.2 Colinel dꞌa yol scꞌabꞌ ebꞌ scꞌulan chucal. Colinel dꞌa ebꞌ macꞌumcham anima.
3 Mamin Jehová, tzin smaclej ebꞌ anima te ov yic tzin smacꞌancham ebꞌ, palta man̈ yujoc in chucal, malaj tas ix vutej ebꞌ.
4 Mamin, malaj in mul dꞌa ebꞌ. Malaj tas chuc ix in cꞌulej. Palta snanonecꞌ scꞌol ebꞌ yacꞌan chucal dꞌayin. Mamin, il in coti, cotan̈, tzul in a colani.
5 Mamin Jehová, Yajal ach dꞌa smasanil, co Diosal ach a on̈ israel on̈ tic, cotan̈ elan̈chamel, tzacꞌanoch syaelal juntzan̈ nación. Mocabꞌ ocꞌ a cꞌool dꞌa ebꞌ smeltzajoch yacꞌan chucal dꞌayin.
6 Ayic sqꞌuicꞌbꞌi sjavi ebꞌ, tzꞌel yav ebꞌ icha nocꞌ tzꞌiꞌ, slajvi chiꞌ slaj ecꞌ ebꞌ dꞌa cal chon̈abꞌ.
7 Svoman stiꞌ ebꞌ tzꞌecꞌ ebꞌ, axo lolonel te ya syal ebꞌ. Malaj mach tzabꞌan calani, xchamlaj ebꞌ.
8 A achxo Mamin Jehová, tzaton ach tzevaj yuj ebꞌ. Tzach bꞌuchvaj dꞌa juntzan̈ nación chiꞌ.
9 Ach in Diosal, a dꞌayach ipan in colan in bꞌa, yujto a ach ay ach och vipumaloc yedꞌ ven̈uloc.
10 Ach in Diosal, xajan in uuj, a ach ol ul in a coloꞌ. Ol a chꞌox dꞌayin tas val ol aj scan ebꞌ vajcꞌol chiꞌ dꞌa yalan̈ uuj.
11 Ach Jehová co Columal, tzicubꞌtan̈ej ebꞌ yedꞌ a poder. Emnaquilocabꞌ tzutejcan ebꞌ, palta man̈ a macꞌchamlaj ebꞌ yic a syaelal ebꞌ chiꞌ man̈ ol bꞌatlaj satcꞌolal yuj ebꞌ vetchon̈abꞌ.
12 Tzꞌoch smul ebꞌ yuj masanil tas syalaꞌ. Canocabꞌ ebꞌ dꞌa yalan̈ yuj yacꞌumtaquil, yuj yesalvumal yedꞌ yuj scatabꞌvumal ebꞌ.
13 Satel ebꞌ yedꞌ yoval a cꞌool. ¿Tasto val yuj pitzan ebꞌ? Ach Dios Cajal a on̈ yin̈tilon̈can vin̈aj Jacob, elocabꞌ a pecal masanto bꞌaj slajvicꞌoch yolyibꞌan̈qꞌuinal tic.
14-15 Sjavi ebꞌ dꞌacꞌvalil, tzꞌel yav ebꞌ icha nocꞌ tzꞌiꞌ, slaj ecꞌ ebꞌ dꞌa cal chon̈abꞌ say svael, tzꞌavaj ebꞌ icha yocꞌ nocꞌ tzꞌiꞌ, yujto max yabꞌlaj scꞌool svael ebꞌ.
16 A in xo pax jun, ol ach in bꞌitej dꞌa qꞌuin̈ibꞌalil. Ol valel snivanil elcꞌochi yedꞌ a vachꞌcꞌolal dꞌa bꞌital, yujto ayachn̈ejoch ven̈uloc. In Columal ach dꞌa stiempoal yaelal.
17 Ach in Diosal, ol val vachꞌ lolonel dꞌayach dꞌa bꞌital. In Columal ach, in Diosal ach, xajanabꞌil in uuj.