Scꞌanji yoval scꞌol Dios dꞌa yibꞌan̈ ebꞌ chuc sbꞌeybꞌal
Aton jun bꞌit namami sbꞌitaji. Sbꞌit jun tic vin̈aj David. Sbꞌitej jun bꞌit tic vin̈ cuchbꞌum dꞌa bꞌit yedꞌ sjajil jun bꞌit scuchan Man̈ a Sateli.
58
A ex val juez ex tic, ¿tojol am val tzeyutej e chꞌolbꞌitan yaj junoc tasi? ¿Yel am val to dꞌa smojalil tze bꞌo yaj oval?2 Palta jun, chuc tzeyutej e bꞌoani. Cuchbꞌum ex dꞌa elcꞌal yedꞌ dꞌa macꞌval dꞌa yol chon̈abꞌ tic.
3 A ebꞌ scꞌulan chucal, atax manto alji ebꞌ, chuctaxon ebꞌ. Esalvumtaxon ebꞌ atax yic yaljinac ebꞌ.
4 Lajan ebꞌ yedꞌ nocꞌ chan ay svenenoal. Lajan ebꞌ yedꞌ nocꞌ ajavchan max abꞌanlaj.
5 Max yabꞌlaj sonal ebꞌ vin̈ mago nocꞌ, aton ebꞌ vin̈ jelan syal yacꞌan quistalax nocꞌ.
6 Mamin Jehová, ach in Diosal, iqꞌuel yip ebꞌ. Utejcan ebꞌ icha junoc nocꞌ choj macꞌbꞌilpoj yalan̈ stiꞌ.
7 Satocabꞌem ebꞌ icha tzꞌaj satem a aꞌ stobꞌbꞌati. Ayic sjulvaj ebꞌ, malajocabꞌ sn̈iꞌ teꞌ sjul-labꞌ ebꞌ chiꞌ.
8 Ulaxocabꞌbꞌat ebꞌ icha nocꞌ unin. Ichaocabꞌ junoc unin man̈ tzꞌacanoc yujal a tzꞌalji, max yil-laj saquilqꞌuinal, ichocabꞌ taꞌ tzꞌajcanbꞌat ebꞌ.
9 Icha teꞌ taquin̈ qꞌuiix, smolchajoch spayuloc lum chen, stup scꞌacꞌal teꞌ ayic manto xejqꞌue lum chen chiꞌ, ichocabꞌ taꞌ tzutej icꞌancanel ebꞌ chuc sbꞌeybꞌal chiꞌ, ayic pitzanto ebꞌ.
10 A ebꞌ scꞌanabꞌajan Dios, ol tzalaj ebꞌ ayic ol ecꞌ spac ebꞌ dꞌa ebꞌ chuc chiꞌ. Ol sbꞌon̈anbꞌat yoc ebꞌ dꞌa scal schiqꞌuil ebꞌ.
11 Yuj chiꞌ ol yal ebꞌ anima icha tic: Vachꞌ yic ebꞌ scꞌanabꞌajan slolonel Dios. Ayton jun Dios schꞌolbꞌitan ebꞌ cajan dꞌa yolyibꞌan̈qꞌuinal tic, xcham ebꞌ.