Lesal yic scꞌanji scolval Dios
Aton jun bꞌit namami sbꞌitaji. Sbꞌit jun tic vin̈aj David ayic ix scꞌubꞌanel sbꞌa vin̈ dꞌa vin̈aj Saúl dꞌa yol qꞌuen n̈aqꞌueen. Sbꞌitej jun bꞌit tic vin̈ cuchbꞌum dꞌa bꞌit yedꞌ sjajil jun bꞌit scuchan Man̈ a Sateli.
57
Ach in Diosal, ocꞌoc val a cꞌool dꞌayin, a dꞌayach tzin say in colnabꞌil. In gana tzin col in bꞌa dꞌayach icha tzꞌaj scolan sbꞌa nocꞌ yunetac caxlan̈ dꞌa yalan̈ scꞌaxil snun, masanto ol lajvoquecꞌ jun yaelal tic.2 Ach in Diosal te nivan elcꞌochi, tzin avaj dꞌayach, yujto a achn̈ej tzach colvajn̈ej vedꞌoc.
3 A yuj a vachꞌcꞌolal, yuj pax to tzꞌelcꞌoch tas tzalaꞌ, yuj chiꞌ masanto dꞌa satchaan̈ tzacꞌcot in colnabꞌil. Ol in a colel dꞌa yol scꞌabꞌ ebꞌ tzin ixtan chiꞌ.
4 Ichato dꞌa scal nocꞌ choj schiꞌan anima ayin eqꞌui. A qꞌuen ye ebꞌ lajan icha qꞌuen lanza yedꞌ teꞌ jul-labꞌ. A tas syal ebꞌ, lajan icha qꞌuen espada te jay ye.
5 Ach in Diosal, tzꞌecꞌbꞌat snivanil elcꞌoch dꞌa satchaan̈. A snivanil elcꞌoch chiꞌ, chequel dꞌa masanil yolyibꞌan̈qꞌuinal tic.
6 A ebꞌ ajcꞌol yajoch dꞌayin, ix yaqꞌuem in yaalil ebꞌ, man̈xo animaoc vaj yuj ebꞌ, ix sbꞌoan jun olan ebꞌ dꞌa yol in bꞌe, palta an̈ejaꞌ ebꞌ ix bꞌat dꞌa yool.
7 Ach in Diosal, bꞌecan in cꞌool, in gana tzach in bꞌitej yedꞌ vachꞌ lolonel.
8 Yuj chiꞌ ol vaqꞌuel in vayan̈, ol ach in bꞌitej yedꞌ teꞌ arpa yedꞌ salterio. Ayic van sacbꞌi, ol el in vayan̈, ol ach in bꞌitani.
9 Mamin, ol val vachꞌ lolonel dꞌayach dꞌa scal juntzan̈ chon̈abꞌ. Ol ach in bꞌitej dꞌa scal juntzan̈ nación.
10 Nivan ton a vachꞌcꞌolal, masanto dꞌa satchaan̈ scꞌochi. Tzꞌeln̈ejcꞌoch tas tzalaꞌ.
11 Ach in Diosal, tzꞌecꞌbꞌat snivanil elcꞌoch dꞌa satchaan̈. A snivanil elcꞌoch chiꞌ, chequel dꞌa masanil yolyibꞌan̈qꞌuinal tic.