A Dios svacꞌoch yipoc in cꞌool
Aton jun bꞌit namami sbꞌitaji. Sbꞌit jun tic vin̈aj David ayic ix yamchaj vin̈ yuj ebꞌ filisteo dꞌa chon̈abꞌ Gat. Sbꞌitej jun bꞌit tic vin̈ cuchbꞌum dꞌa bꞌit yedꞌ sjajil jun bꞌit scuchan nocꞌ cuvajteꞌ numan yaji.
56
Ach in Diosal, ocꞌoc val a cꞌool dꞌayin, ay ebꞌ anima tzin pechaneqꞌui. Ayn̈ejoch ebꞌ yacꞌan oval dꞌayin, man̈xo animaoc tzin ajcan yuj ebꞌ.2 A ebꞌ ajcꞌol dꞌayin, man̈xo jantacoc ebꞌ, max yactej ebꞌ in spechanbꞌeyecꞌoc. Yuj yacꞌumtaquil ebꞌ syacꞌ oval ebꞌ vedꞌoc.
3 Ayic tzin xivi, a ach tzach vacꞌoch yipoc in cꞌool.
4 Ach in Diosal, tzach vacꞌoch yipoc in cꞌool, svalan vachꞌ lolonel yuj tas albꞌilcan uuj. Tzach vacꞌoch yipoc in cꞌool, yuj chiꞌ max in xivlaj yuj tas sna ebꞌ anima in yutej.
5 Max yactej ebꞌ yalan lolonel te ya dꞌayin. An̈ej tas tzꞌaj in yixtan ebꞌ, a nabꞌil yuj ebꞌ.
6 Yalxon̈ej bꞌajtil scꞌubꞌejel sbꞌa ebꞌ yic tzin smaclani. Stan̈van ebꞌ janicꞌ ol in smilcham ebꞌ.
7 Ach in Diosal, acꞌcan juntzan̈ anima chiꞌ dꞌa yalan̈ yuj yoval a cꞌool. Man̈ a cha scol sbꞌa ebꞌ dꞌa yalan̈ yaelal yuj schucal chiꞌ.
8 Ojtac jantacxo sbꞌisul tzin eleqꞌui. Ojtac jantac yal in sat ix eli. Vojtac to tzꞌibꞌabꞌil juntzan̈ tic uuj.
9 A ebꞌ vajcꞌool, ol el ebꞌ ayic ol in cꞌanan a colval. A in tic vojtac val to ay ach och vedꞌoc.
10 Ach Jehová Dios, tzach vacꞌoch yipoc in cꞌool, svalan pax vachꞌ lolonel yuj tas albꞌilcan uuj.
11 Ach Dios, tzach vacꞌ val och yipoc in cꞌool, yuj chiꞌ max in xivlaj yuj tas sna ebꞌ anima in yutej.
12 Ach in Diosal, ol vacꞌ silabꞌ yic acꞌoj yuj diosal dꞌayach icha ix aj vacꞌan in tiꞌ dꞌayach.
13 Yujto ix in a col dꞌa chamel, ix in a colani yic maj in telvoc. Yuj chiꞌ tzin bꞌeyecꞌ dꞌa ichan̈ dꞌa jun saquilqꞌuinal tzacꞌ dꞌa ebꞌ pitzan.