A slesal jun vin̈ saychajeqꞌui
Ayic sbꞌitan jun bꞌit tic vin̈ cuchbꞌum yic bꞌit, a yamcꞌabꞌ ay schꞌan̈al scꞌanchaji. Sbꞌit jun tic vin̈aj David yic tzon̈ scꞌaybꞌani.
55
Ach in Diosal, abꞌ in lesal, man̈ a patiquejel tas tzin cꞌan dꞌayach.2 Cotan̈ qꞌuelan dꞌayin, tacꞌvan̈ dꞌayin in cꞌana. Dꞌa scal in yaelal sval in bꞌa dꞌayach.
3 Tzin ibꞌxiqꞌue yuj xivelal yuj ebꞌ chuc ayoch ajcꞌolal dꞌayin. Tzꞌel yav ebꞌ yuj yajcꞌolal. Te nivan in yaelal ix yacꞌcot ebꞌ dꞌa vibꞌan̈. Yedꞌ val yoval scꞌol ebꞌ tzin spechan bꞌeyecꞌ ebꞌ.
4 Syabꞌ val syail in pixan yuj ebꞌ. Toxo ix javi smay chamel dꞌa vibꞌan̈.
5 Ix javi jun nivan xivcꞌolal dꞌayin, van vibꞌxiqꞌue yuuj.
6 Tzin naani, comonoc ay in cꞌaxil icha nocꞌ uch, tzam in bꞌat jen̈en̈oc, tato icha chiꞌ juncꞌolal am tzin aji.
7 Tzam in bꞌat jen̈en̈oc dꞌa najat, a am laj dꞌa tzꞌinan luum tzin cajnaji.
8 Tzam in bꞌat in col in bꞌa yuj yoval junoc anima icha oval icꞌn̈abꞌ yaji, xin chi.
9 Mamin, satcanel ebꞌ chuc, jubꞌat tas syal ebꞌ. An̈ej oval svil dꞌa yol chon̈abꞌ tic, malaj jabꞌoc yoqꞌuelcꞌolal ebꞌ.
10 Cꞌual dꞌacꞌval yecꞌ ebꞌ yoymitej chon̈abꞌ dꞌa yibꞌan̈ muro. Ay val chucal dꞌa yol chon̈abꞌ yedꞌ naoj chaan̈ es. Ix te juviel chon̈abꞌ yuj ebꞌ.
11 Comonxon̈ej scꞌulej chucal ebꞌ dꞌa yoltac calle yedꞌ acꞌoj musansatil.
12 Tato a ebꞌ comon ajcꞌool tzin ixtani, tzam techajlaj vuuj. Tato a mach schichonoch scꞌol dꞌayin icha chiꞌ tzin utani, tzam in cꞌubꞌejel in bꞌa dꞌay.
13 Ocxo ticnaic, a mach vucꞌlev yaji, in vachꞌ cꞌol yaji, aꞌ tzin utan icha tic.
14 Junn̈ej ix bꞌat vedꞌ dꞌa stemplo Dios. Ix on̈ lolon dꞌa amigoal. Junn̈ej ix ecꞌ vedꞌ dꞌa scal ebꞌ anima dꞌa templo chiꞌ.
15 Jaocabꞌ jucnaj chamel dꞌa ebꞌ ajcꞌool yajoch dꞌayin. Pitzanocabꞌ ebꞌ tzꞌemcan ebꞌ bꞌaj smucjiem ebꞌ chamnac, yujto ay val och chucal dꞌa spensar ebꞌ yedꞌ dꞌa yol spat ebꞌ.
16 A in tic, a dꞌa Jehová Dios ol val in bꞌa. Aꞌ ol in colanoc.
17 Dꞌa qꞌuin̈ibꞌalil, dꞌa chimcꞌualil yedꞌ dꞌa yemcꞌualil, ol val in bꞌa dꞌay dꞌa scal yal in sat, axo ol abꞌan tas ol valaꞌ.
18 Aꞌ ol in colanel dꞌa scal oval. Man̈ ol in chajoclaj cham yuuj, vachꞌchom tzijtum ebꞌ ayoch ajcꞌolal dꞌayin.
19 A Dios Yajal dꞌa masanil tiempo, aꞌ ol abꞌan tas svalaꞌ, emnaquil ol ajcan ebꞌ ajcꞌol chiꞌ yuuj, yujto max sqꞌuexlaj jabꞌoc sbꞌeybꞌal ebꞌ, max xivpaxlaj ebꞌ dꞌay.
20 A vin̈ vucꞌlev chiꞌ, ix yicꞌchaan̈ scꞌabꞌ vin̈ dꞌayin, vachꞌchom in vachꞌ cꞌol in bꞌa yedꞌ vin̈. Max scꞌanabꞌajejlaj bꞌaj ix yacꞌ stiꞌ vin̈ yoch vamigooc.
21 Cꞌununi slolon vin̈, palta axo dꞌa spensar vin̈, an̈ej oval sgana vin̈. Te cꞌununi syutej vin̈ sloloni, palta icha qꞌuen espada te jay ye, icha chiꞌ yaj slolonel vin̈ chiꞌ.
22 Masanil tas tzin naꞌa, ol vacꞌbꞌat dꞌa yol scꞌabꞌ Jehová, aꞌ ol acꞌan in tecꞌanil. Tato cꞌanabꞌajum svutej in bꞌa dꞌay, malaj bꞌaqꞌuin̈ ol in scha telvoc.
23 Ach in Diosal, a ebꞌ macꞌumcham anima yedꞌ ebꞌ naumqꞌue es, tzapan ol aj sqꞌuinal ebꞌ, man̈ ol yil-laj nan̈albꞌoc sqꞌuinal ebꞌ. A ach ton ol acꞌbꞌat ebꞌ bꞌaj smucchaj ebꞌ chamnac. Palta a in tic, tzach vacꞌoch yipoc in cꞌool.