A dꞌa Dios sval in yaelal
Sbꞌit jun tic vin̈aj David. Sbꞌitej jun bꞌit tic vin̈ cuchbꞌum dꞌa bꞌit.
109
Ach in Diosal, sval vachꞌ lolonel dꞌayach, man̈ ach bꞌat mican dꞌa in lesal.2 Yujto a ebꞌ scꞌulan chucal yedꞌ ebꞌ tzꞌacꞌan musansatil anima, chuc syal ebꞌ dꞌa in patic. Esn̈ej tas syal ebꞌ chiꞌ dꞌa in patic.
3 A schichoncꞌolal ebꞌ ste oymaj dꞌa in patic. Tzꞌoch chiꞌan scꞌol ebꞌ dꞌayin, palta malaj in mul dꞌa ebꞌ.
4 A spac in vachꞌcꞌolal dꞌa ebꞌ, to tzꞌoch ebꞌ ajcꞌolal dꞌayin. A inxo jun, van in lesalvi yuj ebꞌ.
5 A in vachꞌ pensaril dꞌa ebꞌ, chuc syutej ebꞌ spactzitan dꞌayin. Axo spac in vachꞌcꞌolal dꞌa ebꞌ, to schichon scꞌol ebꞌ dꞌayin.
6 A junoc vin̈ chuc spensar tzacꞌoch juezal dꞌa yibꞌan̈ vin̈. Aocabꞌ junoc yajcꞌool vin̈ tzꞌacꞌancanbꞌat dꞌa yibꞌan̈.
7 Ayic schꞌolbꞌitaj vin̈, alchajocabꞌi to ay smul vin̈. Ochocabꞌ pax slesal vin̈ smuloc.
8 Tzapanocabꞌ tzutej sqꞌuinal vin̈. Chꞌococabꞌ pax mach tzꞌochcan dꞌa yopisio vin̈.
9 Mebꞌaꞌ uninocabꞌ tzꞌajcan ebꞌ yuninal vin̈. Axo ix yetbꞌeyum vin̈, canocabꞌ ix dꞌa man̈ etbꞌeyumal.
10 Ecꞌocabꞌ ebꞌ yuninal vin̈ scꞌan va sbꞌa dꞌa titac pat. Pechchajocabꞌel ebꞌ bꞌaj ecꞌnac spat.
11 Icꞌchajocabꞌ ecꞌ masanil tastac ay dꞌa ebꞌ yuj vin̈ tzꞌacꞌan tumin majanil. Icꞌchajocabꞌbꞌat smunlajel vin̈ yuj ebꞌ chꞌoc animail.
12 Malajocabꞌ mach tzꞌocꞌ scꞌool dꞌa vin̈. Malajocabꞌ pax mach tzꞌocꞌ scꞌol dꞌa ebꞌ yuninal vin̈ mebꞌaxo.
13 Satocabꞌel yin̈tilal vin̈, satocabꞌel sbꞌi vin̈ dꞌa juneln̈ej.
14 Mamin Jehová, nacot smul ebꞌ smam yicham vin̈. Mocabꞌ a suc sat smul snun vin̈.
15 Naanocabꞌ smul ebꞌ uuj. Mocxobꞌ nachajcot ebꞌ dꞌa sat luum tic.
16 Yujto man̈ naanoc yacꞌan vachꞌcꞌolal vin̈. Palta to ix och vin̈ ajcꞌolal dꞌa ebꞌ mebꞌaꞌ, dꞌa ebꞌ anima emnaquil yeqꞌui yedꞌ dꞌa ebꞌ ayoch dꞌa ilcꞌolal, masanto smilcham ebꞌ vin̈.
17 Scatabꞌej anima vin̈, cotocabꞌ catabꞌ dꞌa yibꞌan̈ vin̈. Malajocabꞌ bꞌaqꞌuin̈ scha vachꞌcꞌolal vin̈ yujto maj yacꞌlaj svachꞌcꞌolal vin̈ dꞌa ebꞌ anima chiꞌ.
18 Axon̈ej catabꞌ syal vin̈, ichato a catabꞌ chiꞌ spichul vin̈ yaji. A catabꞌ chiꞌ, icha aꞌ siquil aꞌ scuqꞌuej, ma icha aceite sco suquecꞌ dꞌayon̈, icha chiꞌ yaj dꞌa vin̈.
19 Cotocabꞌ yaelal dꞌa yibꞌan̈ snivanil vin̈ yuj scatabꞌan ebꞌ anima chiꞌ, icha smuschaj co nivanil yedꞌ co pichul. Ochocabꞌcan sudꞌan yaelal chiꞌ dꞌa vin̈ dꞌa masanil tiempo icha junoc tzecꞌul.
20 Mamin Jehová, ichaocabꞌ tic tzutej ebꞌ ayoch ajcꞌolal dꞌayin, aton ebꞌ tzꞌalan in pecal.
21 A achxo pax ach Jehová Vajalil, acꞌcot a vachꞌcꞌolal dꞌa vibꞌan̈ yic ol ach icꞌjocchaan̈. Yuj a vachꞌcꞌolal dꞌayin, colineli.
22 Te mebꞌaꞌ in, man̈xo animaoc vedꞌnac svutej vabꞌani, icha val to lajvinac in svabꞌi.
23 Van in satel icha junoc en̈ul. Van vicꞌjibꞌat yuj icꞌ ichoc nocꞌ cꞌulubꞌ.
24 Van yibꞌxi sjolom in penec, man̈xalaj vip yujto maxtzac in valaj. Van in bꞌacbꞌi.
25 Tzebꞌajtac vilji dꞌa ebꞌ anima. Ayic tzin yilan ebꞌ, sbꞌuchvaj ebꞌ dꞌayin.
26 Mamin Jehová, ochan̈ vedꞌoc. Ach in Diosal, colinel yuj a vachꞌcꞌolal.
27 Mamin Jehová, yojtaquejocabꞌel ebꞌ anima to a ach ix in utej icha tic.
28 Malaj yelcꞌoch in scatabꞌan ebꞌ tato a ach tzacꞌcot a vachꞌcꞌolal dꞌayin. Qꞌuixvocabꞌ ebꞌ yacbꞌan van stzalaj in cꞌol a in a checabꞌ in tic.
29 A ebꞌ tzꞌalan in pecal, chamocabꞌ ebꞌ yuj qꞌuixvelal. Toxon̈ejocabꞌ sat scꞌol ebꞌ yuj qꞌuixvelal.
30 Mamin Jehová, ol vacꞌ yuj diosal dꞌayach dꞌa masanil tiempo. Dꞌa scal tzijtumal anima ol val vachꞌ lolonel dꞌayach ach in Diosal,
31 yujto Yalumal ebꞌ mebꞌaꞌ aji. A ach tza colel ebꞌ dꞌa yol scꞌabꞌ ebꞌ sgana yacꞌanoch chamel dꞌa yibꞌan̈ ebꞌ.