Squicꞌchaan̈ sbꞌi Jehová dꞌa bꞌital
96
Aocabꞌ junoc acꞌ bꞌit sco bꞌitej dꞌa Jehová. Con̈ bꞌitanec dꞌay co masanil cajan on̈ dꞌa yolyibꞌan̈qꞌuinal tic.2 Con̈ bꞌitanec dꞌa Jehová, calec vachꞌ lolonel dꞌay. Junjun cꞌu scalanec el co colnabꞌil syacꞌaꞌ.
3 Calequel yabꞌixal sbꞌinajnaquil yedꞌ tas satubꞌtac ix scꞌulej. Calequel dꞌa smasanil chon̈abꞌ yedꞌ dꞌa junjun nación.
4 Yujto nivan yelcꞌoch Jehová, smoj tzꞌalchaj vachꞌ lolonel dꞌay. Yelxo val te ay smay dꞌa yichan̈ masanil ebꞌ dios.
5 Axo pax sdiosal juntzan̈xo chꞌoc chon̈abꞌil jun, malaj yalani yujto yecheln̈ej yaji. Palta axo pax Jehová, aꞌ bꞌoannac satchaan̈.
6 Te nivan yelcꞌochi, te ay pax spoder. Scheclaj spoder yedꞌ svachꞌil yilji dꞌa scajnubꞌ.
7 Ex anima dꞌa juntzan̈ chon̈abꞌ, alec vachꞌ lolonel dꞌa Jehová yujto te nivan yelcꞌochi, te ay pax spoder.
8 Alec vachꞌ lolonel dꞌay icha val smojal. Ochan̈ec yedꞌ e silabꞌ dꞌa yamaqꞌuil stemplo.
9 Aqꞌuequem e bꞌa dꞌa Jehová dꞌa scajnubꞌ vachꞌ yilji. E masanil ex anima, ayocabꞌ e xivcꞌolal dꞌa yichan̈.
10 Alec dꞌa juntzan̈xo nación to a Jehová Rey toni. Tzatz ix yutej em cꞌojan yolyibꞌan̈qꞌuinal tic, yuj chiꞌ max ibꞌxilaj. Junlajann̈ej syutej schꞌolbꞌitan juntzan̈ chon̈abꞌ.
11 Tzalajocabꞌ satchaan̈ yedꞌ lum luum tic. Elocabꞌ yav aꞌ mar yedꞌ masanil tas ay dꞌa yol aꞌ.
12 Ayocabꞌ tzalajcꞌolal dꞌa scal lum jacbꞌen yedꞌ masanil tastac ay dꞌay. Elocabꞌ yav masanil teꞌ nivac teꞌ dꞌa tzalajcꞌolal,
13 yujto van sjavi Jehová. Tic val sjavi. Ol ul yacꞌan Yajalil dꞌa yolyibꞌan̈qꞌuinal tic. Ol schꞌolbꞌitan dꞌa vachꞌil yedꞌ dꞌa stojolal.