A Jehová Rey toni
97
Tzalajocabꞌ masanil lum luum tic yedꞌ masanil chon̈abꞌ dꞌa stitac aꞌ mar, yujto a Jehová Rey toni.2 Oyanoch qꞌuicꞌal asun dꞌa spatic yichan̈. Te tecꞌan yaj yopisio yujto tojol syutej schꞌolbꞌitani.
3 Van sbꞌat jun cꞌacꞌ dꞌa yichan̈, ol tzꞌabꞌat ebꞌ ayoch ajcꞌolal dꞌay.
4 Sacbꞌi yolyibꞌan̈qꞌuinal tic yuj cꞌacꞌ tzꞌecꞌ copnaj yuuj, tzꞌibꞌxi lum luum a tzꞌeqꞌui.
5 Tzꞌulaxbꞌat lum nivac vitz icha nocꞌ chaqꞌuibꞌ dꞌa yichan̈ Jehová Yajal dꞌa Smasanil yolyibꞌan̈qꞌuinal tic.
6 A satchaan̈ schꞌoxanel stojolal, axo ebꞌ chon̈abꞌ, syil stziquiquial ebꞌ.
7 Ol qꞌuixvoccan ebꞌ syaqꞌuem sbꞌa dꞌa juntzan̈ comon dios, ebꞌ syicꞌchaan̈ sbꞌa yedꞌ juntzan̈ yechel chiꞌ, yujto masanil juntzan̈ dios chiꞌ ol yaqꞌuem sbꞌa dꞌa yichan̈ Jehová.
8 Mamin Jehová, a yabꞌixal tas ix utej acꞌan syaelal ebꞌ ajcꞌool, ol yabꞌ ebꞌ aj Sion yedꞌ juntzan̈xo chon̈abꞌ dꞌa yol yic Judá, yuj chiꞌ ol tzalaj ebꞌ.
9 Mamin Jehová, Yajal ach dꞌa yibꞌan̈ masanil yolyibꞌan̈qꞌuinal tic. Ecꞌal ach dꞌa yibꞌan̈ masanil comon dios.
10 A ex mach ex tze xajanej Jehová, chaquec el chucal. Yujto a ebꞌ scꞌanabꞌajani, tan̈vabꞌil ebꞌ yuuj. Scolji ebꞌ yuuj dꞌa yol scꞌabꞌ ebꞌ scꞌulan chucal.
11 Tzꞌacꞌji saquilqꞌuinal dꞌa ebꞌ anima vachꞌ spensar yuuj, syacꞌan tzalajcꞌolal dꞌa ebꞌ tojol sbꞌeybꞌal.
12 E masanil ex anima to vachꞌ e pensar, tzalajan̈ec yuj tas vachꞌ ix scꞌulej Jehová. Alec vachꞌ lolonel dꞌay.