2 Ix schꞌoxel scolval Jehová, ix schꞌoxan yil juntzan̈ nivac nación to tojol syutej spactzitan dꞌa ebꞌ ajcꞌol yajoch dꞌay.

3 Ix eln̈ejcꞌoch tas ix yal dꞌayon̈ a on̈ schon̈abꞌ Israel on̈ tic. Ix yacꞌcot svachꞌcꞌolal dꞌayon̈. Masanto dꞌa slajvubꞌ yolyibꞌan̈qꞌuinal tic ix ilchaji to ix on̈ colchaj yuj co Diosal.

4 Ex cajan ex dꞌa masanil sat luum tic, bꞌitanan̈ec dꞌa Jehová dꞌa tzalajcꞌolal. Aqꞌuec eyip e bꞌitan dꞌay dꞌa tzalajcꞌolal.

5 Bꞌitejec bꞌit dꞌa Jehová yedꞌ teꞌ arpa yedꞌ teꞌ ay schꞌan̈al.

6 Bꞌitanan̈ec dꞌa Jehová co Reyal dꞌa tzalajcꞌolal. Bꞌitanan̈ec, tze puꞌan qꞌuen trompeta, tze puꞌanpax nocꞌ chꞌaac.

7 Bꞌitanocabꞌ aꞌ mar yedꞌ masanil nocꞌ nocꞌ ay dꞌa yol aꞌ. Bꞌitanocabꞌpax yolyibꞌan̈qꞌuinal tic yedꞌ ebꞌ cajan dꞌay.

8 Cꞌan̈ocabꞌ aꞌ nivac aꞌ yuj tzalajcꞌolal. Junlajanocabꞌ tzꞌaj yavaj lum nivac vitz dꞌa tzalajcꞌolal dꞌa yichan̈ Jehová,

9 yujto ol javoc, ol ul yacꞌan Yajalil dꞌa yolyibꞌan̈qꞌuinal tic. Aꞌ ol acꞌan Yajalil, junlajan ol yutoc schꞌolbꞌitan juntzan̈ chon̈abꞌ dꞌa stojolal.