2 Nivan ton yelcꞌoch Jehová dꞌa tzalan Sion. Aꞌ ay yopisio dꞌa yibꞌan̈ masanil chon̈abꞌ.

3 Alchajocabꞌ vachꞌ lolonel dꞌay, yujto nivan ton yelcꞌochi, te ay smay, Axon̈ej Ochi.

4 Mamin, a ach tic Rey ach toni, masanil syal uuj, tza xajanej tojolal. A ach a bꞌonaccani to lajann̈ej tzꞌaj schꞌolbꞌitaj junjun anima. A dꞌayon̈ yin̈tilal on̈ can vin̈aj Jacob tic ix acꞌ tojolal yedꞌ vachꞌilal.

5 Ex vetchon̈abꞌ, quiqꞌuecchaan̈ sbꞌi Jehová co Diosal. Con̈ emec cuman dꞌa yichan̈ yujto Axon̈ej Ochi.

6 A vin̈aj Moisés yedꞌ vin̈aj Aarón, ecꞌnac ebꞌ vin̈ dꞌa scal ebꞌ sacerdote Dios chiꞌ. A vin̈aj Samuel ecꞌnac vin̈ dꞌa scal ebꞌ lesalvinac dꞌa Jehová. Ix tacꞌvi dꞌa ebꞌ ayic ix scꞌanan scolval ebꞌ.

7 Dꞌa scal jun topan̈ asun ix lolon Dios yedꞌ ebꞌ. A scꞌaybꞌubꞌal yedꞌ schecnabꞌil ix yacꞌ dꞌa ebꞌ, ix scꞌanabꞌajej ebꞌ.

8 Mamin Jehová co Diosal, ix ach tacꞌvi dꞌa a chon̈abꞌ. Ix acꞌ nivancꞌolal smul ebꞌ, palta ix acꞌ pax syaelal ebꞌ yuj schucal.

9 Ex vetchon̈abꞌ, quiqꞌuecchaan̈ sbꞌi Jehová co Diosal. Con̈ emec cuman dꞌa yichan̈ dꞌa tzalan yic ejmelal, yujto a Jehová co Diosal chiꞌ Axon̈ej Ochi.