Con̈ bꞌitanec dꞌa Jehová dꞌa tzalajcꞌolal
95
Cotan̈ec, con̈ bꞌitanec dꞌa Jehová dꞌa tzalajcꞌolal. Con̈ bꞌitanec dꞌa co Columal.2 Ochocon̈ec dꞌa yichan̈ dꞌa acꞌoj yuj diosal. Con̈ bꞌitanec dꞌay, yujto te nivan yelcꞌochi.
3 Yujto a Jehová te nivan yelcꞌochi. Aton Rey yaj dꞌa yibꞌan̈ smasanil ebꞌ dios.
4 Dꞌa yol scꞌabꞌ ay juntzan̈ xabꞌ olan dꞌa yich lum luum tic. Aꞌ ay yic juntzan̈ vitz te chaan̈ yajqꞌuei.
5 Aꞌ ay yic aꞌ mar, aꞌ bꞌojinac aꞌ. Aꞌ bꞌoannacpax lum luum tic.
6 Cotan̈ec, caqꞌuequem co bꞌa dꞌa Jehová, con̈ emec cuman dꞌa yichan̈. Aꞌ dꞌay tzon̈ emec cuman yujto aꞌ ix on̈ bꞌoani.
7 Aton co Diosal, a on̈xo tic, schon̈abꞌ on̈. Icha scalnel caji, yuj chiꞌ tan̈vabꞌil on̈ yuuj.
Syal Dios icha tic: Tato tzeyabꞌ tas sval ticnaic,
8 man̈ e pitej e bꞌa icha yutejnac sbꞌa ebꞌ e mam eyicham dꞌa Meriba. Man̈ eyutej e bꞌa icha yutejnac pax sbꞌa ebꞌ dꞌa Masah dꞌa taquin̈ luum.
9 Aton taꞌ yacꞌnac in proval ebꞌ e mam eyicham chiꞌ, vachꞌchom yilnac ebꞌ juntzan̈ tas satubꞌtac in bꞌonac.
10 40 abꞌil te ov vutejnac in bꞌa dꞌa ebꞌ, valannac icha tic: A juntzan̈ anima tic, chꞌocn̈ej bꞌaj ayoch spensar ebꞌ, max nachajel-laj yuj ebꞌ tas tzin nibꞌej sbꞌeybꞌalej ebꞌ, xin chi.
11 Yuj chiꞌ yedꞌ val yoval in cꞌool, vacꞌnac in tiꞌ to max ochlaj ebꞌ dꞌa lum luum bꞌaj ijan vacꞌnac yicꞌ yip ebꞌ, xchi Dios.