A Jehová Juez yaji
94
Mamin Jehová, chꞌoxel a bꞌa to Dios ach, to tza pactzitej tas malaj svachꞌil.2 Ach Sjuezal yolyibꞌan̈qꞌuinal tic, cotan̈, pactzitej dꞌa smojal dꞌa ebꞌ syicꞌchaan̈ sbꞌa.
3 Mamin Jehová, ¿jantacto val tiempo ol tzalajn̈ej ebꞌ scꞌulan chucal?
4 Masanil ebꞌ chuc chiꞌ, acꞌumtac syutej sbꞌa ebꞌ, syicꞌchaan̈ sbꞌa ebꞌ yedꞌ schucal chiꞌ.
5 Ay, Mamin Jehová, syixtejbꞌat a chon̈abꞌ ebꞌ. Man̈xa tas syal ebꞌ a chon̈abꞌ chiꞌ yuj ebꞌ.
6 Smiljicham ebꞌ ix chamnacxo yetbꞌeyum yuj ebꞌ. Smilpaxcham ebꞌ chꞌoc chon̈abꞌil ebꞌ yedꞌ pax ebꞌ unin man̈xalaj smam.
7 Syalan ebꞌ icha tic: Max yil-laj Jehová sDiosal vin̈aj Jacob tas sco cꞌulej tic. Man̈ yojtacocpaxlaj, xchi ebꞌ.
8 Ex anima te pit, ex malaj jabꞌoc e pensar, abꞌec, ¿bꞌaqꞌuin̈ ol nachajel eyuuj?
9 A Dios ix bꞌoan co chiquin, ¿tocval max yabꞌi tas tzꞌalchaji? Aꞌ ix bꞌoan yol co sat, ¿tocval max yilaꞌ tas tze cꞌulej chiꞌ?
10 Aꞌ tzꞌacꞌan syaelal juntzan̈ nivac nación, ¿tom man̈ ol yacꞌ eyaelal? Aꞌ tzꞌacꞌan sjelanil co pensar a on̈ anima on̈ tic, ¿tocval man̈ yojtacoc tas tze cꞌulej chiꞌ?
11 A Jehová yojtac to malaj yelcꞌoch tas sco naꞌ a on̈ anima on̈ tic.
12 Mamin Jehová, te vachꞌ yic mach tzacꞌ scachnabꞌil. Tzacꞌan pax a cꞌaybꞌubꞌal dꞌay,
13 yic vachꞌ malaj tas snaꞌa ayic sjavi yaelal, yacbꞌan stan̈vej sbꞌoji olan bꞌaj tzꞌemcan ebꞌ scꞌulan chucal.
14 Mamin Jehová, man̈ ol on̈ a patiquejcanel-laj a on̈ a chon̈abꞌ on̈ tic. Man̈ ol on̈ actejcanlaj co chꞌocoj.
15 Yuj chiꞌ, a ebꞌ yajal, a tojolal ol sbꞌeybꞌalej ebꞌ. Axo ebꞌ anima vachꞌ spensar, ol yacꞌoch ebꞌ yajal chiꞌ ebꞌ yipoc scꞌool.
16 Mamin ¿mach tzin colan dꞌa yol scꞌabꞌ ebꞌ ixtum anima yedꞌ ebꞌ scꞌulan tas malaj svachꞌil?
17 Mamin Jehová, tato man̈oc ach tzin a coloꞌ, ayin xom ecꞌ bꞌaj numan yaj ebꞌ chamnac.
18 Mamin Jehová, ayic ix in naani to vanxo in telvi, axo val a vachꞌcꞌolal ix in yamanoch vaan.
19 Ayic man̈ jantacoc tas tzin naꞌa, tzacꞌ in tzalajcꞌolal, tza nivanan in cꞌool.
20 Mamin, malaj a gana to vachꞌ acꞌan yedꞌ ebꞌ juez chuc syutej yilan yopisio, to man̈ ichaoc yalan a ley syutej ebꞌ sbꞌoan yaj junoc tas.
21 A ebꞌ malaj smul syixtej ebꞌ. Syacꞌanoch chamel ebꞌ dꞌa yibꞌan̈ ebꞌ vachꞌ sbꞌeybꞌal.
22 A on̈xo Mamin Jehová, a ach ayach och co colnabꞌiloc. Ach co Diosal, icha quen̈ul aji.
23 A ach ol a pactzitej schucal ebꞌ chuc. Ol satel ebꞌ yuj smul. Ach co Diosal, ol acꞌcan lajvoquel ebꞌ.