A tas ix sbꞌo vin̈aj rey David dꞌa Jerusalén
14
A vin̈aj Hiram sreyal Tiro, ix yacꞌcot schecabꞌ vin̈ dꞌa vin̈aj rey David. Ix yacꞌanpaxcot ebꞌ albañil vin̈ yedꞌ ebꞌ n̈icum teꞌ, ix yicꞌancot teꞌ cꞌuteꞌ ebꞌ yic sbꞌochaj spalacio vin̈aj rey David chiꞌ. 2 Yuj chiꞌ ix nachajel yuj vin̈aj rey David chiꞌ to a Jehová ix acꞌanoch vin̈ reyal dꞌa chon̈abꞌ Israel. Ix icꞌjichaan̈ yopisio vin̈ yuj Jehová yujto xajan chon̈abꞌ Israel yuuj.Juntzan̈xo ebꞌ vin̈ yuninal vin̈aj rey David
3 Ay juntzan̈xo ebꞌ ix yetbꞌeyum vin̈aj rey David ix yicꞌ dꞌa Jerusalén, yuj chiꞌ ayto yuninal vin̈ yedꞌ yisil ix alji yedꞌ ebꞌ ix. 4 A ebꞌ vin̈ yuninal vin̈ ix alji dꞌa Jerusalén chiꞌ, aton vin̈aj Samúa, vin̈aj Sobab, vin̈aj Natán, vin̈aj Salomón, 5 vin̈aj Ibhar, vin̈aj Elisúa, vin̈aj Elpelet, 6 vin̈aj Noga, vin̈aj Nefeg, vin̈aj Jafía, 7 vin̈aj Elisama, vin̈aj Beeliada yedꞌ vin̈aj Elifelet.
Ix acꞌji ganar ebꞌ filisteo yuj vin̈aj rey David
8 Ayic ix yabꞌan ebꞌ filisteo to toxo ix och vin̈aj David sreyaloc masanil ebꞌ israel, ix och ijan ebꞌ sayan tas tzꞌaj yacꞌan ganar, palta elan̈chamel ix yabꞌ vin̈, ix elta vin̈ dꞌa yichan̈ ebꞌ chiꞌ. 9 Ix javi ebꞌ filisteo chiꞌ yacꞌ chucal dꞌa ebꞌ anima cajan dꞌa schꞌolanil Refaim. 10 Yuj chiꞌ ix scꞌanbꞌej vin̈aj rey David dꞌa Dios icha tic:
—¿Tzam yal vacꞌan oval yedꞌ ebꞌ filisteo tic? ¿Ol am acꞌoch ebꞌ dꞌa yol in cꞌabꞌ? xchi vin̈.
Ix tacꞌvi Jehová dꞌa vin̈:
—Acꞌ oval yedꞌ ebꞌ, yujto ol vacꞌoch ebꞌ dꞌa yol a cꞌabꞌ, xchi.
11 Yuj chiꞌ ix qꞌue vin̈aj rey David bꞌaj ayecꞌ ebꞌ filisteo chiꞌ. Ataꞌ ix acꞌji ganar ebꞌ yuj vin̈. Ix yalan vin̈ icha tic: Icha val tzꞌaj sjacan sbꞌe junoc aꞌ elumaꞌ, icha chiꞌ ix aj sjacan bꞌe Jehová dꞌayin dꞌa scal ebꞌ vajcꞌool, xchi vin̈. Yuj chiꞌ Baal-perazim ix yacꞌ vin̈ sbꞌiej jun lugar chiꞌ.* 12 Ix yactejcan juntzan̈ sdiosal ebꞌ filisteo chiꞌ, yuj chiꞌ ix schec vin̈aj rey David chiꞌ n̈usjoctzꞌaoc.
13 Palta a ebꞌ filisteo chiꞌ, ix jaxxi ebꞌ dꞌa schꞌolanil yic Refaim chiꞌ. 14 Yuj chiꞌ, ix scꞌanbꞌejxi vin̈aj rey David chiꞌ dꞌa Dios, ix yalan Dios dꞌa vin̈ icha tic:
—A ticnaic, man̈ ach och dꞌa sat ebꞌ acꞌan oval, palta to a dꞌa spatic ebꞌ tzach coti, bꞌaj ay teꞌ bálsamo. 15 Ayic ol abꞌani ichato ay mach van sbꞌeyecꞌ dꞌa scꞌabꞌtac te teꞌ chiꞌ, tzach och acꞌ oval yedꞌ ebꞌ. A jun chiꞌ syalelcꞌochi to a in ol in bꞌabꞌlaj dꞌa eyichan̈ yic tzin milancham ebꞌ soldado filisteo chiꞌ, xchi Jehová.
16 Icha ix aj yalan Dios, icha val chiꞌ ix yutej vin̈aj David chiꞌ, yuj chiꞌ ix satel ebꞌ soldado filisteo chiꞌ, ix bꞌatn̈ej dꞌa Gabaón masanto ix cꞌoch dꞌa Gezer. 17 Icha val chiꞌ ix aj sqꞌuechaan̈ sbꞌinajnaquil vin̈aj rey David dꞌa masanil nación. A Jehová ix acꞌan xivqꞌue masanil nación chiꞌ dꞌa vin̈.