Sna vin̈aj rey David yicꞌancot teꞌ scaxail strato Jehová
13
Ix lolon vin̈aj rey David yedꞌ masanil ebꞌ vin̈ yajal yaj dꞌa junjun n̈ilan̈ ebꞌ vin̈ soldado. 2 Ix lajvi chiꞌ ix yalan vin̈ dꞌa masanil ebꞌ yetisraelal icha tic: Ex vetisraelal, tato scha e cꞌool, schaanpax scꞌol Jehová co Diosal, scavtej ebꞌ quetisraelal ay dꞌa yol co macbꞌen tic, ebꞌ aytocan dꞌa juntzan̈xo lugar. Scavtej pax masanil ebꞌ sacerdote yedꞌ juntzan̈xo ebꞌ levita ayecꞌ dꞌa schon̈abꞌ yedꞌ dꞌa slum bꞌaj sva nocꞌ smolbꞌetzal nocꞌ ebꞌ, 3 yic vachꞌ bꞌat quicꞌcot teꞌ scaxail strato co Diosal. Yujto atax dꞌa stiempoal vin̈aj Saúl ix bꞌatcan teꞌ satcꞌolal cuuj, xchi vin̈aj David chiꞌ. 4 Masanil ebꞌ chon̈abꞌ, ix cha scꞌol ebꞌ to icha chiꞌ tzꞌaji, yujto vachꞌ jun pensar chiꞌ ix yabꞌ ebꞌ.Ix icꞌjicot teꞌ scaxail strato Jehová
5 Ix smolbꞌej masanil ebꞌ yetisraelal vin̈aj rey David dꞌa yol masanil smacbꞌen, scotn̈ej dꞌa aꞌ Sihor dꞌa smojonal Egipto, masanto bꞌaj tzon̈ cꞌoch dꞌa chon̈abꞌ Amat, yic sbꞌat icꞌchajcot teꞌ scaxail strato Dios dꞌa Quiriat-jearim, 6 scuchanpax Baala dꞌa yol yic Judá. Ix bꞌat yicꞌcot teꞌ scaxail strato Jehová Dios chiꞌ ebꞌ taꞌ, aton Dios ay dꞌa yibꞌan̈ ebꞌ querubín bꞌaj tzꞌicꞌchajchaan̈ sbꞌi. 7 Ix yiqꞌuelta teꞌ scaxail strato Dios chiꞌ ebꞌ dꞌa spat vin̈aj Abinadab, ix yacꞌanqꞌue teꞌ ebꞌ dꞌa yibꞌan̈ jun teꞌ acꞌ carreta. Axo vin̈aj Uza yedꞌ vin̈aj Ahío, ix cuchbꞌan bꞌey teꞌ carreta chiꞌ. 8 Axo vin̈aj rey David yedꞌ masanil ebꞌ yetisraelal, ste tzalaj val ebꞌ dꞌa yichan̈ Dios. Yedꞌ val smasanil yip ebꞌ sqꞌue cheneljoc, sbꞌitan ebꞌ yedꞌ arpa, salterio, panderas, platillo yedꞌ trompeta. 9 Palta ayic ix javi ebꞌ dꞌa stecꞌlabꞌ trigo vin̈aj Quidón, a vin̈aj Uza chiꞌ ix bꞌat yubꞌnaj vin̈ dꞌa teꞌ scaxail trato chiꞌ, yujto ijan ix telvi nocꞌ vacax tocꞌjinac teꞌ carreta chiꞌ. 10 Yuj chiꞌ ix cot yoval Jehová dꞌa vin̈, ix chamcan vin̈ taꞌ yuuj, yujto ix bꞌat yubꞌnaj vin̈ dꞌa teꞌ scaxail trato chiꞌ.
11 Ix cot yoval vin̈aj rey David chiꞌ, yujto ix cot yoval scꞌol Jehová dꞌa vin̈aj Uza chiꞌ, ix cham vin̈ yuuj. Yuj chiꞌ Pérez-uza ix sbꞌiejn̈ejcan jun lugar chiꞌ.* 12 A dꞌa jun cꞌu chiꞌ ix te xiv vin̈aj rey David dꞌa Dios, ix yalan vin̈ icha tic: Tecan man̈xo ol yal-laj vicꞌanbꞌat teꞌ scaxail strato Dios bꞌaj cajan in, xchi vin̈. 13 Majxo yicꞌcot teꞌ vin̈ bꞌaj cajan chiꞌ, an̈ej to ix yal vin̈ to scan teꞌ dꞌa spat vin̈aj Obed-edom aj Gat. 14 A teꞌ scaxail strato Jehová chiꞌ, oxeꞌ ujal ix can teꞌ dꞌa spat vin̈aj Obed-edom chiꞌ. Ix yacꞌ val svachꞌcꞌolal Jehová dꞌa yibꞌan̈ vin̈ yedꞌ yetbꞌeyum yedꞌ yalyuninal yedꞌ dꞌa yibꞌan̈ masanil tas ay dꞌa vin̈.