A dꞌa scal ebꞌ vin̈ chiꞌ ay ebꞌ vin̈ ayto yuj sbꞌa yedꞌ vin̈aj Saúl dꞌa yin̈tilal Benjamín. Aton ebꞌ vin̈ tic: 3 A vin̈aj Ahiezer sat yajal yaj vin̈ yedꞌ vin̈aj Joás yucꞌtac vin̈, yuninal ebꞌ vin̈ vin̈aj Semaa aj chon̈abꞌ Gabaa, vin̈aj Jeziel yedꞌ vin̈aj Pelet, ebꞌ vin̈ yuninal vin̈aj Azmavet, vin̈aj Beraca yedꞌ vin̈aj Jehú aj chon̈abꞌ Anatot ebꞌ vin̈, 4 vin̈aj Ismaías aj Gabaón. A jun vin̈ tic ayoch vin̈ stzꞌacubꞌoc ebꞌ vin̈ 30 bꞌinajnac, yajal yaj pax vin̈ dꞌa ebꞌ vin̈, vin̈aj Jeremías, vin̈aj Jahaziel, vin̈aj Johanán, vin̈aj Jozabad aj Gedera, 5 vin̈aj Eluzai, vin̈aj Jerimot, vin̈aj Bealías, vin̈aj Semarías, vin̈aj Sefatías aj chon̈abꞌ Haruf, 6 vin̈aj Elcana, vin̈aj Isías, vin̈aj Azareel, vin̈aj Joezer yedꞌ vin̈aj Jasobeam, yin̈tilal ebꞌ vin̈ vin̈aj Coré, 7 vin̈aj Joela yedꞌ vin̈aj Zebadías ebꞌ vin̈ yuninal vin̈aj Jeroham aj chon̈abꞌ Gedor.

8 Ay pax juntzan̈ ebꞌ vin̈ yin̈tilal Gad ix bꞌat yacꞌoch sbꞌa yedꞌ vin̈aj David chiꞌ ayic ayecꞌ vin̈ dꞌa qꞌuen n̈aqꞌueen dꞌa tzꞌinan luum. A juntzan̈ ebꞌ vin̈ chiꞌ te jelan ebꞌ vin̈, cꞌaybꞌabꞌil yuj ebꞌ vin̈ yacꞌan oval, yedꞌnac smaclabꞌ jul-labꞌ ebꞌ vin̈ yedꞌ qꞌuen slanza. Te ov sat ebꞌ vin̈ icha nocꞌ choj. Te jelan sbꞌey ebꞌ vin̈ icha sbꞌey nocꞌ cꞌultaquil chej. 9-13 A sbꞌi ebꞌ vin̈ tic dꞌa stzolal, schael dꞌa vin̈ bꞌabꞌel masanto dꞌa vin̈ yuxluchil: Vin̈aj Ezer, vin̈aj Obadías, vin̈aj Eliab, vin̈aj Mismana, vin̈aj Jeremías, vin̈aj Atai, vin̈aj Eliel, vin̈aj Johanán, vin̈aj Elzabad, vin̈aj Jeremías yedꞌ vin̈aj Macbanai. 14 Aton ebꞌ vin̈ tic yajal yaj dꞌa scal juntzan̈ ebꞌ vin̈ yin̈tilal Gad chiꞌ. A junoc vin̈ quenn̈ej yopisio dꞌa scal ebꞌ vin̈, yajal vin̈ dꞌa junoc 100 soldado, axo junoc vin̈ nivan yopisio, yajal yaj vin̈ dꞌa junoc mil soldado. 15 Aton ebꞌ vin̈ ix cꞌaxpajecꞌ dꞌa aꞌ Jordán dꞌa bꞌabꞌel uj dꞌa yol abꞌil, ayic ix te qꞌue aꞌ, van yel aꞌ dꞌa stitac bꞌaj sbꞌeyi. A ebꞌ vin̈ ix pechanel ebꞌ anima cajan dꞌa acꞌlic ay dꞌa scꞌaxepaltac aꞌ.

16 An̈ejtonaꞌ ay pax juntzan̈xo ebꞌ vin̈ yin̈tilal Benjamín yedꞌ juntzan̈xo ebꞌ vin̈ yin̈tilal Judá ix cꞌoch yacꞌoch sbꞌa yedꞌ vin̈aj David dꞌa qꞌuen n̈aqꞌueen chiꞌ. 17 Ix elta vin̈aj David chiꞌ scha ebꞌ vin̈, ix yalan vin̈ dꞌa ebꞌ vin̈ icha tic: Tato dꞌa juncꞌolal tzex javi, yic tzex colvaj vedꞌoc, tzex in cha dꞌa smasanil in cꞌool, palta tato tzex javi yic tzin eyacꞌoch dꞌa yol scꞌabꞌ ebꞌ vajcꞌol jun, vachꞌchom malaj junoc tas chuc ix in cꞌulej, aocabꞌ co Diosal, aton sDiosal ebꞌ co mam quicham ol yil sbꞌa eyedꞌoc, syacꞌanoch eyaelal, xchi vin̈ dꞌa ebꞌ vin̈.

18 Ix och Yespíritu Dios dꞌa vin̈aj Amasai yajalil ebꞌ vin̈ 30 soldado bꞌinajnac, yuj chiꞌ ix yal vin̈ icha tic:

Yuj chiꞌ ix chaji ebꞌ vin̈ yuj vin̈aj David chiꞌ, ix acꞌji yopisio ebꞌ vin̈ dꞌa scal ebꞌ vin̈ yajalil ebꞌ vin̈ soldado chiꞌ yuj vin̈.

19 Ay pax juntzan̈xo ebꞌ vin̈ soldado yin̈tilal Manasés, ix och ebꞌ vin̈ yedꞌ vin̈aj David chiꞌ ayic ix bꞌat vin̈ yedꞌ ebꞌ vin̈ filisteo yacꞌ oval yedꞌ vin̈aj Saúl yalani. Axo ix smolbꞌan sbꞌa ebꞌ vin̈ yajalil ebꞌ filisteo chiꞌ, ix yalan ebꞌ vin̈ to max yal-laj sbꞌat vin̈aj David chiꞌ yedꞌ ebꞌ vin̈, yuj chiꞌ ix schec meltzaj vin̈ ebꞌ vin̈ dꞌa Siclag. Yujto ix yal ebꞌ vin̈ icha tic: Axo talaj tzꞌaji, a yedꞌ vin̈aj Saúl syacꞌoch sbꞌa vin̈, yujto yajal vin̈aj Saúl chiꞌ vin̈, a on̈ xo tzon̈ smilcham vin̈ dꞌa scal oval chiꞌ, xchi ebꞌ vin̈. 20 Ayic van sjaxcan vin̈aj David dꞌa Siclag chiꞌ, ataꞌ ix cꞌoch ebꞌ vin̈ yin̈tilal Manasés chiꞌ yic syacꞌoch sbꞌa ebꞌ yedꞌ vin̈, aton ebꞌ vin̈ tic: Vin̈aj Adnas, vin̈aj Jozabad, vin̈aj Jediaiel, vin̈aj Micael, vin̈aj Jozabad, vin̈aj Eliú yedꞌ vin̈aj Ziletai. Yajal yaj ebꞌ vin̈ dꞌa junjun mil soldado dꞌa scal ebꞌ yin̈tilal Manasés chiꞌ. 21 Aton juntzan̈ ebꞌ vin̈ tic ix colvaj yedꞌ vin̈aj David chiꞌ ayic ix yacꞌan oval vin̈ yedꞌ jun n̈ilan̈ ebꞌ soldado elcꞌum yujto te jelan ebꞌ smasanil dꞌa oval. Ix och ebꞌ vin̈ yajaliloc ebꞌ vin̈ soldado vin̈aj David chiꞌ. 22 Junjun cꞌu sqꞌuibꞌ sbꞌisul ebꞌ vin̈ soldado ix yacꞌoch sbꞌa yedꞌ vin̈aj David chiꞌ. Te nivan ebꞌ vin̈, te ay pax smay ebꞌ vin̈.

23 A sbꞌisul juntzan̈ soldado te jelan ix cꞌoch dꞌa vin̈aj David dꞌa Hebrón yic tzꞌacꞌjicanoch vin̈ reyal sqꞌuexuloc ebꞌ vin̈ yin̈tilal vin̈aj Saúl yuj ebꞌ vin̈, icha ix aj yalan Jehová, aton ebꞌ vin̈ tic: 24 A dꞌa ebꞌ yin̈tilal Judá, ay 6 mil 800 soldado yedꞌnac smaclabꞌ jul-labꞌ, yedꞌnac pax slanza ebꞌ vin̈, lista yaj ebꞌ vin̈ yacꞌan oval. 25 Axo dꞌa ebꞌ yin̈tilal Simeón, ay 7 mil 100 ebꞌ vin̈ soldado tecꞌan. 26 Axo dꞌa ebꞌ yin̈tilal Leví, ay 4 mil 600 ebꞌ vin̈ soldado. 27 Ay pax 3 mil 700 dꞌa yin̈tilal vin̈aj Aarón, a vin̈aj Joiada ayoch yajaliloc ebꞌ vin̈. 28 A vin̈aj Sadoc quelem vin̈, te tecꞌan vin̈ dꞌa oval. Ay 22 ebꞌ scꞌabꞌyoc vin̈, yajal yaj ebꞌ vin̈, ajun ebꞌ vin̈ yedꞌ vin̈. 29 A dꞌa ebꞌ yin̈tilal Benjamín, aton ebꞌ scꞌabꞌyoc vin̈aj Saúl, ay 3 mil ebꞌ vin̈ soldado ix cꞌoch yedꞌ vin̈aj David chiꞌ. Ayic mantzac uji jun tic, quen man̈ masaniloc ebꞌ ayoch yedꞌ ebꞌ vin̈ yin̈tilal vin̈aj Saúl. 30 A dꞌa ebꞌ yin̈tilal Efraín, ay 20 mil 800 ebꞌ vin̈ soldado te tecꞌan, te bꞌinajnac ebꞌ vin̈ dꞌa scal ebꞌ scꞌabꞌyoc. 31 A dꞌa nan̈al ebꞌ yin̈tilal Manasés, ay 18 mil ebꞌ vinac ix checjicoti yic tzꞌacꞌjicanoch vin̈aj David reyal. 32 A dꞌa ebꞌ yin̈tilal Isacar, ix javi 200 ebꞌ vin̈ yajal yedꞌ pax masanil ebꞌ vin̈ soldado ayoch dꞌa yalan̈ smandar ebꞌ vin̈. A juntzan̈ ebꞌ vin̈ vinac tic, snachaj val el yuj ebꞌ vin̈ tas smoj scꞌulej chon̈abꞌ Israel. 33 A dꞌa ebꞌ yin̈tilal Zabulón, ay 50 mil ebꞌ vin̈ soldado smoj sbꞌat dꞌa oval, syaln̈ej scꞌanan masanil yamcꞌabꞌ yic oval ebꞌ vin̈, bꞌecan scꞌool ebꞌ vin̈ scolvaj yedꞌ vin̈aj David chiꞌ. 34 A dꞌa ebꞌ yin̈tilal Neftalí, ay mil ebꞌ vin̈ yajal yaji yedꞌ 37 mil ebꞌ vin̈ soldado yedꞌnac slanza yedꞌ smaclabꞌ jul-labꞌ. 35 A dꞌa ebꞌ yin̈tilal Dan, ay 28 mil 600 ebꞌ vin̈ soldado smoj sbꞌat dꞌa oval. 36 A dꞌa ebꞌ yin̈tilal Aser, ay 40 mil ebꞌ vin̈ soldado smoj sbꞌat dꞌa oval. 37 Axo dꞌa ebꞌ ay dꞌa scꞌaxepal aꞌ Jordán, ay 120 mil ebꞌ vin̈ soldado dꞌa yin̈tilal Rubén, dꞌa yin̈tilal Gad yedꞌ pax dꞌa nan̈alxo yin̈tilal Manasés. A ebꞌ vin̈ chiꞌ tzꞌacan yaj ebꞌ vin̈ yedꞌ masanil syamcꞌabꞌ yic oval.

38 A masanil juntzan̈ ebꞌ vin̈ soldado tic, ix ja ebꞌ vin̈ dꞌa Hebrón ayic ix yacꞌancanoch vin̈aj David ebꞌ vin̈ sreyaloc chon̈abꞌ Israel. An̈ejtonaꞌ juntzan̈xo ebꞌ yetisraelal ebꞌ, junxon̈ej ix aj spensar ebꞌ smasanil. 39 Oxeꞌ cꞌual ix ecꞌ ebꞌ yedꞌ vin̈aj David chiꞌ taꞌ. Ix va ebꞌ, ix yucꞌan aꞌ ebꞌ, yujto a ebꞌ yetchon̈abꞌ ebꞌ ix acꞌan jantac tas ix sva ebꞌ chiꞌ. 40 Masanil ebꞌ cajan dꞌa slacꞌaniltac chiꞌ yedꞌ ebꞌ cajan dꞌa najat, icha ebꞌ yin̈tilal Isacar, ebꞌ yin̈tilal Zabulón yedꞌ ebꞌ yin̈tilal Neftalí, ix yicꞌcot vael ebꞌ cuchbꞌil yuj nocꞌ bꞌuru, nocꞌ camello, nocꞌ mula yedꞌ pax nocꞌ vacax. Tzijtum macan̈il vael ix yicꞌcot ebꞌ, icha ixim harina, taquin̈ higo, taquin̈ uva, vino, aceite, nocꞌ vacax yedꞌ nocꞌ calnel. Te nivan tas tzꞌabꞌlaj ix yicꞌcot ebꞌ, yujto man̈xo jantacoc tzalajcꞌolal dꞌa Israel chiꞌ.