A Chꞌan̈ Schabꞌil Libro
YIC YABꞌIXAL EBꞌ REY
A schamel vin̈aj Ocozías
1
Ayic toxo ix cham vin̈aj rey Acab, ix yicꞌanel sbꞌa chon̈abꞌ Moab dꞌa yalan̈ smandar chon̈abꞌ Israel. 2 Ay jun cꞌu ix cot sutnaj vin̈aj Ocozías yuninal vin̈aj Acab chiꞌ dꞌa span̈anil yibꞌan̈ spat dꞌa Samaria. Te nivan ix aj vin̈ slajvi, yuj chiꞌ ix schecbꞌat ebꞌ schecabꞌ vin̈ yic bꞌat scꞌanbꞌej yabꞌ ebꞌ dꞌa Baal-zebub sdiosal ebꞌ aj Ecrón, tato olto bꞌoxoc vin̈. 3 Palta a jun yángel Jehová ix alan dꞌa vin̈aj Elías aj Tisbe icha tic: Ixic, bꞌat cha ebꞌ schecabꞌ vin̈aj Ocozías sreyal Samaria, tzalan dꞌa ebꞌ icha tic: ¿Tom malaj Dios dꞌa co chon̈abꞌ a on̈ israel on̈ tic, yuj chiꞌ ato dꞌa Baal-zebub sdiosal Ecrón sbꞌat e cꞌanbꞌej eyabꞌi? xa chi dꞌa ebꞌ. 4 Tzalanpaxi to a in Jehová in sval dꞌa vin̈ rey chiꞌ icha tic: Man̈xo ol ach qꞌue vaan, palta ol ach chamxon̈ej, xchi Jehová, xa chi, xchi yángel Jehová chiꞌ dꞌa vin̈aj Elías chiꞌ.Ix bꞌat vin̈aj Elías chiꞌ, ix scꞌanabꞌajan vin̈ icha tas ix alji chiꞌ dꞌay. 5 Yuj chiꞌ ix meltzaj ebꞌ schecabꞌ vin̈ rey chiꞌ, ix cꞌochxi ebꞌ dꞌa yichan̈ vin̈, ix scꞌanbꞌan vin̈ dꞌa ebꞌ:
—¿Tas yuj ix ex meltzaj dꞌa elan̈chamel? xchi vin̈ dꞌa ebꞌ.
6 Ix tacꞌvi ebꞌ:
—Mamin rey, ay jun vin̈ vinac ix co cha dꞌa yol bꞌe. A vin̈ ix alan dꞌayon̈ icha tic: Meltzajan̈ec dꞌa vin̈ ix ex checancot chiꞌ, tzeyalan dꞌa vin̈ icha tic: A Jehová tzꞌalan icha tic: ¿Tom malaj Dios dꞌa Israel tic, yuj chiꞌ ato dꞌa Baal-zebub sdiosal Ecrón tza checbꞌat abꞌchajoc? Yuj val jun tas ix a naꞌ tic, man̈xo ol ach qꞌue vaan, ol ach chamxon̈ej, xchi Jehová, xe chi, xchi jun vin̈ chiꞌ dꞌayon̈, xchi ebꞌ.
7 Ix scꞌanbꞌan vin̈ rey chiꞌ dꞌa ebꞌ icha tic:
—¿Chajtil yilji jun vin̈ ix alan chiꞌ dꞌayex? xchi vin̈.
8 —Mamin rey, a jun vin̈ chiꞌ ayoch jun pichul ay xiil yuj vin̈, aypaxoch jun tzecꞌul tzꞌuum dꞌa snan̈al vin̈, xchi ebꞌ dꞌa vin̈.
—A jun vin̈ chiꞌ, aton vin̈aj Elías aj Tisbe, xchi vin̈ rey chiꞌ. 9 Ix lajvi chiꞌ ix schecanbꞌat jun vin̈ capitán vin̈ rey chiꞌ yedꞌ 50 ebꞌ vin̈ soldado yic bꞌat icꞌjoccot vin̈aj Elías chiꞌ. Axo yic ix cꞌoch ebꞌ dꞌa vin̈, cꞌojanem vin̈ dꞌa jun tzalan. Ix yalan vin̈ capitán chiꞌ dꞌa vin̈:
—Ach schecabꞌ Dios, a vin̈ rey ix alancoti to tzach emta, xchi vin̈ capitán chiꞌ.
10 Ix tacꞌvi vin̈aj Elías chiꞌ icha tic:
—Tato schecabꞌ in Dios, cotocabꞌ cꞌacꞌ dꞌa satchaan̈ tzach tzꞌabꞌat yedꞌ 50 ebꞌ vin̈ a soldado chiꞌ, xchi vin̈.
A val dꞌa jun rato chiꞌ ix emta cꞌacꞌ, ix tzꞌabꞌat ebꞌ vin̈ smasanil.
11 Ix lajvi chiꞌ ix schecanxibꞌat junxo vin̈ capitán vin̈ rey chiꞌ yedꞌ 50-xo ebꞌ vin̈ soldado, ix bꞌat yalan ebꞌ vin̈ dꞌa vin̈aj Elías chiꞌ:
—Ach schecabꞌ Dios, eman̈cot dꞌa elan̈chamel yal vin̈ rey, xchi vin̈ capitán chiꞌ.
12 Ix tacꞌvi vin̈aj Elías chiꞌ:
—Tato schecabꞌ in Dios, cotocabꞌ cꞌacꞌ dꞌa satchaan̈ tzach tzꞌabꞌat yedꞌ 50 ebꞌ vin̈ a soldado chiꞌ, xchi vin̈.
Dꞌa val jun rato chiꞌ ix emta cꞌacꞌ dꞌa satchaan̈, ix tzꞌabꞌat ebꞌ vin̈ smasanil.
13 Ix lajvi chiꞌ ix schecanxibꞌat junxo vin̈ capitán vin̈ rey chiꞌ yedꞌ 50-xo ebꞌ vin̈ soldado dꞌa yoxelal. Palta a jun vin̈ capitán chiꞌ, ix qꞌuecꞌoch vin̈ bꞌaj ayecꞌ vin̈aj Elías chiꞌ, ix em cuman vin̈ dꞌa yichan̈ vin̈, ix yalan vin̈:
—Mamin schecabꞌ Dios, acꞌ val nivancꞌolal dꞌa vibꞌan̈ yedꞌ 50 ebꞌ vin̈ soldado a checabꞌ tic. 14 Yujto a juntzan̈ ebꞌ vin̈ capitán yedꞌ soldado, ebꞌ vin̈ ix bꞌabꞌlaj ja dꞌayach, ix tzꞌabꞌat ebꞌ vin̈ yuj cꞌacꞌ ix cot dꞌa satchaan̈. A in tic tzin tevi dꞌayach to tzon̈ acꞌ nivancꞌolal yic max on̈ chami, xchi vin̈.
15 Ix lajvi chiꞌ ix yalan yángel Jehová chiꞌ dꞌa vin̈aj Elías chiꞌ icha tic:
—Ixic yedꞌ vin̈, man̈ ach xivoc, xchi dꞌa vin̈.
Yuj chiꞌ ix emta vin̈aj Elías chiꞌ, ix bꞌat vin̈ yedꞌ vin̈ capitán chiꞌ, ix bꞌat vin̈ yil vin̈ rey chiꞌ.
16 Ix yalan vin̈ icha tic dꞌa vin̈ rey chiꞌ:
—Icha val tic yalan Jehová: Yujto ix a checbꞌat ebꞌ a checabꞌ dꞌa Baal-zebub sdiosal Ecrón, yic bꞌat a cꞌanbꞌej a bꞌa, ichato malaj Dios dꞌa Israel tic bꞌaj syal tza cꞌanbꞌej abꞌi, yuj chiꞌ man̈xo ol ach qꞌue vaan, palta to ol ach chamxon̈ej, xchi Jehová, xchi vin̈aj Elías chiꞌ.
17 Icha chiꞌ ix aji, ix cham vin̈ rey chiꞌ, icha tas ix schec Jehová yal vin̈aj Elías chiꞌ. Yujto malaj junoc yuninal vin̈aj Ocozías chiꞌ, yuj chiꞌ a jun vin̈ yucꞌtac vin̈ scuchan Joram, a vin̈ ix ochcan reyal sqꞌuexuloc, aton yic schabꞌilxo abꞌil yoch junxo vin̈aj Joram yuninal vin̈aj Josafat reyal dꞌa Judá.
18 A jantacto yabꞌixal vin̈aj rey Ocozías yedꞌ juntzan̈xo tas ix scꞌulej vin̈, tzꞌibꞌabꞌilcan bꞌaj aycan yabꞌixal ebꞌ vin̈ sreyal Israel.