—Canan̈ dꞌa tic, yujto tzin schecbꞌat Jehová dꞌa Betel, xchi vin̈. Ix tacꞌvi vin̈aj Eliseo chiꞌ:

—Svacꞌ in tiꞌ dꞌayach dꞌa yichan̈ Jehová to ol in bꞌatn̈ej edꞌoc, xchi vin̈.

Yuj chiꞌ ix bꞌat ebꞌ vin̈ schavan̈il dꞌa Betel chiꞌ. 3 Ix elta ebꞌ vin̈ schecabꞌ Dios ay dꞌa Betel chiꞌ scha ebꞌ vin̈, ix yalan ebꞌ vin̈ dꞌa vin̈aj Eliseo chiꞌ:

—¿Ojtac ama to a ticnaic ol icꞌjoquel vin̈ a cꞌaybꞌumal tic dꞌayach yuj Jehová? xchi ebꞌ vin̈ dꞌa vin̈.

—Vojtacxo, tzꞌinec xe chi, xchi vin̈.

4 Ix lajvi chiꞌ, ix yalanxi vin̈aj Elías chiꞌ dꞌa vin̈aj Eliseo chiꞌ icha tic:

—Canan̈ dꞌa tic, yujto tzin schecbꞌat Jehová dꞌa Jericó, xchi vin̈.

Ix tacꞌvixi vin̈aj Eliseo chiꞌ:

—Svacꞌ in tiꞌ dꞌayach dꞌa yichan̈ Jehová to ol in bꞌatn̈ej edꞌoc, xchi vin̈.

Yuj chiꞌ ix bꞌatxi ebꞌ vin̈ schavan̈il dꞌa Jericó chiꞌ. 5 Ix eltapax ebꞌ vin̈ schecabꞌ Dios ayecꞌ taꞌ scha ebꞌ vin̈, ix yalan ebꞌ dꞌa vin̈aj Eliseo chiꞌ:

—¿Ojtac ama to a ticnaic ol icꞌjoquel vin̈ a cꞌaybꞌumal tic dꞌayach yuj Jehová? xchi ebꞌ vin̈.

—Vojtacxo, tzꞌinec xe chi, xchi vin̈.

6 Ix lajvi chiꞌ ix yalanxi vin̈aj Elías chiꞌ dꞌa vin̈aj Eliseo chiꞌ icha tic:

—Canan̈ dꞌa tic, yujto tzin schecbꞌat Jehová dꞌa aꞌ Jordán, xchi vin̈.

Ix tacꞌvixi vin̈aj Eliseo chiꞌ:

—Svacꞌ in tiꞌ dꞌayach dꞌa yichan̈ Jehová to ol in bꞌatn̈ej edꞌoc, xchi vin̈.

Yuj chiꞌ ix bꞌatn̈ej ebꞌ vin̈ schavan̈il. 7 Najat ix bꞌat tzacꞌan 50 ebꞌ vin̈ schecabꞌ Dios yuj ebꞌ vin̈, najatto ix can ebꞌ vin̈ dꞌa yichan̈cot ebꞌ vin̈ chavan̈ chiꞌ dꞌa stiꞌ aꞌ Jordán. 8 Ix lajvi chiꞌ ix spacan jun sjucan pichul vin̈aj Elías chiꞌ, ix spajanem vin̈ dꞌa sat aꞌ Jordán chiꞌ. Ix spojan sbꞌa aꞌ, taquin̈ ix aj bꞌaj ix ecꞌ ebꞌ vin̈ dꞌa yol aꞌ chiꞌ. 9 Ayic toxo ix cꞌaxpaj ecꞌ ebꞌ vin̈ chiꞌ, ix yalan vin̈aj Elías dꞌa vin̈aj Eliseo chiꞌ icha tic:

—Al dꞌayin tas tza nibꞌej svacꞌ dꞌayach yacbꞌan manto in icꞌjoquel dꞌa a tzꞌey, xchi vin̈.

Ix yalan vin̈aj Eliseo chiꞌ:

—Tzin cꞌan dꞌayach to cha macan̈ tzꞌaj acꞌancan opisio chiꞌ dꞌayin, ichato a bꞌabꞌel unin tzin ajcan a qꞌuexuloc, xchi vin̈.

10 Ix yalan vin̈aj Elías chiꞌ: Te ajaltac jun tza cꞌan tic dꞌayin. Tato ol il tas ol aj vicꞌjiel dꞌa a tzꞌey, ol acꞌjoc dꞌayach. Tato man̈ ol il jun, man̈ ol acꞌjoclaj dꞌayach, xchi vin̈.

11 Yacbꞌan van sbꞌey ebꞌ vin̈, van slolon ebꞌ vin̈. Elan̈chamel ix checlajqꞌue jun carruaje cꞌacꞌ yilji, tocꞌbꞌil yuj nocꞌ chej cꞌacꞌ yiljipaxi. Aꞌ ix icꞌanel vin̈aj Elías chiꞌ dꞌa stzꞌey vin̈aj Eliseo chiꞌ, ix icꞌjibꞌat vin̈ dꞌa satchaan̈ dꞌa scal jun chacxuxum icꞌ. 12 Ayic ix yilan jun chiꞌ vin̈aj Eliseo chiꞌ, ix el yav vin̈, ix yalan vin̈: Ay mamin, lajan ach icha nocꞌ chej yedꞌ carruaje yic oval dꞌayon̈ israel on̈ tic, yujto tzach colvajn̈ej dꞌayon̈, xchi vin̈.

Man̈xa bꞌaj ix yil vin̈aj Elías vin̈aj Eliseo chiꞌ.

Ix sn̈icꞌchitanbꞌat jun spichul vin̈aj Eliseo ayoch yuuj yic schꞌoxanel scuscꞌolal vin̈. 13 Elan̈chamel ix bꞌat vin̈ sicꞌqꞌue jun sjucan pichul vin̈aj Elías ix can lan̈naj chiꞌ. Ix meltzajcan vin̈ dꞌa aꞌ Jordán chiꞌ, ix och lin̈an vin̈ dꞌa stiꞌ aꞌ. 14 Ix spajanem sjucan pichul vin̈aj Elías chiꞌ vin̈ dꞌa sat a aꞌ chiꞌ, ix yalan vin̈ icha tic: ¿Bꞌajtil ayecꞌ Jehová sDiosal vin̈aj Elías? xchi vin̈.

Ixn̈ej em cꞌapac chiꞌ dꞌa sat aꞌ, ix spojan sbꞌa aꞌ. Icha chiꞌ ix aj yecꞌxita vin̈ dꞌa yol aꞌ. 15 Ayic ix yilan ebꞌ vin̈ schecabꞌ Dios ay dꞌa Jericó, aton ebꞌ vin̈ najat lin̈jabꞌcan yilaꞌ, ix yalan ebꞌ vin̈ icha tic: A yopisio vin̈aj Elías ix ochcan dꞌa vin̈aj Eliseo tic, xchi ebꞌ vin̈.

Ix cot ebꞌ scha vin̈, ix em n̈ojnaj ebꞌ dꞌa yichan̈ vin̈. 16 Ix yalan ebꞌ icha tic:

—Mamin, iltonabꞌi, ay 50 ebꞌ vin̈ vinac dꞌa co cal tic te tecꞌan. Tato syal a cꞌol sbꞌat ebꞌ vin̈ say vin̈ a cꞌaybꞌumal chiꞌ, talaj ay bꞌaj ix actajcan vin̈ yuj Yespíritu Jehová dꞌa jolomtac vitz, ma dꞌa yoltac chꞌolan, xchi ebꞌ vin̈ dꞌa vin̈.

Palta ix yalan vin̈:

—Maay, malaj mach sbꞌati, xchi vin̈.

17 Ix ochn̈ej ijan ebꞌ vin̈ yalan dꞌa vin̈, yuj chiꞌ ix yal vin̈ icha tic: Ixiquec an, xchi vin̈. Ix bꞌat ebꞌ vin̈ 50 chiꞌ say dꞌa oxeꞌ cꞌual. Malaj mach ix ilchaj yuj ebꞌ vin̈. 18 Ix lajvi chiꞌ ix meltzaj ebꞌ vin̈ dꞌa Jericó bꞌaj aycan vin̈aj Eliseo chiꞌ, ix yalan vin̈ dꞌa ebꞌ vin̈:

—¿Tom maj val dꞌayex jun to max ex bꞌatlaj? xchi vin̈.

19 Ix yalan ebꞌ anima cajan dꞌa jun chon̈abꞌ chiꞌ dꞌa vin̈aj Eliseo chiꞌ icha tic:

—Mamin, ilnabꞌ val yilji jun lugar tic, te vachꞌ, palta malaj tas tzꞌel dꞌa sat luum yujto man̈ vachꞌoc a aꞌ ay dꞌa luum, xchi ebꞌ.

20 —Ix yalan vin̈ dꞌa ebꞌ icha tic:

—Iqꞌueccot atzꞌam atzꞌam dꞌa yol junoc ucꞌabꞌ acꞌto, xchi vin̈.

Ix yicꞌancot jun ucꞌabꞌ atzꞌam chiꞌ ebꞌ dꞌa vin̈, 21 ix bꞌat secanem vin̈ dꞌa yol sjaj a aꞌ chiꞌ. Ix yalan vin̈ icha tic:

—Icha tic yalan Jehová: A in ix in bꞌo jun a aꞌ tic. Man̈xa bꞌaqꞌuin̈ ay mach ol cham yuj aꞌ, man̈xa pax bꞌaqꞌuin̈ malaj tas ol yacꞌ dꞌa sat luum yuj aꞌ, xchi Jehová, xchi vin̈.

22 Icha chiꞌ ix aj sbꞌocan aꞌ, icha ix aj yalan vin̈aj Eliseo chiꞌ.

23 Ix lajvi chiꞌ, ix bꞌat vin̈ dꞌa Betel. Ayic van sqꞌue vin̈ dꞌa sbꞌeal chiꞌ, ay jun n̈ilan̈ ebꞌ vin̈ quelemtac ay dꞌa jun chon̈abꞌ chiꞌ ix elta dꞌa yol sbꞌe vin̈, ix och ijan ebꞌ vin̈ sbꞌajan vin̈, ix yalan ebꞌ vin̈: Qꞌuean̈ ach dꞌen jolom. Qꞌuean̈ ach dꞌen jolom, xchi ebꞌ vin̈.

24 Ix meltzajbꞌat qꞌuelan vin̈ dꞌa ebꞌ vin̈, ix catabꞌaj ebꞌ vin̈ yuj vin̈ dꞌa sbꞌi Jehová. Elan̈chamel ix elta chavan̈ nocꞌ oso dꞌa caltac teꞌ, ix cotac n̈icꞌchitajbꞌat 42 ebꞌ vin̈ quelemtac chiꞌ yuj nocꞌ. 25 Ix lajvi chiꞌ ix bꞌat vin̈ dꞌa jolom vitz Carmelo, ix meltzajxi vin̈ dꞌa Samaria.