4 A vin̈aj Mesa sreyal Moab, molum calnel vin̈ yedꞌ masanil anima ay dꞌa yol smacbꞌen chiꞌ. Yuj chiꞌ a nocꞌ syacꞌ vin̈ yic stupan vin̈ dꞌa vin̈ sreyal Israel chiꞌ, 100 mil nocꞌ yunetac calnel yedꞌ pax 100 mil nocꞌ chꞌac calnel yedꞌ slanail syacꞌ vin̈. 5 Palta ayic ix cham vin̈aj Acab, ix yicꞌanel sbꞌa vin̈ sreyal Moab chiꞌ dꞌa yalan̈ smandar chon̈abꞌ Israel. 6 Yuj chiꞌ, ix el vin̈aj Joram dꞌa Samaria, ix smolbꞌan masanil ebꞌ soldado yic Israel vin̈. 7 Elan̈chamel ix yalbꞌat vin̈ dꞌa vin̈aj Josafat sreyal Judá: A vin̈ sreyal Moab toxo ix yiqꞌuel sbꞌa vin̈ dꞌa yalan̈ in mandar, ¿tzam yal a cꞌol tzach och vedꞌoc yic scacꞌan oval yedꞌ vin̈? xchibꞌat vin̈.

Ix tacꞌvi vin̈ sreyal Judá chiꞌ icha tic: Ol in bꞌat edꞌoc yedꞌ ebꞌ in soldado yedꞌ nocꞌ in chej. 8 An̈ej bꞌian, ¿tas bꞌeal bꞌaj ol on̈ bꞌatoc? xchi vin̈. Ix tacꞌvi vin̈aj Joram chiꞌ ix yalan vin̈: A dꞌa sbꞌeal taquin̈ luum dꞌa yol yic Edom, ataꞌ ol on̈ bꞌatoc, xchi vin̈.

9 Icha chiꞌ ix aj sbꞌat vin̈ sreyal Israel yedꞌ vin̈ sreyal Judá yedꞌ pax vin̈ sreyal Edom yedꞌ ebꞌ soldado. Uqueꞌ cꞌual ix bꞌey ebꞌ yujto ix ecꞌ yoymitej lum taquin̈ lum chiꞌ ebꞌ, yuj chiꞌ ix lajviel aꞌ yaal ebꞌ soldado syuqꞌuej yedꞌ pax yic masanil snocꞌ ebꞌ yedꞌnac. 10 Yuj chiꞌ ix yal vin̈ sreyal Israel chiꞌ icha tic:

—A ticnaic, ichato on̈ smolbꞌej Jehová a on̈ oxvan̈ rey on̈ tic yic tzon̈ yacꞌanoch dꞌa yol scꞌabꞌ ebꞌ aj Moab tic, xchi vin̈.

11 Ix yalan vin̈aj Josafat chiꞌ icha tic:

—¿Mama junoc vin̈ schecabꞌ Jehová ayecꞌ dꞌa tic yic vachꞌ scꞌanbꞌej vin̈ dꞌa Jehová cuuj? xchi vin̈.

Ay jun vin̈ yajal soldado yaj dꞌa vin̈ sreyal Israel chiꞌ ix tacꞌvi icha tic:

—A dꞌa tic ayecꞌ vin̈aj Eliseo yuninal vin̈aj Safat. Aton vin̈ schecabꞌcan vin̈aj Elías, xchi vin̈.

12 Ix yalan vin̈aj Josafat chiꞌ icha tic: A jun vin̈ chiꞌ yel schecabꞌ Jehová yaj vin̈, xchi vin̈.

Yuj chiꞌ ix bꞌat oxvan̈ ebꞌ vin̈ rey chiꞌ lolonel yedꞌ vin̈aj Eliseo chiꞌ. 13 Palta ix yalan vin̈ dꞌa vin̈ sreyal Israel chiꞌ icha tic:

—¿Tas valan vic dꞌayach? Ixic, bꞌat cꞌanbꞌej a bꞌa dꞌa ebꞌ vin̈ schecabꞌ sdiosalcan ebꞌ a mam a nun, xchi vin̈.

Palta ix yalan vin̈ sreyal Israel chiꞌ:

—Maay, yujto on̈ icꞌjicot yuj Jehová a on̈ oxvan̈ rey on̈ tic, yic tzon̈ yacꞌanoch dꞌa yol scꞌabꞌ ebꞌ moabita, xchi vin̈.

14 Ix yalan vin̈aj Eliseo chiꞌ dꞌa vin̈:

—Dꞌa val yichan̈ Jehová Yajal dꞌa Smasanil svalaꞌ, aton jun svacꞌ servil, qꞌuinaloc malaj yelcꞌoch vin̈aj Josafat sreyal Judá tic dꞌa yol in sat, man̈ jabꞌoc tzin cha vabꞌ tas tzalaꞌ, max in ochpax qꞌuelan jabꞌoc dꞌayach. 15 Iqꞌueccot junoc mach syal schalan teꞌ arpa dꞌa vichan̈ tic, xchi vin̈. Ix yicꞌancot jun vin̈ syal schalan teꞌ arpa chiꞌ ebꞌ vin̈.

Ayic van schalan teꞌ arpa chiꞌ vin̈, ix javi yipalil Jehová dꞌa vin̈aj Eliseo chiꞌ, 16 Ix yalan vin̈ icha tic:

—A Jehová tzꞌalan icha tic: Bꞌoec tzijtumoc sanja dꞌa jun chꞌolan tic. 17 Vachꞌchom malaj icꞌ, ma n̈abꞌ ol eyil sjavi, palta a jun chꞌolan tic ol bꞌudꞌjoc yuj a aꞌ, yuj chiꞌ e masanil ol eyucꞌ aꞌ, ol yucꞌan aꞌ nocꞌ e vacax yedꞌ pax nocꞌ e chej, xchi Jehová. 18 Chequeln̈ej val yaj jun tic dꞌa yichan̈ tas ol scꞌulej Jehová, ol yacꞌoch ebꞌ moabita chiꞌ dꞌa yol e cꞌabꞌ. 19 Yuj chiꞌ ol e juem lan̈naj schon̈abꞌ ebꞌ vachꞌ yajoch smuroal yedꞌ juntzan̈ nivac chon̈abꞌ vachꞌ yilji. Ol e chꞌacanem masanil yavbꞌen teꞌ ebꞌ, ol laj e mucancan sjaj aꞌ yucꞌlabꞌ aꞌ ebꞌ, ol e bꞌudꞌancan sat slum ebꞌ yedꞌ qꞌuen qꞌueen bꞌaj smunlaji, xchi vin̈aj Eliseo chiꞌ.

20 Axo ix aji, a dꞌa junxo qꞌuin̈ibꞌalil, icha yorail tzꞌacꞌji silabꞌ dꞌa Jehová, a dꞌa yol yic Edom, ix cot a aꞌ, ix bꞌudꞌjiel sat lum luum chiꞌ yuj aꞌ. 21 Ayic ix yabꞌan ebꞌ moabita to van scꞌoch ebꞌ vin̈ rey yacꞌ oval yedꞌ ebꞌ, ix smolbꞌan masanil ebꞌ vin̈ quelemtac ebꞌ yedꞌ ebꞌ vin̈ ichamtac vinac, ebꞌ vin̈ syal yoch dꞌa oval, ix och ebꞌ vin̈ smac dꞌa sat smojon snación chiꞌ. 22 Ayic ix qꞌue van ebꞌ moabita chiꞌ dꞌa qꞌuin̈ibꞌalil, ix yilan ebꞌ toxon̈ej scopopi yilji yibꞌan̈ a aꞌ chiꞌ yuj yoc cꞌu, ichato chicꞌxon̈ej yilji aꞌ. 23 Yuj chiꞌ ix yalan ebꞌ icha tic: A jun chiꞌ chicꞌ. Tope a ebꞌ vin̈ rey yedꞌ ebꞌ vin̈ soldado ix smil-lajcham sbꞌa. A ticnaic coyec sbꞌat quicꞌancan masanil tastac yedꞌnac ebꞌ ix cani, xchi ebꞌ.

24 Palta axo ix javi ebꞌ moabita dꞌa scampamento ebꞌ israel, ix elta ebꞌ israel chiꞌ yacꞌ oval yedꞌ ebꞌ, ix acꞌji ganar ebꞌ moabita chiꞌ yuj ebꞌ. Yuj chiꞌ ix el ebꞌ elelal, palta ix och ebꞌ israel chiꞌ dꞌa spatic ebꞌ, ix miljicham ebꞌ yuj ebꞌ. 25 Ix lajvi chiꞌ, ix sjuanem lan̈naj schon̈abꞌ ebꞌ moabita chiꞌ ebꞌ, ix sbꞌudꞌan lum luum ebꞌ dꞌa qꞌuen qꞌueen, aton lum te yax sat yic munlajel. Ix smucan sjajtac a aꞌ ebꞌ, ix schꞌacanel masanil teꞌ avbꞌen teꞌ ebꞌ te vachꞌ. Axon̈ej chon̈abꞌ Kir-hareset ixto cani, palta axo ebꞌ sjulvaj yedꞌ chꞌan̈ mejmeech, ix oymaj ebꞌ dꞌa spatictac chon̈abꞌ chiꞌ, ix yacꞌan ganar jun chon̈abꞌ chiꞌ ebꞌ.

26 Ayic ix yilan vin̈ sreyal Moab to van yacꞌji ganar vin̈ dꞌa oval chiꞌ, ix yicꞌancot 700 ebꞌ soldado vin̈, ebꞌ te jelan yacꞌan oval yedꞌ qꞌuen espada. Ix yecanoch sbꞌa ebꞌ dꞌa scal ebꞌ soldado yic scꞌoch ebꞌ bꞌaj ayecꞌ vin̈ sreyal Edom chiꞌ, yic smilancham vin̈ ebꞌ yalani, palta maj yal-laj yuj ebꞌ. 27 Ix lajvi chiꞌ, ix yicꞌancot jun sbꞌabꞌel yuninal vin̈ sreyal Moab chiꞌ, aton jun dꞌin̈an yochcan reyal sqꞌuexuloc vin̈. Ix sn̈usantzꞌa vin̈ silabꞌil dꞌa sdiosal dꞌa yibꞌan̈ smuroal schon̈abꞌ chiꞌ. Te chuc ix aj snaan ebꞌ vin̈ israel chiꞌ yuj jun chiꞌ, yuj chiꞌ ix yicꞌqꞌue vaan scampamento ebꞌ vin̈, ix pax ebꞌ vin̈ dꞌa schon̈abꞌ.