—A vin̈ vetbꞌeyum chamnacxo vin̈, ojtac to te ay xivcꞌolal vin̈ dꞌa Jehová. Axo ticnaic ay jun vin̈ acꞌannac qꞌuen tumin smajnej vin̈ vetbꞌeyum chiꞌ, ix javi vin̈ dꞌayin, snibꞌej vin̈ syicꞌbꞌat chavan̈ ebꞌ vuneꞌ tic schecabꞌoc yuj qꞌuen tumin chiꞌ, xchi ix.

2 Ix scꞌanbꞌan vin̈aj Eliseo chiꞌ dꞌa ix icha tic:

—¿Tas tza nibꞌej tzin bꞌo dꞌayach? Al dꞌayin tastac ay dꞌayach, xchi vin̈.

Ix yalan ix dꞌa vin̈ icha tic:

—A in a checabꞌ in tic, malaj val jabꞌoc tas ay dꞌayin, an̈ej val jabꞌ yuneꞌ xalu aceite ayecꞌ dꞌayin, xchi ix.

3 Ix yalan vin̈ dꞌa ix:

—Ixic, tza cꞌanan a majnej jantac xalu dꞌa ebꞌ ay dꞌa a lacꞌanil, jantacn̈ej malaj yool tzꞌilchaj uuj. 4 Elan̈chamel tzach och dꞌa yol a pat yedꞌ ebꞌ vin̈ uneꞌ chiꞌ. Tza macan a pat chiꞌ, tzacꞌan bꞌudꞌjoc masanil juntzan̈ yedꞌtal chiꞌ dꞌa aceite chiꞌ. Chꞌoc bꞌaj tzacꞌcanem juntzan̈ sbꞌudꞌjican chiꞌ, xchi vin̈.

5 Ayic ix lajvi slolon ix yedꞌ vin̈aj Eliseo chiꞌ, ix bꞌat smacanoch sbꞌa ix yedꞌ ebꞌ vin̈ yuneꞌ chiꞌ dꞌa yol spat, ix syamanoch ebꞌ sbꞌudꞌan juntzan̈ xalu ix smajnej chiꞌ dꞌa aceite chiꞌ. 6 Ayic toxo ix bꞌudꞌji masanil xalu chiꞌ, ix yalan ix dꞌa junoc ebꞌ vin̈ yuneꞌ chiꞌ icha tic:

—Icꞌcot junocxo xalu, xchi ix.

Ix yalan jun vin̈ yuneꞌ ix chiꞌ:

—Man̈xalaj tas, xchi vin̈.

A val dꞌa jun rato chiꞌ ix vanaj aceite chiꞌ yeli. 7 Ix lajvin̈ej chiꞌ, ix bꞌat ix yal dꞌa vin̈aj Eliseo schecabꞌ Dios chiꞌ, ix yalan vin̈ icha tic dꞌa ix:

—A ticnaic ixic a chon̈ aceite chiꞌ, slajvi chiꞌ tza tupan a bꞌoc chiꞌ, axo jantac stojol chiꞌ scani, tza cꞌan qꞌueen yedꞌ ebꞌ vin̈ uneꞌ chiꞌ, xchi vin̈ dꞌa ix.

8 Ay jun cꞌu ix ecꞌ vin̈aj Eliseo dꞌa chon̈abꞌ Sunem. Ataꞌ ay jun ix ix te bꞌeyum. Ix och tean ix dꞌa vin̈ to tzꞌecꞌ vin̈ vael dꞌa spat ix. Yuj chiꞌ ayic tzꞌecꞌ vin̈ juntac el dꞌa jun chon̈abꞌ chiꞌ, tzꞌecꞌn̈ej vin̈ vael dꞌa spat ix chiꞌ. 9 Yuj chiꞌ ix yalan ix dꞌa vin̈ yetbꞌeyum icha tic:

—A ticnaic, snachajel vuuj to a jun vin̈ tzꞌecꞌn̈ej on̈ yil dꞌa juntac el, val yel schecabꞌ Dios yaj vin̈. 10 Yuj chiꞌ, vachꞌ sco bꞌo junoc cuarto dꞌa yibꞌan̈ co pat tic, scacꞌanoch junoc chꞌat dꞌa yool, junoc mexa, junoc xila yedꞌ junoc candil, yic vachꞌ ayic sjavi vin̈ on̈ yilaꞌ, ataꞌ scan vin̈, xchi ix.

11 Ix ecꞌxi vin̈aj Eliseo chiꞌ taꞌ yedꞌ vin̈ schecabꞌ scuchan Giezi, ix qꞌue ebꞌ vin̈ dꞌa yol jun cuarto chiꞌ, ataꞌ ix vaycan ebꞌ vin̈. 12 Ix yalan vin̈ dꞌa vin̈ schecabꞌ chiꞌ icha tic:

—Avtej ix aj Sunem chiꞌ, xchi vin̈.

Ix yavtan ix vin̈, ix javi ix dꞌa yichan̈ vin̈aj Eliseo chiꞌ, ix yalan vin̈ dꞌa vin̈ schecabꞌ chiꞌ:

13 —Cꞌanbꞌej dꞌa ix tas snibꞌej scꞌol ix, yujto te vachꞌ syutej scꞌol ix dꞌayon̈. Tato syal scꞌol ix syal tzon̈ lolon yedꞌ vin̈ rey yuj ix, ma yedꞌ ebꞌ yajalil ebꞌ soldado, xchi vin̈. Ix yalan ix:

—Maay, vachꞌ vaj dꞌa yol in chon̈abꞌ tic, xchi ix dꞌa vin̈ checabꞌ chiꞌ. Ix lajvi chiꞌ, ix pax ix.

14 —¿Tas vachꞌ sco cꞌulej dꞌa ix syal chiꞌ? xchi vin̈ dꞌa vin̈ schecabꞌ chiꞌ.

—Max nachajel vuuj, an̈ej, malaj yuneꞌ ix, axo vin̈ yetbꞌeyum ix icham vinacxo vin̈, xchi vin̈aj Giezi chiꞌ.

15 —Avtejxicot ix, xchi vin̈aj Eliseo chiꞌ.

Ix avtajxicot ix, ix javi tecꞌtecꞌ ix dꞌa spuertail jun cuarto chiꞌ. 16 Ix yalan vin̈aj Eliseo chiꞌ dꞌa ix:

—Yabꞌ val icha tic junabꞌ, chelbꞌilxo qꞌue junoc uneꞌ uuj, xchi vin̈ dꞌa ix.

Ix yalan ix icha tic:

—Maay mamin, ach schecabꞌ Dios, man̈ ach bꞌuchvaj dꞌayin, xchi ix.

17 Palta ix scuchanoch jun yuneꞌ ix, axo dꞌa junxo abꞌil, ix alji jun yuneꞌ ix chiꞌ, icha val ix aj yalan vin̈aj Eliseo chiꞌ. 18 Ix qꞌuibꞌ jun unin chiꞌ, ay jun cꞌu ix bꞌat yil vin̈ smam bꞌaj aybꞌat yil ebꞌ sjochum trigo. 19 Ix yalan jun unin chiꞌ dꞌa vin̈ smam chiꞌ icha tic:

—Ay, te ya in jolom. Te ya in jolom, xchi.

Ix yalan vin̈ mamabꞌil chiꞌ dꞌa junoc ebꞌ vin̈ schecabꞌ:

—Icꞌbꞌat vin̈ unin tic dꞌa ix snun, xchi vin̈.

20 Ix icꞌjibꞌat vin̈ unin chiꞌ dꞌa ix snun yuj vin̈ checabꞌ chiꞌ, ix schelanqꞌue ix dꞌa sat xubꞌ, axo ix och chimcꞌualil ix chami. 21 Ix lajvi chiꞌ ix bꞌat yacꞌancanecꞌ telan ix dꞌa sat schꞌat vin̈aj Eliseo schecabꞌ Dios chiꞌ, ix smacancan jun cuarto chiꞌ ix. 22 Elan̈chamel ix yavtej vin̈ yetbꞌeyum ix, ix yalan ix dꞌa vin̈:

—Checbꞌat junoc ebꞌ vin̈ co checabꞌ yedꞌ junoc nocꞌ bꞌuru vedꞌoc, sbꞌat vilan vin̈ schecabꞌ Dios, nactic in jaxi, xchi ix.

23 —¿Tas yuj bꞌat il vin̈ ticnaic? Man̈ stiempoaloc yalji qꞌuen uj, man̈ scꞌualoc pax icꞌoj ip, xchi vin̈ yetbꞌeyum ix chiꞌ.

—Man̈ acꞌ pensar, xchi ix.

24 Ix yalan ix to tzꞌacꞌjioch stzꞌuum nocꞌ bꞌuru chiꞌ, ix yalan ix dꞌa vin̈ schecabꞌ chiꞌ:

—Con̈ an, yelcꞌolal a pechan nocꞌ, man̈ a cha och vaan nocꞌ dꞌa yol bꞌe masanto a in ol val dꞌayach, xchi ix dꞌa vin̈.

25 Icha chiꞌ ix aj sbꞌat ix masanto ix cꞌoch ix dꞌa lum vitz Carmelo bꞌaj ayecꞌ vin̈aj Eliseo schecabꞌ Dios chiꞌ. Najatto van scot ix ix yilanbꞌat vin̈, ix yalan vin̈ dꞌa vin̈aj Giezi icha tic:

—Ilnabꞌi, a ix aj Sunem sjavi chiꞌ. 26 Ixic bꞌat cha ix, tza cꞌanbꞌan dꞌa ix tato vachꞌ scꞌol ix yedꞌ vin̈ yetbꞌeyum yedꞌ vin̈ neneꞌ unin, xchi vin̈.

Ix bꞌat vin̈ scha ix. Ix scꞌanbꞌan vin̈ dꞌa ix, ix yalan ix to vachꞌ scꞌol ebꞌ. 27 Palta elan̈chamel ix cꞌoch ix bꞌaj ayecꞌ vin̈aj Eliseo dꞌa lum vitz Carmelo chiꞌ, ix och lacꞌnaj ix dꞌa yoc vin̈, axo vin̈aj Giezi chiꞌ ix quetzanel ix yalani. Ix yalan vin̈aj Eliseo chiꞌ dꞌa vin̈ icha tic:

—Actejel ix, yujto te cusnac spixan ix svilaꞌ, manta tas syal Jehová dꞌayin tas yuj ix cot ix, xchi vin̈.

28 Yuj chiꞌ ix yalan ix icha tic:

—Mamin, ¿tocval a in ix in cꞌan dꞌayach to tzꞌalji junoc vuneꞌ? ¿Tom maj val dꞌayach tas yuj ton̈ej tzach bꞌuchvaj dꞌayin? xchi ix.

29 Yuj chiꞌ ix yalan vin̈aj Eliseo dꞌa vin̈ schecabꞌ chiꞌ:

—Acꞌ lista a bꞌa, icꞌbꞌat teꞌ in cꞌococh tic edꞌoc, tzach bꞌat dꞌa elan̈chamel. Tato ay mach tza chaꞌa, man̈ ach lolon yedꞌoc. Tato ay ebꞌ tzꞌavajcot dꞌayach, man̈ ach tacꞌvoc dꞌa ebꞌ. Ayic tzach cꞌoch chiꞌ tzaqꞌuem teꞌ in cꞌococh tic dꞌa sat vin̈ unin chiꞌ, xchi vin̈.

30 Ix yalan ix snun vin̈ unin chiꞌ:

—Svacꞌ in tiꞌ dꞌayach dꞌa yichan̈ Jehová to max in bꞌat dꞌa tic tato max ach bꞌat vedꞌoc, xchi ix. 31 Yuj chiꞌ ix bꞌat vin̈ yedꞌ ix. Axo pax vin̈aj Giezi chiꞌ, toxo ix bꞌabꞌlajbꞌat vin̈, toxo ix yaqꞌuem teꞌ cꞌococh chiꞌ vin̈ dꞌa sat vin̈ unin chiꞌ, palta maj jaxlaj scꞌol vin̈. Yuj chiꞌ ix cot vin̈ scha vin̈aj Eliseo chiꞌ, ix yalan vin̈:

—Max jalaj scꞌol vin̈ unin chiꞌ, xchi vin̈.

32 Ayic ix cꞌoch vin̈aj Eliseo dꞌa yol cuarto chiꞌ, telanecꞌ vin̈ unin chiꞌ dꞌa sat schꞌat vin̈, chamnacxo. 33 Yuj chiꞌ ix och vin̈ dꞌa yol jun cuarto chiꞌ schꞌocoj yedꞌ vin̈ unin chiꞌ, ix smacan vin̈, ix lesalvi vin̈ dꞌa Jehová. 34 Ix lajvi chiꞌ ix qꞌue vin̈ dꞌa sat chꞌat chiꞌ, ix qꞌue lachan vin̈ dꞌa yibꞌan̈ vin̈ unin chiꞌ, ix em tenan sat vin̈ dꞌa sat vin̈ unin chiꞌ, ix yacꞌanoch stiꞌ vin̈ dꞌa stiꞌ yedꞌ scꞌabꞌ vin̈ dꞌa scꞌabꞌ. Ix qꞌue lachan vin̈ dꞌa yibꞌan̈ vin̈ unin chiꞌ. Ix qꞌuixnajxi snivanil vin̈ unin chiꞌ. 35 Ix el vin̈ dꞌa yibꞌan̈ vin̈ unin chiꞌ, ix ecꞌ bꞌesesoc vin̈ dꞌa yol pat chiꞌ. Ix lajvi chiꞌ ix qꞌuex lachan vin̈ dꞌa yibꞌan̈ vin̈ unin chiꞌ icha dꞌa sbꞌabꞌelal. Axo ix aj jun, uquel ix adꞌisvi vin̈ unin chiꞌ, ichato chiꞌ ix elta qꞌuelan vin̈. 36 Ix yavtan vin̈aj Giezi vin̈aj Eliseo chiꞌ, ix yalan vin̈:

—Avtejcot ix sunamita chiꞌ, xchi vin̈. Ix bꞌat vin̈ yavtejcot ix. Axo ix cꞌoch ix dꞌa stzꞌey vin̈aj Eliseo chiꞌ jun, ix yalan vin̈:

—Ina vin̈ uneꞌ tic, xchi vin̈.

37 Ix snitzanoch sbꞌa ix, ix em cuman ix dꞌa yichan̈ vin̈. Ix lajvi chiꞌ, ix schelanqꞌue vin̈ yuneꞌ ix chiꞌ, ix elta ix dꞌa yol scuarto vin̈aj Eliseo chiꞌ.

38 Ix lajvi chiꞌ, ix meltzajxi vin̈aj Eliseo chiꞌ dꞌa Gilgal ayic te ayem jun nivan vejel dꞌa yol yic Israel. A junel molanoch ebꞌ vin̈ schecabꞌ Dios dꞌa stzꞌey vin̈aj Eliseo chiꞌ, ix yalan vin̈ dꞌa vin̈ schecabꞌ icha tic: Acꞌqꞌue junoc nivan chen dꞌa yibꞌan̈ cꞌacꞌ, tza bꞌoan svael ebꞌ vin̈ schecabꞌ Dios tic, xchi vin̈.

39 Ay jun vin̈ dꞌa scal ebꞌ vin̈ checabꞌ chiꞌ ix bꞌat sayoj itaj. Ix ilchaj jun an̈ itaj icha an̈ caltacteꞌal cꞌum ay sat yuj vin̈. Ix smolancot sat chiꞌ vin̈ dꞌa yol jun spichul jucan. Axo yic ix jax vin̈, ix slesanem vin̈ dꞌa yol jun nivan chen chiꞌ, palta man̈ yojtacoc vin̈ tas. 40 Ix lajvi chiꞌ ix yacꞌan vin̈ dꞌa ebꞌ vin̈ schecabꞌ Dios chiꞌ. Axo ix syamanoch ebꞌ vin̈ svaꞌi, ix el yav ebꞌ vin̈, ix yalan ebꞌ vin̈:

—Mamin schecabꞌ Dios, a jun van co chiꞌan tic aybꞌat veneno dꞌa scal, xchi ebꞌ vin̈.

Yuj chiꞌ majxo schilaj ebꞌ vin̈. 41 Ix yalan vin̈aj Eliseo chiꞌ icha tic:

—Iqꞌueccot jabꞌoc ixim harina dꞌayin, xchi vin̈.

Ix yacꞌanem ixim vin̈ dꞌa yol chen chiꞌ, ix yalan vin̈:

—A ticnaic acꞌ va ebꞌ anima tic, xchi vin̈.

Axo ix schiꞌan ebꞌ, man̈xalaj tas ix icꞌan ebꞌ.

42 Axo dꞌa junel ix cꞌoch jun vin̈ vinac aj Baal-salisa, yedꞌnac 20 ixim pan cebada vin̈ bꞌobꞌil dꞌa ixim bꞌabꞌel sat cebada chiꞌ, ix yacꞌan vin̈ dꞌa vin̈aj Eliseo chiꞌ, yedꞌnacpax ixim jolom trigo vin̈ yaxto. Ix yalan vin̈aj Eliseo chiꞌ dꞌa vin̈ schecabꞌ:

—Acꞌ ixim pan chiꞌ sva ebꞌ anima tic, xchi vin̈.

43 Ix tacꞌvi vin̈ schecabꞌ vin̈ chiꞌ:

—¿Tocval ol yal vacꞌan jabꞌ tic dꞌa 100 anima tic? xchi vin̈. Ix yalanxi vin̈aj Eliseo chiꞌ:

—Acꞌ va ebꞌ anima tic, yujto toxo ix yal Jehová to ol va ebꞌ, aytopax ol canoc, xchi vin̈.

44 Ix lajvi chiꞌ, ix yacꞌan va ebꞌ anima chiꞌ vin̈ checabꞌ chiꞌ. Ayto ix cani, icha val ix aj yalan Jehová.