2 Ay junel, ay juntzan̈ ebꞌ soldado aj Siria ix bꞌat elcꞌal dꞌa yol yic Israel. Ix yelqꞌuejbꞌat jun ix cobꞌes unin ebꞌ. Ix och ix schecabꞌoc ix yetbꞌeyum vin̈aj Naamán chiꞌ. 3 Ix yalan ix cobꞌes unin chiꞌ dꞌa ix bꞌaj ayoch checabꞌoc chiꞌ:

—Comonoc sbꞌat vin̈ in patrón tic dꞌa jun vin̈ schecabꞌ Dios ay dꞌa Samaria, talaj sbꞌoxi vin̈ yuj jun yabꞌil tic, xchi ix.

4 Yuj chiꞌ ix bꞌat vin̈aj Naamán chiꞌ yal dꞌa vin̈ sreyal Siria tas ix yal ix cobꞌes chiꞌ. 5 Ix yalan vin̈ rey chiꞌ dꞌa vin̈:

—Vachꞌ tzach bꞌati, svacꞌbꞌat junoc carta dꞌa vin̈ sreyal Israel chiꞌ, xchi vin̈.

Icha chiꞌ ix aj sbꞌat vin̈aj Naamán chiꞌ, ix yicꞌanbꞌat nan̈al svajxaquil quintal qꞌuen plata vin̈ yedꞌ nan̈al schabꞌil quintal qꞌuen oro yedꞌ lajun̈ moj pichul. 6 Ix yicꞌanbꞌat jun carta chiꞌ vin̈ dꞌa vin̈ sreyal Israel chiꞌ, syalan vin̈ sreyal Siria chiꞌ dꞌa jun carta chiꞌ icha tic: Ayic ol a chaan in carta tic, ol ojtaquejeli to a in tzin checbꞌat vin̈ sat yajal ebꞌ in soldado scuchan Naamán tic dꞌayach, tzan̈tej vin̈ dꞌa jun lepra ayoch dꞌay, xchi vin̈ dꞌa scarta chiꞌ.

7 Ayic ix lajvi yilan jun carta chiꞌ vin̈ sreyal Israel chiꞌ, ix sn̈icꞌchitanbꞌat spichul vin̈ yuj schꞌoxaneli to tzꞌoch vin̈ dꞌa ilcꞌolal, ix yalan vin̈:

—Tocval Dios in, ¿tom a in syal vacꞌan schamel anima, ma svacꞌanpax sqꞌuinal ebꞌ, yuj chiꞌ schecjicot jun vin̈ vinac tic dꞌayin yic sviqꞌuel jun lepra tic dꞌa vin̈? Syalelcꞌochi to ay tas snaꞌ vin̈ rey chiꞌ dꞌa in patic, xchi vin̈.

8 Ayic ix yabꞌan vin̈aj Eliseo schecabꞌ Dios to ix sn̈icꞌchitejbꞌat spichul vin̈ rey chiꞌ, ix yalanbꞌat vin̈:

—¿Tas yuj ix a n̈icꞌchitejbꞌat a pichul? Checcot jun vin̈ chiꞌ dꞌayin, ol yilan vin̈ to ay schecabꞌ Dios dꞌa co chon̈abꞌ Israel tic, xchibꞌat vin̈.

9 Ix bꞌat vin̈aj Naamán chiꞌ yedꞌ scarruaje yedꞌ schej yedꞌ ebꞌ ajun yedꞌoc, ix cꞌoch lin̈an ebꞌ dꞌa stiꞌ spat vin̈aj Eliseo chiꞌ. 10 Ix schecanbꞌat vin̈ schecabꞌ vin̈aj Eliseo chiꞌ yal dꞌa vin̈aj Naamán chiꞌ icha tic: Ixic, bꞌat bꞌiquel uqueloc a bꞌa dꞌa aꞌ Jordán, icha chiꞌ ol aj yel yabꞌil lepra chiꞌ dꞌa a nivanil chiꞌ, xchi vin̈aj Eliseo chiꞌ.

11 Ix cot yoval vin̈aj Naamán chiꞌ, ix bꞌat vin̈, ix yalan vin̈:

—A val in naani to ol elta vin̈ in schaꞌa, ol qꞌue val lin̈an vin̈ slesalvi dꞌa Jehová sDiosal dꞌa vichan̈, ol yacꞌanecꞌ scꞌabꞌ vin̈ bꞌaj ayoch lepra chiꞌ dꞌayin, tzꞌelcan yabꞌil valani. 12 ¿Toc ecꞌbꞌal svachꞌil junoc aꞌ ay dꞌa Israel tic dꞌa yichan̈ aꞌ Abana yedꞌ aꞌ Farfar ay dꞌa Damasco? ¿Tom max yal bꞌat in bꞌicanel in bꞌa dꞌa yol aꞌ chiꞌ, tzin bꞌoxi? xchi vin̈.

Te aycot yoval vin̈, ix meltzaj vin̈. 13 Palta axo ebꞌ schecabꞌ vin̈ ajun yedꞌoc, ix yal ebꞌ dꞌa vin̈ icha tic:

—Mamin, qꞌuinaloc ay junoc tas ajaltac ix yal vin̈ schecabꞌ Dios dꞌayach, ¿tom max a cꞌanabꞌajej? Ocxo jun, an̈ej ix yal vin̈ to tza bꞌiquel a bꞌa tzach bꞌoxicani, xchi ebꞌ dꞌa vin̈.

14 Ichato chiꞌ ix bꞌat vin̈aj Naamán chiꞌ, uquel ix em vin̈ dꞌa yol aꞌ Jordán chiꞌ, icha ix aj yalan vin̈aj Eliseo schecabꞌ Dios. Ix bꞌoxican snivanil vin̈ chiꞌ, icha snivanil junoc unin, te vachꞌ ix ajcani. 15 Ix lajvi chiꞌ, ix bꞌat vin̈ yedꞌ ebꞌ ajun yedꞌ chiꞌ yil vin̈aj Eliseo chiꞌ. Ayic ix cꞌoch ebꞌ dꞌa yichan̈ vin̈, ix yalan vin̈aj Naamán chiꞌ icha tic:

—A ticnaic ix nachajel vuuj to malaj junocxo Dios dꞌa yolyibꞌan̈qꞌuinal tic, palta an̈ej val e Diosal a ex israel ex tic. Yuj chiꞌ, elocabꞌ dꞌa a cꞌool a chaan in silabꞌ svacꞌ tic dꞌayach, xchi vin̈.

16 Ix tacꞌvi vin̈aj Eliseo chiꞌ:

—Svacꞌ in tiꞌ dꞌa Jehová, aton ayin schecabꞌ, max in chalaj tas tzacꞌ chiꞌ, xchi vin̈.

Vachꞌchom ix ochn̈ej tean vin̈aj Naamán chiꞌ dꞌa vin̈, palta maj schalaj vin̈. 17 Yuj chiꞌ ix yalan vin̈aj Naamán chiꞌ icha tic:

—Tato icha chiꞌ jun, eloc val dꞌa a cꞌool a chaan vicꞌbꞌat chabꞌoc chejal lum luum yic Israel tic, yujto a in a checabꞌ in tic, man̈xa junocxo dios bꞌaj ol vacꞌ in silabꞌ, palta to an̈ej dꞌa Jehová sDiosal Israel.^* 18 An̈ej val jun tzin cꞌan dꞌa Jehová to tzin yacꞌ nivancꞌolal, yujto ayic ol bꞌat vin̈ in reyal yaqꞌuem sbꞌa dꞌa stemplo sdiosal scuch Rimón, ol och quetzquetz vin̈ dꞌa in cꞌabꞌ, an̈ejtonaꞌ ol in em cuman yedꞌ vin̈ dꞌa templo chiꞌ, yacꞌocabꞌ nivancꞌolal Jehová dꞌa in patic yuj jun chiꞌ, xchi vin̈aj Naamán chiꞌ.

19 Ix tacꞌvi vin̈aj Eliseo chiꞌ:

—Man̈ acꞌ pensar, ixic, xchi vin̈.

Ix bꞌat vin̈aj Naamán chiꞌ. Palta quenanto sbꞌat vin̈, 20 ix snaan vin̈aj Giezi schecabꞌ vin̈aj Eliseo chiꞌ: ¿Tas yuj ton̈ej ix schabꞌat vin̈aj Naamán aj Siria vin̈ vajalil tic, malaj jabꞌoc tas ix yacꞌcan vin̈? Svacꞌ in tiꞌ dꞌa Jehová to bꞌat in tzacꞌvej vin̈, yaln̈ej tas ol viqꞌuecꞌ dꞌa vin̈, xchi vin̈.

21 Ix bꞌat lemnaj vin̈aj Giezi chiꞌ. Axo ix yilancot vin̈aj Naamán to van scot vin̈ dꞌa spatic, ix emta vin̈ dꞌa yol scarruaje, ix cot vin̈ scha vin̈, ix scꞌanbꞌan vin̈:

—¿Mantoc ay tas ix uji? xchi vin̈.

22 Ix tacꞌvi vin̈aj Giezi chiꞌ icha tic: Maay, malaj tasi, palta a vin̈ vajalil ix in checancot val dꞌayach to ato val scꞌoch chavan̈ ebꞌ quelemtac schecabꞌ Dios spetoj dꞌa tzalquixtac yic Efraín. Yuj chiꞌ scꞌan vin̈ dꞌayach to tzacꞌ oxeoc arroba qꞌuen plata yedꞌ cha mojan̈oc cꞌapac pichul yuj ebꞌ vin̈, xchi vin̈.

23 Ix tacꞌvi vin̈aj Naamán chiꞌ:

—Comonoc tzꞌel dꞌa a cꞌool tza cha val vaqueoc arroba qꞌuen plata tic, xchi vin̈.

Yacbꞌan van yalan vin̈ chiꞌ, ix schecan vin̈ acꞌchajem qꞌueen yedꞌ cha moj cꞌapac pichul chiꞌ dꞌa yol chabꞌ coxtal, ix yacꞌancot chavan̈ schecabꞌ vin̈ yedꞌ vin̈aj Giezi chiꞌ. 24 Ayic ix cꞌoch ebꞌ dꞌa tzalan bꞌaj ayecꞌ vin̈aj Eliseo chiꞌ, ix yicꞌan ecꞌ vin̈aj Giezi tastac yedꞌnac ebꞌ schecabꞌ vin̈aj Naamán chiꞌ, ix scꞌubꞌancanel vin̈ dꞌa yol spat, ix schecan meltzaj ebꞌ vin̈. 25 Elan̈chamel ix javi vin̈ dꞌa vin̈aj Eliseo chiꞌ, ix scꞌanbꞌan vin̈aj Eliseo chiꞌ dꞌa vin̈:

—Giezi, ¿bꞌajtil ix ach xidꞌeqꞌui? xchi vin̈.

—Malaj bꞌaj ix in xidꞌecꞌ mamin, xchi vin̈aj Giezi chiꞌ.

26 Palta ix yalan vin̈aj Eliseo chiꞌ dꞌa vin̈ icha tic:

—Ayic ix emta jun vin̈ vinac dꞌa yol scarruaje ix cot vin̈ ul ach schaꞌa, ¿tocval maj yil in pixan jun chiꞌ tza naꞌa? A ticnaic, man̈ smojoc co chaan tumin yedꞌ pichul. Man̈ smojoc pax co manan teꞌ avbꞌen teꞌ, icha teꞌ olivo yedꞌ teꞌ uva, nocꞌ calnel, ma nocꞌ vacax, ma ebꞌ vin̈ checabꞌ yedꞌ ebꞌ ix checabꞌ. 27 Yuj jun tas ix a cꞌulej tic, a ticnaic, a slepra vin̈aj Naamán chiꞌ ol ochcan dꞌayach yedꞌ dꞌa ebꞌ in̈tilal dꞌa juneln̈ej, xchi vin̈.

Axo yic ix spucan sbꞌa vin̈aj Giezi yedꞌ vin̈aj Eliseo chiꞌ, ayxo lepra dꞌa vin̈, sacxon̈ej yilji snivanil vin̈ icha qꞌuen cheev.