—Ina val jun lugar bꞌaj ayon̈ ecꞌ edꞌ tic, te lodꞌan. 2 Yuj chiꞌ tzoc val el dꞌa a cꞌool tzon̈ a chabꞌat dꞌa stiꞌ aꞌ Jordán, sbꞌat co chꞌac junjunoc co teꞌ, sco bꞌoanqꞌue junoc pat bꞌaj tzon̈ aji, xchi ebꞌ vin̈.

—Ixiquec, xchi vin̈aj Eliseo chiꞌ.

3 —Tzoc yal a cꞌool tzach bꞌat quedꞌoc, xchi jun vin̈ dꞌa vin̈.

—Inye, ol in bꞌatoc, xchi vin̈.

4 Yuj chiꞌ ix bꞌat vin̈aj Eliseo chiꞌ yedꞌ ebꞌ vin̈ dꞌa stiꞌ aꞌ Jordán chꞌacoj teꞌ chiꞌ. 5 Ayic van schꞌacan teꞌ ebꞌ vin̈, ay jun vin̈ ix elta surnaj qꞌuen schꞌacabꞌ, ix bꞌatcan qꞌuen dꞌa yol a aꞌ chiꞌ, ix el yav vin̈:

—Ach in cꞌaybꞌumal. A jun qꞌuen chꞌacabꞌ tic hierro qꞌueen, in majanpax qꞌueen, xchi vin̈.

6 —¿Bꞌajtil ix bꞌat qꞌueen? xchi vin̈aj Eliseo chiꞌ.

Ix schꞌoxan vin̈ bꞌaj ix bꞌat qꞌueen chiꞌ. Ix xicanelta jun te teꞌ vin̈aj Eliseo chiꞌ, ix yacꞌanem teꞌ vin̈ dꞌa yol aꞌ, ix qꞌueul bꞌachnaj qꞌuen chꞌacabꞌ chiꞌ dꞌa sat aꞌ.

7 —Icꞌqꞌueta qꞌueen, xchi vin̈aj Eliseo chiꞌ dꞌa vin̈. Ix yacꞌanem scꞌabꞌ vin̈, ix yicꞌanqꞌueta qꞌueen vin̈.

8 A vin̈ sreyal Siria ayoch oval yuj vin̈ dꞌa Israel, ix slajtian sbꞌa vin̈ yedꞌ ebꞌ vin̈ yajalil ebꞌ vin̈ soldado smasanil bꞌajtil sbꞌoqꞌue scampamento ebꞌ vin̈. 9 Ix yalanbꞌat vin̈aj Eliseo dꞌa vin̈ sreyal Israel bꞌajtac ayecꞌ ebꞌ vin̈ aj Siria chiꞌ yic vachꞌ syacꞌ lista sbꞌa vin̈ bꞌajtac ayecꞌ ebꞌ vin̈ chiꞌ. 10 Ix schecanpaxbꞌat yilumal vin̈ sreyal Israel dꞌa juntzan̈ lugar bꞌaj syal vin̈ schecabꞌ Dios chiꞌ, yic syil ebꞌ vin̈ tas yaji, yuj chiꞌ tzijtum el ix scol sbꞌa ebꞌ vin̈.

11 A vin̈ sreyal Siria chiꞌ, ix te somchaj spensar vin̈, yuj chiꞌ ix yavtej ebꞌ vin̈ yajalil soldado vin̈, ix yalan vin̈:

—Alec dꞌayin mach junoc dꞌa co cal tic ayoch yedꞌ vin̈ sreyal Israel chiꞌ, xchi vin̈ dꞌa ebꞌ vin̈.

12 Ix tacꞌvi jun vin̈ yajal soldado icha tic:

—Malaj mach mamin, palta a vin̈aj Eliseo schecabꞌ Dios ayecꞌ dꞌa Israel chiꞌ, a vin̈ tzꞌalan dꞌa vin̈ rey masanil tas tzalaꞌ, vachꞌchom dꞌa elcꞌaltac tzalaꞌ, xchi vin̈.

13 Yuj chiꞌ ix yal vin̈ sreyal Siria chiꞌ:

—Ixiquec, bꞌat ilec bꞌajtil ayecꞌ vin̈aj Eliseo chiꞌ, ol vacꞌanbꞌat jayvan̈oc in soldado yic bꞌat tzecꞌjicot vin̈, xchi vin̈.

Axo ix aj yalji dꞌa vin̈ rey chiꞌ to a dꞌa Dotán ayecꞌ vin̈aj Eliseo chiꞌ. 14 Yuj chiꞌ ix yacꞌanbꞌat jun n̈ilan̈ ebꞌ vin̈ soldado vin̈ yedꞌ ebꞌ vin̈ ayqꞌue dꞌa yibꞌan̈ chej yedꞌ carruaje yic oval. Dꞌacꞌvalil ix cꞌoch ebꞌ vin̈ dꞌa Dotán chiꞌ, ix yoyan sbꞌa ebꞌ vin̈ dꞌa spatictac chon̈abꞌ chiꞌ. 15 Ayic ix sacbꞌi, ix qꞌue vaan vin̈ schecabꞌ vin̈aj Eliseo chiꞌ. Ayic ix elta vin̈, ix yilan vin̈ to man̈xo jantacoc soldado oyanecꞌ dꞌa spatictac chon̈abꞌ chiꞌ, ay nocꞌ chej yedꞌ carruaje yic oval. Yuj chiꞌ ix bꞌat vin̈ yal dꞌa vin̈aj Eliseo chiꞌ:

—Ay mamin, ¿tas val ol co cꞌulej? xchi vin̈.

16 Ix tacꞌvi vin̈aj Eliseo chiꞌ:

—Man̈ ach xivoc, yujto ecꞌalto sbꞌisul ebꞌ ayecꞌ quedꞌoc dꞌa yichan̈ ebꞌ vin̈ chiꞌ, xchi vin̈.

17 Ix och ijan vin̈aj Eliseo chiꞌ slesalvi dꞌa Jehová icha tic: Mamin tzin cꞌan dꞌayach to tza jac sat vin̈ in checabꞌ tic, xchi vin̈. Ix jacji sat vin̈ checabꞌ chiꞌ yuj Jehová, ix yilan vin̈ to a dꞌa sattac vitz yedꞌ dꞌa jolomtac vitz, toxon̈ej oyancot soldado dꞌa yibꞌan̈ chej yedꞌ dꞌa yoltac carruaje nabꞌa cꞌacꞌ, oyanoch dꞌa spatic yichan̈ vin̈aj Eliseo chiꞌ.

18 Ayic van sjavi ebꞌ vin̈ sirio chiꞌ yacꞌ oval, ix scꞌanan vin̈aj Eliseo chiꞌ dꞌa Jehová: Mamin tzin cꞌan dꞌayach to tza mac sat ebꞌ vin̈ tic, xchi vin̈.

Axo Jehová ix macan sat ebꞌ vin̈ soldado ajcꞌol chiꞌ, icha ix aj scꞌanan vin̈aj Eliseo chiꞌ. 19 Ix lajvi chiꞌ ix bꞌat vin̈aj Eliseo chiꞌ yal dꞌa ebꞌ vin̈:

—Man̈oclaj jun bꞌe yedꞌ jun chon̈abꞌ tic tze sayaꞌ. Ochan̈ec tzacꞌan vuuj, ol ex vicꞌbꞌat bꞌaj ayecꞌ jun vin̈ tze say chiꞌ, xchi vin̈ dꞌa ebꞌ vin̈.

Ix yicꞌanbꞌat ebꞌ vin̈ vin̈ dꞌa Samaria. 20 Ayic toxo ix och ebꞌ vin̈ dꞌa yol chon̈abꞌ chiꞌ, ix lesalvi vin̈ icha tic: Mamin Jehová, jac sat ebꞌ vin̈ yic syal yilan ebꞌ vin̈, xchi vin̈. Ix jacji sat ebꞌ vin̈ chiꞌ. Ix yilan ebꞌ vin̈ to a dꞌa yol chon̈abꞌ Samaria ayecꞌ ebꞌ vin̈. 21 Ayic ix yilan ebꞌ vin̈ chiꞌ vin̈ sreyal Israel, ix scꞌanbꞌan vin̈ dꞌa vin̈aj Eliseo chiꞌ.

—Mamin, ¿tzam yal in milancham ebꞌ vin̈ tic? xchi vin̈.

22 Ix yalan vin̈aj Eliseo chiꞌ:

—Maay, man̈ a milchamlaj ebꞌ vin̈. Qꞌuinaloc ay ebꞌ syamchaj uuj dꞌa oval, ¿tom tza milcham ebꞌ? Acꞌ va ebꞌ vin̈, tzacꞌan yucꞌ aꞌ ebꞌ vin̈, tzacꞌan meltzaj ebꞌ vin̈ dꞌa vin̈ yajalil, xchi vin̈.

23 Ix bꞌo jun nivan vael, ix va ebꞌ vin̈, ix yucꞌan aꞌ ebꞌ vin̈. Ix lajvi chiꞌ ix yalan vin̈ sreyal Israel to spax ebꞌ vin̈, ix meltzaj ebꞌ vin̈ bꞌaj ayecꞌ vin̈ yajalil chiꞌ. Atax taꞌ ix yactej ebꞌ vin̈ soldado sirio yochta yic syixtan chon̈abꞌ Israel yedꞌ yochta ebꞌ elcꞌal.

24 Ix lajvi yecꞌ jun tiempoal, a vin̈aj Ben-adad sreyal Siria, ix molbꞌej masanil ebꞌ vin̈ soldado vin̈, ix bꞌat yoyanqꞌue Samaria ebꞌ vin̈ yic syacꞌan oval yedꞌoc. 25 Yuj chiꞌ ix em jun nivan vejel dꞌa Samaria chiꞌ. Ix te qꞌue stojol masanil tastac, yujto te vachꞌ yajoch oyan ebꞌ vin̈ aj Siria chiꞌ dꞌa spatic chon̈abꞌ chiꞌ. A junoc sjolom nocꞌ bꞌuru, 80 ciclo plata stojol, axo junoc vaso stzaꞌ nocꞌ paramuch, oyeꞌ ciclo plata stojol.

26 Ay jun cꞌu van sbꞌeyecꞌ vin̈ sreyal Israel chiꞌ dꞌa yibꞌan̈ smuroal chon̈abꞌ chiꞌ, ix avajbꞌat jun ix ix dꞌa vin̈:

—Mamin rey, colin, xchi ix.

27 Ix tacꞌvi vin̈ rey chiꞌ:

—Tato max ach colji yuj Jehová, ¿tom a into val tic ol ach in coloꞌ? ¿Tom ol yal vacꞌan ixim a trigo yedꞌ a vino? 28 ¿Tas tzach icꞌani? xchi vin̈.

Ix tacꞌvi ix:

—A jun ix ix tic, ix yal ix dꞌayin: Acꞌ jun uneꞌ tic co chi ticnaic, axo qꞌuicꞌan sco chiꞌan jun vic tic, xchi ix. 29 Yuj chiꞌ co tzꞌan̈ vuneꞌ chiꞌ, co chiꞌani. Axo dꞌa junxo cꞌu chiꞌ, valan dꞌa ix to syacꞌ yuneꞌ ix chiꞌ co chiꞌa, palta toxo ix scꞌubꞌejel ix, xchi ix dꞌa vin̈ rey chiꞌ.

30 Ayic ix yabꞌan vin̈ rey tas ix yal jun ix chiꞌ, ix sn̈icꞌchitanbꞌat spichul vin̈ yuj schꞌoxanel scuscꞌolal. Yacbꞌan van yecꞌ vin̈ dꞌa yibꞌan̈ muro chiꞌ, ix yilan ebꞌ anima ayecꞌ dꞌa slacꞌanil chiꞌ to ayoch pichul ya sva yuj vin̈ dꞌa yol spichul. 31 Ix yalan vin̈ rey chiꞌ: Cotocabꞌcan yoval scꞌol Dios dꞌa vibꞌan̈ tato max viqꞌuel sjolom vin̈aj Eliseo yuninal vin̈aj Safat dꞌa jun cꞌu tic, xchi vin̈.

32 Ix schecanbꞌat jun vin̈ vinac vin̈ rey chiꞌ dꞌa vin̈aj Eliseo chiꞌ. Cꞌojanem vin̈ dꞌa yol spat yedꞌ ebꞌ vin̈ yichamtac vinaquil chon̈abꞌ. Ayic manto cꞌochlaj jun vin̈ schecabꞌ vin̈ rey chiꞌ, ix yalan vin̈ dꞌa ebꞌ vin̈ ichamtac vinac chiꞌ:

—Ilec tonabꞌi, ix scheccot jun vin̈ schecabꞌ jun vin̈ milum anima chiꞌ yic tzul yiqꞌuel in jolom vin̈. Palta maclejec eyabꞌ tas ol valaꞌ: Ayic ol javoc vin̈ chiꞌ, ol e maquel teꞌ puerta tic, vachꞌ tzeyutej e macan teꞌ, tzacꞌan sjavi vin̈ rey dꞌa spatic vin̈, xchi vin̈.

33 Vanto val slolon vin̈ ix javi vin̈ schecabꞌ vin̈ rey chiꞌ, ajun pax vin̈ rey chiꞌ, ix yalan vin̈ rey chiꞌ:

—A jun yaelal tic, a Jehová ix acꞌancoti. ¿Tasto val sco te tan̈vej ticnaic yic tzon̈ scolani? xchi vin̈.