—Abꞌec val tas syal Jehová: A qꞌuicꞌan yabꞌ icha tic, a dꞌa spuertail Samaria tic, a junoc almul ixim harina, jun ciclo plata stojol ixim. Chabꞌ almul pax ixim cebada dꞌa jun ciclo qꞌueen, xchi Jehová, xchi vin̈.

2 Ix tacꞌvi jun vin̈ stan̈van vin̈ rey chiꞌ icha tic:

—Vachꞌchom sjacvi sventenail satchaan̈ yuj Jehová, palta max ujilaj icha tzal chiꞌ, xchi vin̈.

Ix tacꞌvi vin̈aj Eliseo chiꞌ:

—Olto il val jun chiꞌ, palta man̈xo ol a valaj ixim, xchi vin̈.

3 A dꞌa jun tiempoal chiꞌ, ay chan̈van̈ ebꞌ vin̈ ayoch lepra dꞌay, ayel ebꞌ vin̈ dꞌa stiel chon̈abꞌ chiꞌ, ix yal-lan ebꞌ vin̈ dꞌay junjun:

—¿Tas val sco cꞌulej dꞌa tic? Ton̈ej cꞌojan on̈ em co tan̈van cham co bꞌa. 4 Tato tzon̈ och dꞌa yol chon̈abꞌ tic, yovalil tzon̈ cham yuj vejel. Tato tzon̈ can cꞌojan dꞌa tic, yovalil ol on̈ champaxoc. A ticnaic coyec dꞌa scampamento ebꞌ sirio, talaj tzon̈ yacꞌ nivancꞌolal ebꞌ, max on̈ smil-laj ebꞌ. Tato maay jun, toxonton yic chamel caji, xchi ebꞌ vin̈.

5 Ayic numnonxo sqꞌuicꞌbꞌi, ix bꞌat ebꞌ vin̈ dꞌa scampamento ebꞌ sirio chiꞌ. Axo ix cꞌoch ebꞌ vin̈, ix yilan ebꞌ vin̈ man̈xa junoc mach ayeqꞌui. 6 Yujto a Jehová ix acꞌan yabꞌ ebꞌ soldado sirio scꞌan̈ yecꞌ carruaje yedꞌ nocꞌ chej yedꞌ pax jun nivan n̈ilan̈ soldado. A yalan ebꞌ sirio chiꞌ to a vin̈ sreyal ebꞌ israel ix tupan ebꞌ vin̈ sreyal hitita yedꞌ vin̈ sreyal Egipto yic syacꞌan oval yedꞌ ebꞌ yalani. 7 Yuj chiꞌ ayic van sqꞌuicꞌbꞌi ix bꞌat ebꞌ elelal, ix yactancan scampamento ebꞌ yedꞌ smantiado yedꞌ nocꞌ chej yedꞌ scarruaje ebꞌ. An̈ej ebꞌ ix scol sbꞌa. 8 Ayic ix cꞌoch ebꞌ vin̈ ayoch lepra chiꞌ dꞌay dꞌa stitac campamento chiꞌ, ix och ebꞌ vin̈ dꞌa yol junoc mantiado, ix va ebꞌ vin̈, ix yucꞌan aꞌ ebꞌ vin̈. Ix yicꞌanelta qꞌuen oro ebꞌ vin̈, qꞌuen plata yedꞌ pichul, ix bꞌat ebꞌ vin̈ scꞌubꞌejeli. Ix lajvi chiꞌ ix meltzaj ebꞌ vin̈, ix ochxi ebꞌ vin̈ dꞌa yol junxo mantiado, ix yicꞌanelta ebꞌ vin̈ tastac ay dꞌa yool, ix bꞌatxi ebꞌ vin̈ scꞌubꞌejeli. 9 Ix laj yalan ebꞌ vin̈ dꞌay junjun:

—Man̈ vachꞌoc jun van co cꞌulan tic. A ticnaic smoj val quicꞌanbꞌat abꞌix, palta ichn̈ejtaꞌ cajeqꞌui. Tato sco tan̈vej, ato qꞌuicꞌan bꞌat calaꞌ, ay ta tas scot dꞌa quibꞌan̈. Vachꞌ to bꞌat calec dꞌa vin̈ rey, xchi ebꞌ vin̈.

10 Yuj chiꞌ ix bꞌat ebꞌ vin̈, ix yavtan ebꞌ vin̈ stan̈vumal stiꞌ chon̈abꞌ chiꞌ ebꞌ vin̈, ix yalan ebꞌ vin̈ icha tic:

—Ix on̈ xidꞌecꞌ dꞌa scampamento ebꞌ sirio, man̈xa junoc mach ayeqꞌui, man̈xa junoc mach scabꞌ sloloni, axon̈ej nocꞌ chej yedꞌ nocꞌ bꞌuru etzjabꞌcani. Axo smantiado ebꞌ, icha ix aj sbꞌoancan ebꞌ, icha chiꞌ yajcani.

11 Ix bꞌat ebꞌ vin̈ stan̈vumal stiꞌ chon̈abꞌ chiꞌ yavtej ebꞌ vin̈ stan̈van spalacio vin̈ rey. 12 Ix alji yabꞌ vin̈ rey chiꞌ, yuj chiꞌ ix qꞌue vaan vin̈ dꞌacꞌvalil chiꞌ, ix yalan vin̈ dꞌa ebꞌ vin̈ ayoch dꞌa opisio yedꞌoc:

—Ol val dꞌayex tas snibꞌej ebꞌ sirio chiꞌ tzon̈ yutej, yujto yojtac ebꞌ to van co cham yuj vejel, yuj chiꞌ ix yactejcan scampamento ebꞌ chiꞌ, ix scꞌubꞌanel sbꞌa ebꞌ dꞌa caltac teꞌ, yuj chiꞌ tato tzon̈ el dꞌa spatiquel chon̈abꞌ tic, ol on̈ syam ebꞌ dꞌa pitzanil, axo yochcancot ebꞌ dꞌa yol chon̈abꞌ tic, xchi vin̈ rey chiꞌ.

13 Ix yalan junoc ebꞌ vin̈ schecabꞌ vin̈ icha tic:

—Bꞌatocabꞌ jayvan̈oc vinac yilaꞌ yedꞌ ovan̈oc nocꞌ chej ayto ecꞌ tic, ol quilani tas ix uji chiꞌ. Tato scham ebꞌ, mato maay, lajann̈ej, yujto ay smay bꞌaj sbꞌat ebꞌ chiꞌ, ay pax smay dꞌa tic, xchi vin̈ checabꞌ chiꞌ.

14 Yuj chiꞌ ix yicꞌbꞌat chabꞌ carruaje ebꞌ yedꞌ nocꞌ chej, ix checjibꞌat ebꞌ yuj vin̈ rey chiꞌ, yic bꞌat yil ebꞌ bꞌajtil ix bꞌat ebꞌ sirio chiꞌ. Ix yalan vin̈ dꞌa ebꞌ icha tic: Bꞌat ilec tas val yaji, xchi vin̈. 15 Ix bꞌat tzacꞌan ebꞌ dꞌa yoclem ebꞌ sirio chiꞌ, masanto ix cꞌoch ebꞌ dꞌa aꞌ Jordán. Ix yilan ebꞌ to aycan spichul ebꞌ dꞌa yoltac bꞌe yedꞌ syamcꞌabꞌ ebꞌ ayic van yel ebꞌ scol sbꞌa yalani. Elan̈chamel ix meltzaj ebꞌ checabꞌ chiꞌ, ix ul yalan ebꞌ dꞌa vin̈ rey chiꞌ tas ix yil ebꞌ chiꞌ. 16 Ix lajvi chiꞌ ix elta masanil ebꞌ anima dꞌa yol chon̈abꞌ chiꞌ, ix yicꞌanelta masanil tastac ay dꞌa yol scampamento ebꞌ sirio chiꞌ ebꞌ, ix yicꞌancot ebꞌ. Ix elcꞌoch icha ix aj yalan Jehová, a jun almul ixim harina, jun ciclo plata stojol ixim. Chabꞌ almul pax ixim cebada dꞌa jun ciclo plata chiꞌ.

17 Ix yalan vin̈ rey dꞌa vin̈ stan̈vumal to scan vin̈ stan̈vej spuertail chon̈abꞌ chiꞌ, palta ix bꞌat ebꞌ anima dꞌa yibꞌan̈ vin̈, ix telvican vin̈ dꞌa scal yoc ebꞌ, ix cham vin̈, icha ix aj yalan vin̈aj Eliseo schecabꞌ Dios dꞌa vin̈ ayic ix xidꞌecꞌ vin̈ rey lolonel yedꞌ vin̈aj Eliseo chiꞌ.

18 Ix elcꞌoch icha ix aj yalan vin̈aj Eliseo chiꞌ to a dꞌa spuertail chon̈abꞌ Samaria yabꞌ icha tic qꞌuicꞌan, schon̈chaj ixim harina, a jun almul ixim, jun ciclo plata stojol. Chabꞌ almul pax ixim cebada dꞌa jun ciclo qꞌueen, xchi vin̈. 19 Axo jun vin̈ stan̈vumal vin̈ rey chiꞌ, ix tacꞌvi vin̈ dꞌa vin̈ schecabꞌ Dios chiꞌ: Vachꞌchom sjacvi sventenail satchaan̈ yuj Jehová, palta max ujilaj icha tzal chiꞌ, xchi vin̈. Ix tacꞌvi vin̈aj Eliseo: Olto il val jun chiꞌ, palta man̈xo ol a valaj ixim, xchi vin̈. 20 Ichaton chiꞌ ix aji, yujto a ebꞌ anima ix tecꞌancham vin̈ dꞌa spuertail chon̈abꞌ chiꞌ.