Ix acꞌjixi smacbꞌen ix aj Sunem
8
Ix yalan vin̈aj Eliseo dꞌa ix aj Sunem, aton ix pitzvinacxi yuneꞌ yuj vin̈, ix yalan vin̈ dꞌa ix icha tic: Ixic, bꞌat cajnajan dꞌa junocxo nación yedꞌ ebꞌ cajan dꞌa a pat, yujto ix yal Jehová to ol yacꞌcot junoc nivan vejel dꞌa co nación tic, uqueꞌ abꞌil ol yacꞌaꞌ, xchi vin̈ dꞌa ix. 2 Yuj chiꞌ ix scꞌanabꞌajej ix sbꞌati, icha ix aj yalan vin̈ chiꞌ. Ix bꞌatcan ix dꞌa yol smacbꞌen ebꞌ filisteo. Uqueꞌ abꞌil ix can cajan ix taꞌ. 3 Ix lajvi chiꞌ, ix paxta ix dꞌa smacbꞌen ebꞌ filisteo chiꞌ. Ix bꞌat ix dꞌa yichan̈ vin̈ sreyal Israel yic scꞌananxi spat ix yedꞌ sluum. 4 Van slolon vin̈ rey chiꞌ yedꞌ vin̈aj Giezi schecabꞌ vin̈aj Eliseo chiꞌ, ix yalan vin̈ rey chiꞌ dꞌa vin̈ icha tic: Al vabꞌ masanil tastac satubꞌtac ix scꞌulej vin̈aj Eliseo chiꞌ, xchi vin̈. 5 A val yic van yalan vin̈aj Giezi chiꞌ yabꞌixal tas ix aj yacꞌanxi pitzvoc jun yuneꞌ jun ix ix chiꞌ vin̈aj Eliseo chiꞌ, ix javi ix yal yuj sluum yedꞌ spat. Yuj chiꞌ ix yalan vin̈aj Giezi chiꞌ dꞌa vin̈ rey chiꞌ icha tic:—Mamin rey, aton val jun ix ix tic svalaꞌ, aton jun yuneꞌ ix tic pitzvinacxi yuj vin̈aj Eliseo chiꞌ, xchi vin̈ dꞌa vin̈ rey chiꞌ.
6 Ix scꞌanbꞌan vin̈ rey chiꞌ dꞌa ix, ix yalan jun abꞌix chiꞌ ix dꞌa vin̈. Ix lajvi chiꞌ ix schecan junoc ebꞌ schecabꞌ vin̈ rey chiꞌ yic bꞌat acꞌjixi smacbꞌen ix ix chiꞌ yedꞌ masanil sat avbꞌen ix el dꞌa luum yictax ix el ix dꞌa yol nación chiꞌ masanto ix meltzajxi ix.
Ix och vin̈aj Hazael reyal dꞌa Siria
7 Ay junel ix bꞌat vin̈aj Eliseo dꞌa Damasco. A dꞌa jun tiempoal chiꞌ, te penaay vin̈aj Ben-adad sreyal Siria. Ix alchaj dꞌa vin̈ to ix cꞌoch vin̈ schecabꞌ Jehová taꞌ. 8 Yuj chiꞌ ix yal vin̈ rey chiꞌ dꞌa vin̈aj Hazael schecabꞌ icha tic:
—Icꞌbꞌat junoc silabꞌ tzach bꞌat il vin̈ schecabꞌ Jehová chiꞌ. Tza cꞌanan dꞌa vin̈ to scꞌanbꞌej vin̈ dꞌa Jehová chiꞌ vuuj, tato olto in bꞌoxoc yuj jun yaelal tic, xchi vin̈.
9 Ix bꞌat vin̈aj Hazael chiꞌ yil vin̈aj Eliseo chiꞌ. Ix yicꞌanbꞌat silabꞌ vin̈, aton tas te vachꞌ tzꞌel dꞌa Damasco chiꞌ, 40 nocꞌ camello cuchjinac silabꞌ chiꞌ. Ayic ix cꞌoch vin̈ dꞌa yichan̈ vin̈aj Eliseo chiꞌ, ix yalan vin̈:
—A vin̈ a checabꞌ aj Ben-adad sreyal Siria, a vin̈ tzin checancoti yic tzul in cꞌanbꞌan dꞌayach, tom olto bꞌoxoc scꞌol vin̈ yuj jun yaelal ayoch dꞌay, mato man̈xo, xchi vin̈.
10 Ix tacꞌvi vin̈aj Eliseo chiꞌ:
—Ixic, tzalan dꞌa vin̈ to ol bꞌoxoc scꞌol vin̈ yuj jun yaelal chiꞌ, palta ix yal Jehová to ol chamxon̈ej vin̈, xchi vin̈.
11 A val dꞌa jun rato chiꞌ, ix te och qꞌuelan vin̈aj Eliseo chiꞌ dꞌa sat vin̈aj Hazael chiꞌ, masanto ix qꞌuixvi vin̈. Ix lajvi chiꞌ ix ocꞌqꞌue vin̈ schecabꞌ Dios chiꞌ. 12 Yuj chiꞌ ix scꞌanbꞌej vin̈aj Hazael chiꞌ dꞌa vin̈:
—Mamin ¿tas yuj tzach oqꞌui? xchi vin̈.
Ix tacꞌvi vin̈aj Eliseo chiꞌ:
—Vojtac val to ol acꞌ val chucal dꞌa ebꞌ vetisraelal, ol acꞌoch scꞌacꞌal scuartel ebꞌ, ol a milancham ebꞌ quelemtac dꞌa oval. Ol a milancham ebꞌ cotac unin, ol a tecanelta yol scꞌol ebꞌ ix yabꞌix, xchi vin̈.
13 Ix yalan vin̈aj Hazael dꞌa vin̈ icha tic:
—A in tic te malaj jabꞌoc velcꞌochi, lajan in icha junoc nocꞌ tzꞌiꞌ. ¿Tas val ol aj in cꞌulan tas icha chiꞌ? xchi vin̈.
Ix tacꞌvi vin̈aj Eliseo chiꞌ dꞌa vin̈:
—Toxo ix yal Jehová dꞌayin to a ach ol ach ochcan sreyaloc Siria tic, xchi vin̈.
14 Ix lajvi chiꞌ ix spucan sbꞌa vin̈aj Hazael chiꞌ yedꞌ vin̈aj Eliseo chiꞌ, ix meltzaj vin̈ dꞌa vin̈ yajalil chiꞌ. Ix scꞌanbꞌan vin̈ rey chiꞌ dꞌa vin̈:
—¿Tas xchi vin̈aj Eliseo chiꞌ dꞌayach? xchi vin̈.
Ix tacꞌvi vin̈aj Hazael chiꞌ icha tic:
—Ix yal vin̈ dꞌayin tobꞌ ol ach bꞌoxoc yuj jun a yaelal tic, xchi vin̈.
15 Axo dꞌa junxo cꞌu, ix schꞌayan jun cꞌapac cꞌapac pim vin̈aj Hazael chiꞌ, ix bꞌat yacꞌanbꞌat cꞌapac vin̈ dꞌa sat vin̈ rey chiꞌ, ix tup yic vin̈. Icha chiꞌ ix aj scham vin̈ rey chiꞌ. Axo vin̈aj Hazael chiꞌ ix ochcan reyal sqꞌuexuloc vin̈.
Ochnac vin̈aj Joram reyal dꞌa Judá
16 Ayic oyexo abꞌil yoch vin̈aj Joram yuninal vin̈aj Acab reyal dꞌa Israel, ix schaanel yich vin̈aj Joram yuninal vin̈aj Josafat yacꞌan reyal dꞌa Judá. 17 A vin̈aj Joram chiꞌ, 32 abꞌil sqꞌuinal vin̈ ayic ix schaanel yich vin̈ yacꞌan reyal chiꞌ. Vajxaqueꞌ abꞌil ix yacꞌ reyal vin̈ dꞌa Jerusalén. 18 Palta aꞌ sbꞌeybꞌal ebꞌ vin̈ sreyal Israel yedꞌ sbꞌeybꞌal ebꞌ yin̈tilal vin̈aj Acab chiꞌ ix sbꞌeybꞌalej vin̈, yujto ix yicꞌ ix yisil vin̈aj Acab chiꞌ vin̈ yetbꞌeyumoc. Yuj chiꞌ, te chuc tas ix scꞌulej vin̈ dꞌa yichan̈ Jehová. 19 Palta maj yal-laj scꞌol Jehová ix satel Judá, yujto yacꞌnaccan stiꞌ dꞌa vin̈aj rey David schecabꞌ to ol ochn̈ejcan yin̈tilal vin̈ reyal.
20 A dꞌa stiempoal vin̈aj Joram chiꞌ, ayic ix yacꞌan reyal vin̈, ix yiqꞌuel sbꞌa ebꞌ aj Edom dꞌa yalan̈ smandar chon̈abꞌ Judá, ix yacꞌanoch sreyal ebꞌ dꞌa yol yicoꞌ. 21 Yuj chiꞌ ix bꞌat vin̈aj Joram chiꞌ yedꞌ masanil scarruaje yacꞌ oval yedꞌ ebꞌ aj Edom chiꞌ dꞌa Zair, palta a ebꞌ aj Edom chiꞌ, ix oymaj ebꞌ dꞌa spatic vin̈ yedꞌ ebꞌ yajal yaj dꞌa scarruaje vin̈ yic oval. Axo dꞌacꞌvalil ix qꞌue van vin̈, ix yacꞌan oval vin̈ yedꞌ ebꞌ edomita chiꞌ. Icha chiꞌ ix aj scolanel sbꞌa vin̈ dꞌa yol scꞌabꞌ ebꞌ, a ebꞌ soldado vin̈ chiꞌ, ix paxcan ebꞌ dꞌa spat. 22 Atax taꞌ ix yiquej sbꞌa ebꞌ aj Edom chiꞌ. An̈ejaꞌ pax dꞌa jun tiempoal chiꞌ ix yiqꞌuel sbꞌa chon̈abꞌ Libna dꞌa Judá chiꞌ.
23 A jantacto yabꞌixal vin̈aj Joram chiꞌ yedꞌ tastac ix scꞌulej vin̈, tzꞌibꞌabꞌilcan bꞌaj aycan yabꞌixal ebꞌ vin̈ sreyal Judá. 24 Ayic ix cham vin̈aj Joram chiꞌ, ix mucji snivanil vin̈ bꞌaj mucan ebꞌ smam yicham, aton dꞌa schon̈abꞌ vin̈aj David. Axo vin̈aj Ocozías vin̈ yuninal vin̈ ix ochcan reyal sqꞌuexuloc.
Ochnac vin̈aj Ocozías reyal dꞌa Judá
25 Ayic slajchavil abꞌil yoch vin̈aj Joram yuninal vin̈aj Acab reyal dꞌa Israel, ix schaanel yich vin̈aj Ocozías yacꞌan reyal dꞌa Judá. 26 A vin̈aj Ocozías chiꞌ, 22 abꞌil sqꞌuinal vin̈ ayic ix och vin̈ reyal chiꞌ, jun abꞌil ix yacꞌ reyal vin̈ dꞌa Jerusalén. Atalía sbꞌi ix snun vin̈, yixchiquin ix vin̈aj Omri sreyal Israel. 27 A vin̈aj Ocozías chiꞌ, a sbꞌeybꞌal vin̈aj Acab ix sbꞌeybꞌalej vin̈, te chuc tas ix scꞌulej vin̈ dꞌa yichan̈ Jehová, yujto smam icham vin̈aj Acab chiꞌ vin̈.
28 A vin̈aj Ocozías chiꞌ, junn̈ej ix yutej spensar vin̈ yedꞌ vin̈aj Joram yuninal vin̈aj Acab, ix yacꞌan oval ebꞌ vin̈ dꞌa Ramot dꞌa yol yic Galaad yedꞌ vin̈aj Hazael sreyal Siria, palta ix lajvi vin̈aj Joram chiꞌ yuj ebꞌ sirio chiꞌ. 29 Yuj chiꞌ ix cꞌochcan vin̈ dꞌa Jezreel yic syan̈tan sbꞌa vin̈ bꞌaj ix echnaj yuj ebꞌ sirio chiꞌ. Ix cꞌoch vin̈aj Ocozías chiꞌ yil vin̈ yujto ya yaj vin̈.