Ochnac vin̈aj Ocozías reyal
22
Masanil ebꞌ cajan dꞌa Jerusalén chiꞌ, ix yacꞌoch vin̈aj Ocozías ebꞌ reyal sqꞌuexuloc vin̈ smam chiꞌ, aton vin̈ slajvubꞌ yuninal vin̈aj Joram chi. A vin̈ ix och reyal chiꞌ, yujto a ebꞌ árabe yacꞌnac oval ebꞌ dꞌa Judá, milbꞌilcham ebꞌ vin̈ bꞌabꞌel yuninal vin̈aj Joram chiꞌ yuj ebꞌ. 2 Ayic ix schaanel yich vin̈aj Ocozías chiꞌ yacꞌan reyal, 22 abꞌil sqꞌuinal vin̈, junn̈ej abꞌil ix yacꞌ reyal vin̈ dꞌa Jerusalén. Atalía sbꞌi ix snun vin̈, yixchiquin ix vin̈aj Omri. 3-4 A vin̈aj rey Ocozías chiꞌ, a sbꞌeybꞌal vin̈aj Acab yedꞌ yin̈tilal ix sbꞌeybꞌalej vin̈. A ix snun vin̈ chiꞌ ix cuchbꞌan dꞌa chucal bꞌeybꞌal chiꞌ, yujto yisil ix vin̈aj Acab chiꞌ, yuj chiꞌ te chuc tas ix scꞌulej vin̈ dꞌa yichan̈ Jehová. Ayic toxo ix cham vin̈ smam vin̈ chiꞌ, a ebꞌ scꞌabꞌ yoc vin̈ chiꞌ ix cuchbꞌan dꞌa chucal, yuj chiꞌ ix juviel spensar vin̈ dꞌa juneln̈ej.5 Yujto ix scꞌanabꞌajej juntzan̈ pensar chiꞌ vin̈, yuj chiꞌ junn̈ej ix aj spensar vin̈ yedꞌ vin̈aj Joram sreyal Israel, aton vin̈ yuninal vin̈aj Acab. Yuj chiꞌ ix yacꞌ oval ebꞌ vin̈ yedꞌ vin̈aj Hazael sreyal Siria dꞌa chon̈abꞌ Ramot dꞌa yol yic Galaad. Palta ix lajvi vin̈aj Joram chiꞌ yuj ebꞌ sirio chiꞌ. 6 Yuj chiꞌ ix meltzajcot vin̈ dꞌa Jezreel yic tzul yan̈tan sbꞌa vin̈ taꞌ. Te ya yaj vin̈, yuj chiꞌ ix bꞌat vin̈aj Ocozías yil vin̈ dꞌa Jezreel chiꞌ.
A schamel vin̈aj Ocozías
7 A Dios toxo ix snaꞌa to ayic ol cꞌoch vin̈aj Ocozías chiꞌ yil vin̈aj Joram chiꞌ, ataꞌ ol cham vin̈. Ayic ayecꞌ vin̈ taꞌ, ix elta vin̈ yedꞌ vin̈aj Joram chiꞌ, yic syacꞌan oval ebꞌ vin̈ yedꞌ vin̈aj Jehú yuninal vin̈aj Nimsi, aton vin̈ ix sicꞌjiel yuj Jehová yic satanel masanil macan̈il ebꞌ yin̈tilal vin̈aj Acab chiꞌ. 8 Ayic van smilancham ebꞌ yin̈tilal vin̈aj Acab vin̈aj Jehú chiꞌ, ix ilchajelta ebꞌ vin̈ yajal yaj dꞌa Judá yedꞌ ebꞌ scꞌabꞌyoc vin̈aj Ocozías chiꞌ yuj vin̈, ix smilancham ebꞌ vin̈. A ebꞌ vin̈ chiꞌ ayoch yopisio ebꞌ vin̈ yedꞌ vin̈aj Ocozías chiꞌ. 9 Ix schecan vin̈ saychaj ecꞌ vin̈aj Ocozías chiꞌ, yujto a dꞌa Samaria ix scꞌubꞌejel sbꞌa vin̈, palta ix yamchaj vin̈ yuj ebꞌ, ix yicꞌanbꞌat vin̈ ebꞌ dꞌa vin̈aj Jehú chiꞌ, axo taꞌ ix miljicham vin̈ yuj vin̈. Ix yalan ebꞌ icha tic: Co muquec vin̈, yujto yin̈tilal vin̈ vin̈aj Josafat, vin̈ acꞌjinac servil Jehová dꞌa smasanil scꞌool, xchi ebꞌ. A dꞌa scal ebꞌ scꞌabꞌ yoc vin̈aj Ocozías chiꞌ, man̈xa junoc mach ix stecꞌbꞌej sbꞌa yochcan reyal.
Ochnac ix Atalía reinail dꞌa Judá
10 Ayic ix yabꞌan ix Atalía to toxo ix cham vin̈aj Ocozías yuneꞌ ix chiꞌ, ix schecan ix miljoccham masanil ebꞌ yin̈tilal ebꞌ vin̈ sreyal Judá chiꞌ. 11 Palta axo ix Joseba, elcꞌaltac ix aj yicꞌancanel vin̈aj Joás ix dꞌa scal juntzan̈xo ebꞌ vin̈ yuninal vin̈aj Ocozías van smiljicham chiꞌ. Ix scꞌubꞌanel vin̈ ix dꞌa ix Atalía chiꞌ. Ix bꞌat ix scꞌubꞌejel vin̈ dꞌa jun cuarto yic templo bꞌaj svay anima, axo jun ix ix, ix ilan qꞌuibꞌ vin̈ taꞌ. Yuj chiꞌ maj chamlaj vin̈. A ix Joseba chiꞌ yisil ix vin̈aj Joram, yanabꞌ ix vin̈aj Ocozías chiꞌ, yetbꞌeyum ix vin̈aj sacerdote Joiada. 12 A vin̈aj Joás chiꞌ, vaqueꞌ abꞌil ix cꞌubꞌajel vin̈ dꞌa stemplo Jehová yedꞌ jun ix ix, ix ilan qꞌuibꞌoc. Yacbꞌan chiꞌ axo ix Atalía chiꞌ, ayoch ix yajalil dꞌa jun chon̈abꞌ chiꞌ.