23
Ayic yuquil abꞌilxo vin̈aj Joás chiꞌ, axo vin̈aj sacerdote Joiada ix stecꞌbꞌej sbꞌa, ix schecan vin̈ avtaj masanil ebꞌ vin̈ yajal soldado, aton ebꞌ vin̈ yajal yaj dꞌa junjun ciento ebꞌ. Aton vin̈aj Azarías yuninal vin̈aj Jeroham, vin̈aj Ismael yuninal vin̈aj Johanán, vin̈aj Azarías yuninal vin̈aj Obed, vin̈aj Maasías yuninal vin̈aj Adaías yedꞌ vin̈aj Elisafat yuninal vin̈aj Zicri. Ix yalan vin̈ to junxon̈ej tzꞌaj spensar ebꞌ vin̈ yedꞌ vin̈. 2 Aton ebꞌ vin̈ tic ix bꞌat dꞌa masanil yol yic Judá, yic bꞌat smolbꞌan masanil ebꞌ vin̈ levita ebꞌ vin̈ yedꞌ ebꞌ vin̈ yajal yaj dꞌa junjun macan̈ yin̈tilal Israel, yic scot ebꞌ vin̈ smasanil dꞌa Jerusalén. 3 Masanil ebꞌ vin̈ ix smolbꞌej sbꞌa chiꞌ, ix sbꞌo jun strato ebꞌ vin̈ yedꞌ vin̈ rey dꞌa stemplo Dios.Ix yalan vin̈aj Joiada chiꞌ dꞌa ebꞌ vin̈ icha tic: Ina vin̈ yuninalcan vin̈ rey chamnac. Aton vin̈ yovalil tzꞌoch reyal, icha ajnac yacꞌancan stiꞌ Jehová yuj ebꞌ yin̈tilal vin̈aj David. 4 A ticnaic jun icha tic ol e cꞌulej: A ex sacerdote ex tic yedꞌ ex levita ex tic, a ex ton tzeyil munlajel dꞌa scꞌual icꞌoj ip, ox macan̈ ol ex ajoc. Jun macan̈ ex ol e tan̈vej stiꞌ stemplo Jehová. 5 Junxo macan̈ ex ol e tan̈vej stiꞌ spalacio vin̈ rey. A exxo junxo macan̈ ex, ol ex can e tan̈vej dꞌa spuertail cimiento. Axo masanil anima, vachꞌ scann̈ej ebꞌ dꞌa yol yamaqꞌuil stemplo Jehová tic. 6 Palta malaj junoc mach syal yoch dꞌa yol templo chiꞌ, an̈ej ebꞌ vin̈ sacerdote yedꞌ ebꞌ vin̈ levita ayoch dꞌa yopisio syal yochi, yujto sicꞌbꞌilel ebꞌ vin̈. Axo masanil anima, scan ebꞌ dꞌa yamaqꞌuil templo chiꞌ, icha yalan schecnabꞌil Jehová. 7 A exxo levita ex tic, ol ex och oyan dꞌa spatic vin̈ rey, junjun ex eyedꞌnacocabꞌ eyamcꞌabꞌ yic oval. A mach syacꞌ pural yecanoch sbꞌa dꞌa yol templo chiꞌ, bꞌen̈ej schami. A exxo tic, ajun exn̈ej yedꞌ vin̈ rey chiꞌ yaln̈ej bꞌaj sbꞌat vin̈, xchi vin̈aj Joiada chiꞌ.
8 A ebꞌ vin̈ levita chiꞌ yedꞌ masanil ebꞌ anima aj Judá chiꞌ, ix scꞌanabꞌajej ebꞌ masanil tas ix yal vin̈aj sacerdote Joiada chiꞌ. Junjun ebꞌ vin̈ yajal soldado chiꞌ, ayecꞌ ebꞌ vin̈ yedꞌ ebꞌ ayoch dꞌa yalan̈ smandar ebꞌ vin̈, aton ebꞌ smunlaj dꞌa yopisio dꞌa scꞌual icꞌoj ip yedꞌ ebꞌ tzꞌelcani, yujto maj chajiel-laj ebꞌ yuj vin̈aj Joiada chiꞌ ayic scꞌoch yorail yel ebꞌ. 9 Ix yacꞌanpax qꞌuen lanza vin̈aj Joiada chiꞌ yedꞌ maclabꞌ jul-labꞌ dꞌa ebꞌ vin̈ yajal yaj dꞌa junjun ciento ebꞌ soldado chiꞌ, aton juntzan̈ syamcꞌabꞌ vin̈aj rey David aycan dꞌa stemplo Dios. 10 Ix acꞌchajoch masanil ebꞌ vin̈ vinac chiꞌ yuj vin̈ dꞌa stzolal, junjun ebꞌ vin̈ yedꞌnac syamcꞌabꞌ yic oval, yic stan̈van vin̈ rey chiꞌ ebꞌ vin̈. Ix och oyan ebꞌ vin̈ dꞌa schan̈ pacꞌan̈il yamaqꞌuil stemplo Jehová chiꞌ yedꞌ bꞌaj ay jun altar yedꞌ dꞌa spuertail templo chiꞌ. 11 Ix lajvi chiꞌ, a vin̈aj sacerdote Joiada chiꞌ yedꞌ ebꞌ yuninal ix icꞌanelta vin̈ yuninalcan vin̈ rey chiꞌ. Ix yacꞌanqꞌue scorona vin̈ ebꞌ, ix yacꞌan jun yumal strato Dios ebꞌ dꞌa vin̈. Ix lajvi chiꞌ, ix yacꞌanqꞌue aceite ebꞌ dꞌa sjolom vin̈, ix yalan ebꞌ to reyxo vin̈. Ix qꞌue n̈ilnaj masanil anima yalani: Nivanocabꞌ yelcꞌoch vin̈ co rey, xchi ebꞌ.
12 Ayic ix yabꞌan ix Atalía chiꞌ yel yav ebꞌ anima chiꞌ yeqꞌui, syacꞌan bꞌinaj vin̈ rey chiꞌ ebꞌ, ix bꞌat ix dꞌa stemplo Jehová chiꞌ. 13 Axo ix yilan ix, a vin̈ rey chiꞌ lin̈anoch vin̈ dꞌa jun nivan yoyal stiꞌ stemplo Jehová chiꞌ, axo dꞌa stzꞌey vin̈ ayecꞌ ebꞌ vin̈ yajal yaji yedꞌ ebꞌ vin̈ spuꞌan qꞌuen trompeta. Masanil ebꞌ anima chiꞌ stzalaj ebꞌ. Ay ebꞌ spuꞌan qꞌuen strompeta, ay pax ebꞌ sbꞌitan yedꞌ syamcꞌabꞌ, aton ebꞌ scuchbꞌan bꞌit chiꞌ yic syalan vachꞌ lolonel ebꞌ dꞌa Dios. Yuj chiꞌ, ix stzilchitanbꞌat spichul ix, ix yalan ix icha tic:
—Pechum ex el yajal a ex tic. Pechum ex el yajal, xchi ix.
14 Palta a vin̈aj Joiada chiꞌ ix checan elta ebꞌ vin̈ yajal yaj dꞌa junjun ciento ebꞌ soldado, ix yalan vin̈ dꞌa ebꞌ vin̈ icha tic:
—Iqꞌuequel ix bꞌaj tzolan ex och chiꞌ. Yaln̈ej mach syacꞌoch sbꞌa yedꞌ ix, tze xicchamoc, xchi vin̈.
Toxo ix yal vin̈aj Joiada chiꞌ to man̈oc dꞌa stemplo Jehová smiljicham ix. 15 Ix syaman ix ebꞌ vin̈, ix yicꞌanel ix ebꞌ vin̈ dꞌa spuertail yic nocꞌ schej vin̈ rey, ataꞌ ix miljicham ix yuj ebꞌ vin̈.
16 Ix lajvi chiꞌ ix sbꞌoan jun trato vin̈aj sacerdote Joiada chiꞌ yedꞌ masanil ebꞌ anima chiꞌ yedꞌ vin̈ rey chiꞌ, ix yalan ebꞌ to ol ochcan ebꞌ schon̈abꞌoc Jehová. 17 Elan̈chamel ix bꞌat ebꞌ dꞌa stemplo Baal, ix bꞌat spojanem ebꞌ, ix smacꞌanpaxpoj altar ebꞌ yedꞌ juntzan̈ yechel comon dios. Axo vin̈aj Matán sacerdote yic Baal chiꞌ, a dꞌa yichan̈ altar chiꞌ ix smilcham vin̈ ebꞌ. 18 Ix yacꞌancan juntzan̈ munlajel dꞌa stemplo Jehová chiꞌ vin̈aj Joiada chiꞌ dꞌa yol scꞌabꞌ ebꞌ vin̈ sacerdote yedꞌ ebꞌ vin̈ levita, yic vachꞌ scꞌanabꞌajej ebꞌ vin̈ sbꞌoan munlajel acꞌbꞌilcan dꞌa yol scꞌabꞌ ebꞌ vin̈ yuj vin̈aj rey David. Aton yic sn̈usji silabꞌ tzꞌacꞌji dꞌa Jehová icha yalan ley tzꞌibꞌabꞌilcan yuj vin̈aj Moisés. Ay pax ebꞌ sbꞌitan dꞌa tzalajcꞌolal icha yutejnaccan vin̈aj rey David chiꞌ. 19 Ix yacꞌanpaxoch ebꞌ stan̈van stiꞌ stemplo Jehová chiꞌ vin̈, yic vachꞌ max och ebꞌ anima man̈ vachꞌoc yaj icha yalan ley. 20 Ix yavtancot masanil ebꞌ vin̈ yajalil ebꞌ soldado vin̈aj Joiada chiꞌ yedꞌ ebꞌ vin̈ nivac yelcꞌochi yedꞌ ebꞌ vin̈ yajal yaj dꞌa junjun chon̈abꞌ yedꞌ pax masanil anima chiꞌ. Ix yicꞌanelta vin̈ rey chiꞌ ebꞌ dꞌa stemplo Jehová, ix yicꞌanbꞌat vin̈ ebꞌ dꞌa spalacio ebꞌ rey. Ix och ebꞌ dꞌa jun puerta dꞌa yibꞌan̈. Ix yacꞌancanem cꞌojan vin̈ ebꞌ dꞌa scꞌojnubꞌ ebꞌ vin̈ rey chiꞌ. 21 Masanil ebꞌ anima, ix te tzalajqꞌue ebꞌ, yujto toxo ix xicjicham ix Atalía. Yuj chiꞌ juncꞌolal ix ajcan jun chon̈abꞌ chiꞌ.