4 Ix ecꞌ jabꞌoc tiempo, ix snaan vin̈aj rey Joás chiꞌ to sbꞌochajxi stemplo Jehová. 5 Yuj chiꞌ ix smolbꞌej ebꞌ vin̈ sacerdote vin̈ yedꞌ ebꞌ vin̈ levita, ix yalan vin̈ dꞌa ebꞌ vin̈ icha tic: Ixiquec dꞌa masanil chon̈abꞌ dꞌa yol yic Judá tic, sbꞌat e molbꞌan qꞌuen tumin, aton qꞌuen syacꞌtaxon ebꞌ quetchon̈abꞌ tic dꞌa junjun abꞌil yic sbꞌochajxi stemplo Dios tic. Aqꞌuec val eyip e bꞌati, xchi vin̈. Palta maj yacꞌoch val ebꞌ vin̈ dꞌa scꞌool sbꞌati. 6 Yuj chiꞌ ix avtaj vin̈aj sat sacerdote Joiada yuj vin̈aj rey Joás chiꞌ, ix yalan vin̈ icha tic:

—¿Tas yuj max acꞌoch dꞌa a cꞌol iptzitan ebꞌ vin̈ levita yic sbꞌat yicꞌcot qꞌuen ofrenda ebꞌ vin̈ dꞌa yol yic Judá yedꞌ dꞌa Jerusalén tic, icha yalnaccan vin̈aj Moisés schecabꞌ Jehová to masanil ebꞌ quetisraelal smolan qꞌuen tumin yic sbꞌochaj scajnubꞌ scaxail strato Jehová? xchi vin̈ rey chiꞌ.

7 Yujto a ix Atalía yedꞌ ebꞌ ochnac tzacꞌan yuj ix, ix ixtanbꞌat stemplo Jehová chiꞌ. A juntzan̈ yamcꞌabꞌ nivac yelcꞌoch yic templo chiꞌ, a ix scꞌan ebꞌ yic tzꞌoch ebꞌ ejmelal dꞌa jun comon dios Baal. 8 Yuj chiꞌ ix schec vin̈aj rey Joás chiꞌ bꞌochaj jun teꞌ caxa, axo dꞌa stielta stemplo Jehová ix schec vin̈ acꞌchajcan teꞌ. 9 Ix schecan vin̈ alchajel dꞌa masanil yol yic Judá yedꞌ dꞌa Jerusalén chiꞌ to tzꞌicꞌchajcot qꞌuen ofrenda albꞌilcan yuj vin̈aj Moisés schecabꞌ Jehová dꞌa tzꞌinan luum. 10 Masanil ebꞌ vin̈ yajal yaji yedꞌ masanil anima, dꞌa val smasanil scꞌol ebꞌ ix yaqꞌuem yofrenda dꞌa yol jun caxa chiꞌ, masanto ix bꞌudꞌji teꞌ yuj ebꞌ. 11 Axo ebꞌ vin̈ levita tzꞌicꞌanbꞌat teꞌ caxa chiꞌ dꞌa vin̈ rey chiꞌ, axo yic syilan vin̈ to bꞌudꞌanxo teꞌ, tzꞌavtaj vin̈ stzꞌibꞌum vin̈ yedꞌ jun vin̈ ayoch yopisio yuj vin̈ sat sacerdote. Secanelta qꞌuen tumin chiꞌ ebꞌ vin̈ dꞌa yol teꞌ caxa chiꞌ, sbꞌat yacꞌanxican teꞌ ebꞌ vin̈ bꞌaj aycan chiꞌ. Icha chiꞌ syutej ebꞌ vin̈ dꞌa junjun cꞌu, yuj chiꞌ nivan qꞌuen tumin chiꞌ ix molchaji. 12 A vin̈ rey chiꞌ yedꞌ vin̈aj sacerdote Joiada chiꞌ ix yacꞌ qꞌuen tumin chiꞌ ebꞌ vin̈ dꞌa ebꞌ vin̈ ayoch yilan munlajel sbꞌo dꞌa stemplo Jehová chiꞌ, yic saychaj ebꞌ vin̈ macꞌumpoj qꞌueen, ebꞌ vin̈ n̈icum teꞌ, ebꞌ vin̈ smunlaj dꞌa qꞌuen hierro yedꞌ dꞌa qꞌuen bronce, yic vachꞌ sbꞌochajxi templo chiꞌ. 13 Yuj chiꞌ a ebꞌ vin̈ tzꞌilan munlajel chiꞌ, a ebꞌ vin̈ scuchbꞌan ebꞌ vin̈ svachꞌ bꞌoanxi templo chiꞌ. Ix sbꞌo ebꞌ vin̈ icha val yajtaxon dꞌa yichbꞌanil, te vachꞌ ix ajxican sbꞌo yuj ebꞌ vin̈. 14 Axo yic ix lajvi sbꞌoel yuj ebꞌ vin̈, ix yicꞌanbꞌat qꞌuen tumin ebꞌ vin̈ ixto cani, ix yacꞌan qꞌuen ebꞌ vin̈ dꞌa vin̈ rey yedꞌ dꞌa vin̈aj sacerdote Joiada chiꞌ. Axo yedꞌ qꞌueen ix schec vin̈ rey chiꞌ bꞌochaj yamcꞌabꞌ yic templo chiꞌ, aton juntzan̈ scꞌanchaji ayic tzꞌoch ejmelal yedꞌ juntzan̈ scꞌanchaj dꞌa altar yuj silabꞌ sn̈usjitzꞌaoc, icha qꞌuen nivac cuchara yedꞌ juntzan̈xo yamcꞌabꞌ nabꞌa oro, ma plata. Yacbꞌan pitzanto vin̈aj sacerdote Joiada chiꞌ, sn̈usjitzꞌan̈ej silabꞌ dꞌa stemplo Jehová.

15 Palta ix ichamvinacax vin̈aj Joiada chiꞌ, 130 abꞌil sqꞌuinal vin̈ ayic ix cham vin̈. 16 A dꞌa schon̈abꞌ vin̈aj David ix mucji vin̈, aton bꞌaj smucchaj ebꞌ vin̈ rey. A tas ix scꞌulej vin̈ te vachꞌn̈ej yuj svachꞌiloc ebꞌ yetisraelal, vachꞌ ix yutej vin̈ yacꞌan servil Dios yedꞌ dꞌa stemplo.

17 Ayic toxo ix cham vin̈aj Joiada chiꞌ, ix javi ebꞌ vin̈ yajal yaj dꞌa Judá, ix em n̈ojan ebꞌ vin̈ dꞌa vin̈aj rey Joás chiꞌ yic smontan vin̈ ebꞌ vin̈. Axo ix aji, ix och dꞌa spensar vin̈ tas ix yal ebꞌ vin̈ chiꞌ. 18 Yuj chiꞌ ix yactejcan stemplo Jehová ebꞌ, aton sDiosal smam yicham ebꞌ. Axo dꞌa yechel comon dios Asera ix och ebꞌ ejmelal yedꞌ dꞌa juntzan̈xo comon dios. Yuj chiꞌ ix cot yoval scꞌol Jehová dꞌa ebꞌ aj Judá chiꞌ yedꞌ dꞌa ebꞌ aj Jerusalén chiꞌ. 19 Ix scheccot ebꞌ schecabꞌ Jehová yic tzul yalan ebꞌ to smeltzajxi ebꞌ dꞌa Jehová chiꞌ, palta majxo schalaj yabꞌ ebꞌ tas ix yal ebꞌ checabꞌ chiꞌ.

20 Yuj chiꞌ, ix och Yespíritu Dios dꞌa vin̈aj Zacarías yuninalcan vin̈aj Joiada chiꞌ. Ix qꞌue lin̈an vin̈ dꞌa jun lugar chaan̈, ix yalan vin̈ dꞌa masanil anima chiꞌ icha tic: A Jehová Dios tzꞌalan icha tic: ¿Tas yuj max e cꞌanabꞌajej in checnabꞌil? ¿Tas yuj tze saycot eyaelal dꞌa eyibꞌan̈? Yujto ix in eyactajcani, yuj chiꞌ ol ex vactejpaxcani, xchi Jehová, xchi vin̈.

21 Palta ix och ebꞌ ajcꞌolal smasanil dꞌa vin̈, ix snaan ebꞌ tas tzꞌaj smilancham vin̈ ebꞌ. Ix yalan vin̈aj rey Joás chiꞌ to sjulqꞌuenajcham vin̈ dꞌa yamaqꞌuil stemplo Jehová. Icha chiꞌ ix aj scham vin̈. 22 A vin̈aj Joás chiꞌ, majxo snacotlaj jantac svachꞌcꞌolal vin̈aj Joiada chiꞌ ix yacꞌ dꞌa vin̈, palta to ix schec miljoccham vin̈aj Zacarías vin̈, aton vin̈ yuninal vin̈aj Joiada chiꞌ. Ayic van scham vin̈aj Zacarías chiꞌ, ix yalan vin̈ icha tic: Aocabꞌ Jehová tzꞌilan jun tic, aꞌ ol acꞌan yovalil, xchi vin̈.

23 Ayic ix el yabꞌilal scham vin̈, ix javi ebꞌ soldado sirio yacꞌ oval yedꞌ vin̈aj Joás chiꞌ. Ix javi ebꞌ dꞌa Judá yedꞌ dꞌa Jerusalén. Tzijtum ebꞌ yajal yaj dꞌa Judá chiꞌ ix smilcham ebꞌ. Ix yicꞌanecꞌ masanil tas ay stojol ebꞌ, ix yacꞌanbꞌat ebꞌ dꞌa vin̈ sreyal Damasco. 24 Jayvan̈n̈ej ebꞌ soldado sirio ix javi yacꞌ oval chiꞌ, axo Jehová ix acꞌanoch jantac ebꞌ soldado yic Judá chiꞌ dꞌa yol scꞌabꞌ ebꞌ, yujto ix actajcan Jehová chiꞌ yuj ebꞌ, aton sDiosal ebꞌ yedꞌ ebꞌ smam yicham. Icha val chiꞌ ix aj yabꞌan syail vin̈aj Joás chiꞌ yuj chucal ix scꞌulej.

25 Ayic ix el ebꞌ sirio dꞌa yol yic Judá chiꞌ, te nivan ix ajcan vin̈aj Joás chiꞌ slajvi yuj ebꞌ. Axo ebꞌ vin̈ ayoch yajalil yedꞌ vin̈, ix snaꞌ ebꞌ vin̈ tas syutej ebꞌ vin̈ svachꞌ milancham vin̈, yic syacꞌanecꞌ spac schamel vin̈ yuninal vin̈aj sacerdote Joiada chiꞌ ebꞌ vin̈. Yuj chiꞌ ix svachꞌ milejcham vin̈ ebꞌ vin̈ dꞌa sat schꞌat. Ix lajvi chiꞌ, ix mucji vin̈ dꞌa schon̈abꞌ vin̈aj David, palta man̈oc bꞌaj smucchaj ebꞌ vin̈ rey. 26 A ebꞌ vin̈ ix vachꞌ milancham vin̈aj Joás chiꞌ, aton vin̈aj Zadad yuneꞌ ix Simat aj Amón yedꞌ vin̈aj Jozabad yuneꞌ ix Simrit aj Moab.

27 A jantacto yabꞌixal vin̈aj Joás chiꞌ yedꞌ ebꞌ yuninal vin̈ yedꞌ lolonel ix yal ebꞌ schecabꞌ Dios dꞌa vin̈ yedꞌ yabꞌixal bꞌaj svachꞌ bꞌoejxi stemplo Jehová vin̈, aycan bꞌaj tzꞌibꞌabꞌilcan yabꞌixal ebꞌ vin̈ rey. Axo vin̈aj Amasías yuninal vin̈ ix ochcan reyal sqꞌuexuloc.