3 Ayic ix tecꞌcꞌaj yopisio vin̈ chiꞌ, a ebꞌ vin̈ ayoch yajalil yedꞌ vin̈, ix smilcham ebꞌ vin̈, aton ebꞌ vin̈ miljinaccham vin̈ smam vin̈. 4 Palta maj miljicham ebꞌ vin̈ yuninal ebꞌ yuj vin̈, yujto tzꞌibꞌyajcan dꞌa ley Moisés, bꞌaj syal Jehová: A ebꞌ mamabꞌil, max yal scham ebꞌ yuj smul yuninal, max yal pax scham ebꞌ uninabꞌil yuj smul smam, yujto junjun mach scham yuj smul, xchicani.

5 Ix schecan vin̈ to smolbꞌej sbꞌa masanil ebꞌ vin̈ aj Judá yedꞌ ebꞌ vin̈ yic Benjamín. Macquiltaquil ix aj ebꞌ vin̈ dꞌa junjun yin̈tilal. Icha chiꞌ ix aj yoch ebꞌ vin̈ yajalil dꞌa junjun mil yedꞌ dꞌa junjun cien anima. Ix yicꞌanchaan̈ sbꞌisul anima vin̈, schael yich dꞌa ebꞌ 20 abꞌil sbꞌeyn̈ejbꞌati. A sbꞌisul ebꞌ ix qꞌue vaan chiꞌ, 300 mil, aton ebꞌ stiempoalxo sbꞌat dꞌa oval, lista yaj ebꞌ yedꞌ slanza yedꞌ smaclabꞌ jul-labꞌ. 6 Ix smajnan 100 mil ebꞌ soldado yic Israel vin̈, 75 quintal qꞌuen plata ix yacꞌ vin̈ stojoloc ebꞌ.

7 Palta ay jun vin̈ schecabꞌ Dios ix cꞌoch dꞌa vin̈, ix yalan vin̈ dꞌa vin̈ icha tic:

—Ach rey, man̈ icꞌoch ebꞌ soldado yic Israel yedꞌ ebꞌ yic Efraín edꞌoc, yujto man̈ ayococh Jehová yedꞌ ebꞌ, 8 vachꞌchom tza naꞌa to yuj ebꞌ ay yip ebꞌ a soldado dꞌa oval, palta a Dios ol ach acꞌan acꞌjoc ganar yuj ebꞌ ajcꞌol chiꞌ, yujto ay spoder scolvaji, ay pax spoder satanel masanil, xchi vin̈ schecabꞌ Dios chiꞌ.

9 Ix scꞌanbꞌan vin̈aj Amasías chiꞌ dꞌa vin̈ schecabꞌ Dios chiꞌ icha tic:

—Palta, ¿tas ol aj pax 75 quintal qꞌuen plata ix vacꞌ dꞌa ebꞌ soldado israel chiꞌ jun? xchi vin̈.

Ix tacꞌvi vin̈ schecabꞌ Dios chiꞌ dꞌa vin̈ icha tic:

—A Jehová syal yacꞌan ecꞌalocxo icha qꞌuen chiꞌ dꞌayach, xchi vin̈.

10 Yuj chiꞌ ix checji pax ebꞌ soldado ix cot dꞌa yol yic Efraín chiꞌ yuj vin̈aj Amasías chiꞌ, palta ix te cot yoval ebꞌ dꞌa ebꞌ yic Judá chiꞌ, yuj chiꞌ te yoval ebꞌ ayic ix pax ebꞌ chiꞌ.

11 Ix stecꞌbꞌan sbꞌa vin̈aj rey Amasías chiꞌ, ix bꞌat vin̈ yedꞌ ebꞌ soldado dꞌa span̈anil yic Atzꞌam Atzꞌam. Ataꞌ ix smilcham 10 mil soldado aj Seir ebꞌ. 12 An̈ejaꞌ ix syam pax 10 mil ebꞌ aj Seir chiꞌ ebꞌ, ix icꞌjibꞌat ebꞌ yuj ebꞌ dꞌa sjolom jun lum vitz sattac qꞌuen yeqꞌui. Ataꞌ ix laj yumjicanbꞌat ebꞌ yuj ebꞌ, chocꞌ ix laj ajcan ebꞌ.

13 Axo ebꞌ soldado yic Israel maj chajocbꞌatlaj yuj vin̈aj Amasías dꞌa oval chiꞌ, aton ebꞌ ix checjican meltzaj dꞌa spat, ix satel jayeꞌ chon̈abꞌ ebꞌ dꞌa yol smacbꞌen Judá, schabꞌat dꞌa Samaria masanto dꞌa Bet-horón. Ix smilancham 3 mil anima ebꞌ, tzijtum tastac ix yelqꞌuejbꞌat ebꞌ.

14 Ayic ix meltzaj vin̈aj Amasías chiꞌ, ayic toxo ix satel ebꞌ aj Edom yuj vin̈, aton ebꞌ aj Seir, ix yicꞌancot juntzan̈ scomon diosal ebꞌ aj Seir chiꞌ vin̈, ix yacꞌanoch vin̈ sdiosaloc. Ix yalan sbꞌa vin̈ dꞌay, ix sn̈usan pax incienso vin̈ dꞌay. 15 Yuj jun chiꞌ ix cot val yoval Jehová dꞌa vin̈, ix scheccot jun vin̈ schecabꞌ yal dꞌa vin̈ rey chiꞌ icha tic:

—¿Tas yuj tzach och ejmelal dꞌa juntzan̈ comon dios maj yal scolanel schon̈abꞌ dꞌa yol a cꞌabꞌ? xchi vin̈ schecabꞌ Dios chiꞌ.

16 Ayic vanto yalan juntzan̈ chiꞌ vin̈ schecabꞌ Dios chiꞌ, ix tacꞌvi vin̈ rey chiꞌ icha tic:

—¿Tom ix val dꞌayach to a ach ol acꞌ in razón a in rey in tic? Actej alan juntzan̈ chiꞌ. ¿Mato tza nibꞌej tzach miljichamoc? xchi vin̈.

Axo vin̈ schecabꞌ Dios chiꞌ man̈xa tas ix yal vin̈, axon̈ej ix yal vin̈ dꞌa vin̈ rey chiꞌ icha tic:

—Vojtac a in tic to nabꞌilxo yuj Dios to ol ach sateloc, yujto ix a cꞌulej jun tic, maj a cꞌanabꞌajej tas ix val dꞌayach, xchi vin̈.

17 A vin̈aj Amasías sreyal Judá chiꞌ, ix scꞌanbꞌej yabꞌ vin̈ dꞌa juntzan̈ ebꞌ acꞌum razón. Yuj chiꞌ ix schecan vin̈ bꞌat alchaj dꞌa vin̈aj Joás yuninal vin̈aj Joacaz, yixchiquin vin̈aj Jehú, sreyal Israel, ix yalan vin̈ icha tic: Cotan̈, cacꞌ oval, xchibꞌat vin̈. 18 Ix spacanpaxcot vin̈aj Joás chiꞌ dꞌa vin̈ icha tic: Ayabꞌ jun teꞌ sac qꞌuiix dꞌa Líbano, ix yalbꞌat teꞌ dꞌa jun teꞌ cꞌuteꞌ ay pax taꞌ icha tic: Acꞌ ix isil yetbꞌeyumoc vin̈ vuninal, xchibꞌat teꞌ. Palta ay jun nocꞌ chium nocꞌ ix ecꞌ taꞌ, axo nocꞌ ix tecꞌanem jun teꞌ qꞌuiix chiꞌ. 19 A ach tic tzalaꞌ to ix acꞌ ganar ebꞌ aj Edom, yuj chiꞌ tzicꞌ val chaan̈ a bꞌa, tza say tas tzꞌaj icꞌjichaan̈. Palta te vachꞌ tato tzach cann̈ej dꞌa a pat. ¿Tas yuj tza nibꞌej tzicꞌcot junoc yaelal dꞌa ibꞌan̈ yedꞌ dꞌa yibꞌan̈ chon̈abꞌ Judá? xchicot vin̈aj Joás chiꞌ dꞌa vin̈.

20 Palta axo vin̈aj Amasías chiꞌ, maj schalaj yabꞌ vin̈, yujto toxo ix sna Dios to ol acꞌjococh vin̈ dꞌa yol scꞌabꞌ vin̈aj Joás chiꞌ yuuj, yujto a dꞌa juntzan̈ sdiosal ebꞌ aj Edom chiꞌ tzꞌoch vin̈ ejmelal. 21 Ix lajvi chiꞌ ix cot vin̈aj Joás chiꞌ yacꞌ oval yedꞌ vin̈aj Amasías chiꞌ, ix schalaj sbꞌa ebꞌ vin̈ dꞌa Bet-semes, dꞌa yol smacbꞌen Judá chiꞌ. 22 Ix acꞌji ganar Judá chiꞌ yuj ebꞌ aj Israel, yuj chiꞌ a ebꞌ soldado aj Judá chiꞌ toxon̈ej ix el lemeljoc ebꞌ, ix paxcan ebꞌ dꞌa spat. 23 Ix yamchaj vin̈aj Amasías sreyal Judá dꞌa Bet-semes chiꞌ yuj vin̈aj Joás vin̈ sreyal Israel chiꞌ. Ix lajvi chiꞌ ix icꞌchajcot vin̈ dꞌa Jerusalén. Ix smacꞌancanem lan̈naj smuroal jun chon̈abꞌ chiꞌ ebꞌ israel chiꞌ. Ay am 180 metrooc ix spojem ebꞌ, ix bꞌatn̈ej dꞌa puerta yic Efraín, masanto ix cꞌoch dꞌa spuertail schiquin jun smuroal chiꞌ. 24 Ix yicꞌanpaxbꞌat qꞌuen oro ebꞌ, qꞌuen plata yedꞌ juntzan̈xo tas ay dꞌa yol stemplo Dios, aton juntzan̈ stan̈vej ebꞌ yin̈tilal vin̈aj Obed-edom. Ix yicꞌpaxbꞌat jantacn̈ej bꞌeyumal ay dꞌa spalacio vin̈ rey chiꞌ ebꞌ. Ix yicꞌanpaxbꞌat juntzan̈ anima ebꞌ icha presoal ayic ix pax ebꞌ dꞌa Samaria. Ix acꞌji pural vin̈aj Amasías chiꞌ yuj vin̈aj Joás yochcan vachꞌcꞌolal yedꞌoc.

25 A vin̈aj Amasías yuninal vin̈aj Joás sreyal Judá chiꞌ, 15 abꞌilto ix yacꞌ reyal vin̈ dꞌa Judá ayic toxo ix cham vin̈aj Joás yuninal vin̈aj Joacaz sreyal Israel. 26 A jantacto yabꞌixal vin̈aj Amasías chiꞌ, ayic ix el yich masanto ix lajvi, aycan bꞌaj tzꞌibꞌabꞌilcan yabꞌixal ebꞌ vin̈ sreyal Judá yedꞌ ebꞌ vin̈ sreyal Israel. 27 Atax val yic ix yicꞌanel sbꞌa vin̈aj Amasías dꞌa Jehová, ay juntzan̈ ebꞌ aj Jerusalén chiꞌ ix naan smilcham vin̈. Yuj chiꞌ ix bꞌatcan vin̈ elelal dꞌa chon̈abꞌ Laquis, palta ix bꞌatn̈ej ebꞌ dꞌa spatic vin̈ dꞌa jun chon̈abꞌ chiꞌ, ataꞌ ix cham vin̈ yuj ebꞌ. 28 Ix lajvi chiꞌ ix yicꞌanbꞌat snivanil vin̈ ebꞌ dꞌa yibꞌan̈ jun nocꞌ chej, axo bꞌaj mucan ebꞌ smam yicham vin̈ ix mucchaji, aton dꞌa schon̈abꞌ vin̈aj David.