Ochnac vin̈aj Amasías reyal dꞌa Judá
14
Ayic schabꞌilxo abꞌil yoch vin̈aj Joás yuninal vin̈aj Joacaz reyal dꞌa Israel, ix schaanel yich vin̈aj Amasías yuninal vin̈aj Joás yacꞌan reyal dꞌa Judá. 2 A vin̈aj Amasías chiꞌ, 25 abꞌil sqꞌuinal vin̈ ayic ix och vin̈ reyal chiꞌ. 29 abꞌil ix yacꞌ reyal chiꞌ vin̈ dꞌa Jerusalén. Joadán sbꞌi ix snun vin̈, aj Jerusalén ix. 3 A tas ix scꞌulej vin̈ vachꞌ dꞌa yichan̈ Jehová, palta maj cꞌochlaj icha scꞌulejnac vin̈aj David, aton smam yicham vin̈. A sbꞌeybꞌal vin̈aj Joás vin̈ smam vin̈ ix sbꞌeybꞌalej. 4 A juntzan̈ lugar chaan̈ bꞌaj tzꞌoch ejmelal, maj yiqꞌuel-laj vin̈, yuj chiꞌ ix yacꞌn̈ej silabꞌ ebꞌ anima taꞌ, ix sn̈usanpax incienso ebꞌ.5 Ayic ix yicꞌan val yip yopisio vin̈aj Amasías chiꞌ, ix smilcham ebꞌ vin̈ ay yopisio vin̈, aton ebꞌ vin̈ miljinac cham vin̈ smam vin̈. 6 Palta maj smilchamlaj ebꞌ yuninal ebꞌ vin̈ ix cham chiꞌ vin̈, yujto tzꞌibꞌabꞌilcan dꞌa ley Moisés, bꞌaj syalcan Jehová icha tic: A ebꞌ mamabꞌil, max yal-laj scham ebꞌ yuj smul yuninal, an̈ejtonaꞌ ebꞌ uninabꞌil, max yalpax scham ebꞌ yuj smul smam, palta junjun mach scham yuj smul, xchi Jehová.
7 Ix smilpaxcham 10 mil ebꞌ edomita vin̈aj Amasías dꞌa oval dꞌa lum Span̈anil Atzꞌam Atzꞌam. Ix yacꞌpax ganar chon̈abꞌ Sela vin̈, ix yacꞌancan scuch vin̈ Jocteel, aton chiꞌ ix sbꞌiejcani.
8 Ix lajvi chiꞌ, ix schecanbꞌat ebꞌ schecabꞌ vin̈ dꞌa vin̈aj Joás sreyal Israel, yuninal vin̈aj Joacaz yixchiquin vin̈aj Jehú. Ix yalanbꞌat vin̈ icha tic: Cotan̈, cacꞌ oval, xchibꞌat vin̈. 9 Palta ix yacꞌanbꞌat spac vin̈aj Joás chiꞌ icha tic: Ay jun teꞌ sac qꞌuiix, ix yalbꞌat teꞌ dꞌa teꞌ cꞌuteꞌ ay dꞌa Líbano: Acꞌ ix isil yetbꞌeyumoc vin̈ vunin, xchi teꞌ. Palta axo nocꞌ chium nocꞌ ix ecꞌ taꞌ, ix stecꞌanem ladꞌan teꞌ sac qꞌuiix chiꞌ nocꞌ. 10 Yel ix acꞌ ganar ebꞌ edomita chiꞌ, yuj chiꞌ tzicꞌvalchaan̈ a bꞌa ticnaic. Vachꞌ toni, icꞌchaan̈ a bꞌa dꞌa a pat. Tato tza nibꞌej acꞌ oval vedꞌoc, a jun chiꞌ ton̈ej ol cot dꞌa ibꞌan̈ yuuj yedꞌ dꞌa yibꞌan̈ Judá, xchibꞌat vin̈.
11 Palta maj schalaj yabꞌ juntzan̈ chiꞌ vin̈aj Amasías chiꞌ. Yuj chiꞌ ix cot vin̈aj Joás chiꞌ yacꞌ oval yedꞌ vin̈, ix schalaj sbꞌa ebꞌ vin̈ dꞌa Bet-semes dꞌa yol yic Judá. 12 Ix acꞌji ganar ebꞌ soldado yic Judá chiꞌ yuj ebꞌ soldado yic Israel, toxon̈ej ix el lemnaj ebꞌ, ix paxcan ebꞌ dꞌa spat. 13 Ix yamchaj vin̈aj Amasías sreyal Judá chiꞌ yuj vin̈aj Joás chiꞌ dꞌa Bet-semes chiꞌ, ix icꞌjiqꞌue vin̈ dꞌa Jerusalén yuj vin̈. Ix sjuanem 180 metro smuroal chon̈abꞌ chiꞌ ebꞌ soldado, ix bꞌat dꞌa puerta yic ebꞌ aj Efraín masanto dꞌa spuertail schiquin. 14 Ix yicꞌanpax masanil qꞌuen oro vin̈aj Joás chiꞌ, qꞌuen plata yedꞌ pax masanil tastac ay dꞌa stemplo Jehová yedꞌ masanil tas ay dꞌa spalacio vin̈aj rey Amasías chiꞌ. Ay pax juntzan̈ anima ix yicꞌbꞌat vin̈ dꞌa Samaria yic tzꞌacꞌji pural vin̈aj Amasías chiꞌ yoch juncꞌolal yedꞌ vin̈.
15 A jantacto yabꞌixal vin̈aj Joás chiꞌ, tastac ix scꞌulej vin̈ yedꞌ tas ix aj yacꞌan oval vin̈ yedꞌ vin̈aj Amasías sreyal Judá, tzꞌibꞌabꞌilcan bꞌaj aycan yabꞌixal ebꞌ vin̈ sreyal Israel. 16 Ayic ix cham vin̈aj Joás chiꞌ, ix mucji vin̈ dꞌa Samaria bꞌaj mucan juntzan̈xo ebꞌ vin̈ sreyal Israel. Axo vin̈aj Jeroboam ix ochcan reyal sqꞌuexuloc vin̈.
17 A vin̈aj Amasías yuninal vin̈aj Joás sreyal Judá chiꞌ, 15 abꞌilto ix can vin̈ ayic ix cham vin̈aj Joás yuninal vin̈aj Joacaz sreyal Israel. 18 A jantacto yabꞌixal vin̈aj Amasías chiꞌ, tzꞌibꞌabꞌilcan bꞌaj aycan yabꞌixal ebꞌ vin̈ sreyal Judá. 19 Ay juntzan̈ ebꞌ vin̈ ay dꞌa Jerusalén ix och ajcꞌolal dꞌa vin̈aj Amasías chiꞌ, yuj chiꞌ ix bꞌat vin̈ elelal dꞌa Laquis. Palta ix ochn̈ej ebꞌ vin̈ dꞌa spatic vin̈, yuj chiꞌ ataꞌ ix cham vin̈ yuj ebꞌ vin̈. 20 Ix yicꞌanbꞌat vin̈ ebꞌ vin̈ dꞌa yibꞌan̈ chej, ix mucji vin̈ dꞌa Jerusalén bꞌaj mucan ebꞌ smam yicham vin̈ dꞌa schon̈abꞌcan vin̈aj David. 21 Yuj chiꞌ masanil ebꞌ aj Judá ix acꞌanoch vin̈aj Azarías reyal sqꞌuexuloc vin̈ smam chiꞌ. 16 abꞌil sqꞌuinal vin̈ ayic ix och vin̈ reyal chiꞌ. 22 Ayic ayxo och vin̈ reyal sqꞌuexuloc vin̈ smam chiꞌ, ix yicꞌanxiecꞌ chon̈abꞌ Elat vin̈, ix sbꞌoanxiqꞌue vin̈.
Ochnac vin̈aj schabꞌil Jeroboam sreyaloc Israel
23 Ayic 15 abꞌilxo yoch vin̈aj Amasías yuninal vin̈aj Joás reyal dꞌa Judá, ix schaanel yich vin̈aj Jeroboam yuninal vin̈aj Joás yacꞌan reyal dꞌa Israel, 41 abꞌil ix yacꞌ reyal vin̈ dꞌa Samaria. 24 Palta te chuc tas ix scꞌulej vin̈ dꞌa yichan̈ Jehová. A juntzan̈ chucal scꞌulejnac vin̈aj Jeroboam yuninal vin̈aj Nabat, vin̈ cuchbꞌannacbꞌat ebꞌ yetisraelal dꞌa chucal, a chiꞌ ix sbꞌeybꞌalej vin̈.
25 A vin̈aj Jeroboam chiꞌ ix icꞌanxiecꞌ bꞌaj tzꞌecꞌtaxon smojonal smacbꞌen Israel, sbꞌatn̈ej bꞌaj tzꞌochcꞌoch bꞌe dꞌa Hamat masanto dꞌa aꞌ mar yic Arabá, icha aj yalannaccan Jehová sDiosal Israel dꞌa vin̈aj Jonás schecabꞌ, aton vin̈ yuninal vin̈aj Amitai aj Gat-hefer. 26 Yujto ix yil Jehová to te ya tzꞌecꞌ ebꞌ israel smasanil, malaj val junoc mach scolvaj yedꞌ ebꞌ. 27 Yuj chiꞌ a vin̈aj Jeroboam yuninal vin̈aj Joás ix yacꞌlabꞌej Jehová scolan ebꞌ, yujto malaj dꞌa spensar Jehová satanel schon̈abꞌ dꞌa juneln̈ej.
28 A jantacto yabꞌixal vin̈aj Jeroboam chiꞌ, tastac ix scꞌulej vin̈ yedꞌ jantac oval ix yacꞌ vin̈ ayic ix yicꞌanxiecꞌ juntzan̈ chon̈abꞌ vin̈ dꞌa Judá, aton Damasco yedꞌ Hamat, masanil juntzan̈ chiꞌ, tzꞌibꞌabꞌilcan bꞌaj aycan yabꞌixal ebꞌ vin̈ sreyal Israel. 29 Ayic ix cham vin̈aj Jeroboam chiꞌ, ix mucji vin̈ bꞌaj mucan ebꞌ vin̈ sreyal Israel, axo vin̈aj Zacarías yuninal vin̈ ix ochcan reyal sqꞌuexuloc.