3 A tas ix scꞌulej vin̈aj Azarías chiꞌ vachꞌ dꞌa yichan̈ Jehová, icha scꞌulejnac vin̈aj Amasías smam vin̈. 4 Palta a juntzan̈ lugar chaan̈ bꞌaj tzꞌoch ejmelal, maj yiqꞌuel-laj vin̈, ix yacꞌn̈ej silabꞌ ebꞌ anima, ix sn̈usanpax incienso ebꞌ taꞌ. 5 Ix yacꞌoch jun yabꞌil scuch lepra Jehová dꞌa vin̈ rey chiꞌ masanto ix cham vin̈. Yuj chiꞌ, majxo ajlaj vin̈ rey chiꞌ dꞌa spalacio, chꞌoc patil bꞌaj ix ajecꞌ vin̈. Axo vin̈aj Jotam, vin̈ yuninal vin̈, aꞌ vin̈ ix och yilumaloc spalacio vin̈ chiꞌ, ix yacꞌanpax yajalil vin̈ dꞌa Judá chiꞌ.

6 A jantacto yabꞌixal vin̈aj Azarías yedꞌ tastac ix scꞌulej vin̈, tzꞌibꞌabꞌilcan bꞌaj aycan yabꞌixal ebꞌ vin̈ sreyal Judá. 7 Ayic ix cham vin̈, ix mucji vin̈ dꞌa schon̈abꞌcan vin̈aj rey David dꞌa slacꞌanil bꞌaj mucan ebꞌ smam yicham, axo vin̈aj Jotam vin̈ yuninal vin̈ ix ochcan reyal sqꞌuexuloc.

8 Ayic 38 abꞌilxo yoch vin̈aj Azarías reyal dꞌa Judá, ix och vin̈aj Zacarías yuninal vin̈aj Jeroboam reyal dꞌa Israel, vaqueꞌ ujal ix yacꞌ reyal vin̈ dꞌa Samaria. 9 Te chuc tas ix scꞌulej vin̈ dꞌa yichan̈ Jehová, icha ix scꞌulej ebꞌ smam yicham vin̈. A juntzan̈ chucal scꞌulejnac vin̈aj Jeroboam yuninal vin̈aj Nabat, vin̈ cuchbꞌannacbꞌat ebꞌ yetisraelal dꞌa chucal, a chiꞌ ix sbꞌeybꞌalej vin̈.

10 Axo vin̈aj Salum yuninal vin̈aj Jabes ix och ajcꞌolal dꞌa vin̈, ix bꞌat jucnaj vin̈ dꞌa vin̈aj Zacarías chiꞌ, ix smilancham vin̈ vin̈ dꞌa yichan̈ ebꞌ chon̈abꞌ. Axo vin̈ ix ochcan reyal sqꞌuexuloc vin̈.

11 A jantacto yabꞌixal vin̈aj Zacarías chiꞌ, tzꞌibꞌabꞌilcan bꞌaj aycan yabꞌixal ebꞌ vin̈ sreyal Israel. 12 Icha chiꞌ ix aj yelcꞌoch tas yalnaccan Jehová dꞌa vin̈aj Jehú, ayic yalannac to a ebꞌ yin̈tilal vin̈, ol ochn̈ej ebꞌ reyal dꞌa Israel masanto dꞌa schan̈il macan̈ yin̈tilal chiꞌ.

13 A vin̈aj Salum chiꞌ, ix schael yich vin̈ yacꞌan reyal ayic 39 abꞌilxo yoch vin̈aj Azarías reyal dꞌa Judá, palta junn̈ej ujal ix yacꞌ reyal vin̈ dꞌa Samaria. 14-16 Axo vin̈aj Manahem yuninal vin̈aj Gadi ix cot yedꞌ ebꞌ vin̈ soldado dꞌa Tirsa, ix yacꞌan oval ebꞌ vin̈ dꞌa chon̈abꞌ Tifsa. Ix smilancham masanil ebꞌ anima ebꞌ vin̈ taꞌ yedꞌ masanil anima ay dꞌa yol smacbꞌen Tifsa chiꞌ. Ix tecjielta yol scꞌol ebꞌ ix yabꞌix yuj ebꞌ vin̈. Masanil tas ay taꞌ, ix yicꞌbꞌat ebꞌ vin̈. Icha chiꞌ ix scꞌulej ebꞌ vin̈ yujto maj chajioch ebꞌ vin̈ yuj ebꞌ aj chon̈abꞌ chiꞌ dꞌa yol schon̈abꞌ chiꞌ. Ix lajvi chiꞌ, ix cꞌoch vin̈aj Manahem chiꞌ dꞌa Samaria yacꞌ oval yedꞌ vin̈aj Salum chiꞌ. Ayic ix lajvi smilancham vin̈aj Salum chiꞌ vin̈, axo vin̈ ix ochcan reyal sqꞌuexuloc vin̈.

A jantacto yabꞌixal vin̈aj Salum chiꞌ yedꞌ tas ix aj yoch vin̈ ajcꞌolal dꞌa vin̈aj Zacarías, tzꞌibꞌabꞌilcan bꞌaj aycan yabꞌixal ebꞌ vin̈ sreyal Israel.

17 Ayic 39 abꞌilxo yoch vin̈aj Azarías reyal dꞌa Judá, ix schaanel yich vin̈aj Manahem yuninal vin̈aj Gadi yacꞌan reyal dꞌa Israel. 10 abꞌil ix yacꞌ reyal vin̈ dꞌa Samaria. 18 Te chuc tas ix scꞌulej vin̈ dꞌa yichan̈ Jehová, yujto a chucal scꞌulejnac vin̈aj Jeroboam yuninal vin̈aj Nabat, vin̈ cuchbꞌannac bꞌat ebꞌ yetisraelal dꞌa chucal, a chiꞌ ix sbꞌeybꞌalej vin̈.

A dꞌa stiempoal ayoch vin̈aj Manahem reyal chiꞌ, 19 ix javi vin̈aj Pul sreyal Asiria yacꞌ oval dꞌa Israel chiꞌ. Yuj chiꞌ 750 quintal qꞌuen plata ix yacꞌ vin̈ dꞌa vin̈aj Pul chiꞌ yic tzꞌoch vin̈ yedꞌ vin̈ yic vachꞌ scann̈ej vin̈ dꞌa yopisio. 20 Ix yacꞌoch 50 siclo qꞌuen plata vin̈aj Manahem chiꞌ dꞌa yibꞌan̈ junjun ebꞌ bꞌeyum dꞌa yol smacbꞌen Israel chiꞌ, yic syal stupan qꞌuen tumin syacꞌ vin̈ dꞌa vin̈ sreyal Asiria chiꞌ. Icha chiꞌ ix aj smeltzaj vin̈ sreyal Asiria chiꞌ dꞌa schon̈abꞌ, majxo ochlaj vaan vin̈ dꞌa yol yic Israel chiꞌ.

21 A jantacto yabꞌixal vin̈aj Manahem yedꞌ tastac ix scꞌulej, tzꞌibꞌabꞌilcan bꞌaj aycan yabꞌixal ebꞌ vin̈ sreyal Israel. 22 Ix lajvi chiꞌ ix cham vin̈, axo vin̈aj Pekaía vin̈ yuninal vin̈ ix ochcan reyal sqꞌuexuloc.

23 Ayic 50 abꞌilxo yoch vin̈aj Azarías reyal dꞌa Judá, ix och vin̈aj Pekaía yuninal vin̈aj Manahem reyal dꞌa Israel. Chabꞌ abꞌil ix yacꞌ reyal vin̈ dꞌa Samaria. 24 Te chuc tas ix scꞌulej vin̈ dꞌa yichan̈ Jehová. A juntzan̈ chucal scꞌulejnac vin̈aj Jeroboam yuninal vin̈aj Nabat, vin̈ cuchbꞌannacbꞌat ebꞌ yetisraelal dꞌa chucal, a chiꞌ ix sbꞌeybꞌalej vin̈.

25 Palta a vin̈aj Peka yuninal vin̈aj Remalías yajal ebꞌ vin̈ soldado vin̈aj Pekaía chiꞌ, ix och vin̈ ajcꞌolal dꞌa vin̈aj Pekaía chiꞌ, ix yacꞌanoch sbꞌa 50 ebꞌ vinac aj Galaad yedꞌ vin̈. Ix miljicham vin̈aj Pekaía chiꞌ yuj ebꞌ vin̈ dꞌa scuartel dꞌa yol spalacio dꞌa Samaria yedꞌ vin̈aj Argob yedꞌ vin̈aj Arie. Axo vin̈aj Peka chiꞌ ix ochcan reyal sqꞌuexuloc vin̈.

26 A jantacto yabꞌixal vin̈aj Pekaía chiꞌ yedꞌ tastac ix scꞌulej, tzꞌibꞌabꞌilcan bꞌaj aycan yabꞌixal ebꞌ vin̈ sreyal Israel.

27 Ayic 52 abꞌilxo yoch vin̈aj Azarías reyal dꞌa Judá, ix och vin̈aj Peka yuninal vin̈aj Remalías reyal dꞌa Israel. 20 abꞌil ix yacꞌ reyal vin̈ dꞌa Samaria. 28 Te chuc tas ix scꞌulej vin̈ dꞌa yichan̈ Jehová. A juntzan̈ chucal scꞌulejnac vin̈aj Jeroboam yuninal vin̈aj Nabat, vin̈ cuchbꞌannacbꞌat ebꞌ yetisraelal dꞌa chucal, a chiꞌ ix sbꞌeybꞌalej vin̈.

29 A dꞌa stiempoal ayoch vin̈aj Peka reyal dꞌa Israel chiꞌ, ataꞌ ix javi vin̈aj Tiglat-pileser sreyal Asiria, ix acꞌji ganar juntzan̈ chon̈abꞌ tic yuj vin̈: Aton Ijón, Abel-bet-maaca, Janoa, Cedes, Hazor, Galaad, Galilea yedꞌ masanil yol yic Neftalí. Masanil ebꞌ cajan dꞌa juntzan̈ chon̈abꞌ chiꞌ, ix icꞌjibꞌat ebꞌ icha preso dꞌa Asiria chiꞌ. 30 Ayic 20 abꞌilxo yoch vin̈aj Jotam yuninal vin̈aj Azarías reyal dꞌa Judá, a vin̈aj Oseas yuninal vin̈aj Ela ix och ajcꞌolal dꞌa vin̈aj Peka yuninal vin̈aj Remalías chiꞌ, ix smilancham vin̈aj Peka chiꞌ vin̈, axo vin̈ ix ochcan reyal sqꞌuexuloc vin̈.

31 A jantacto yabꞌixal vin̈aj Peka yedꞌ tastac ix scꞌulej vin̈, tzꞌibꞌabꞌilcan bꞌaj aycan yabꞌixal ebꞌ vin̈ sreyal Israel.

32 Ayic schabꞌil abꞌil yoch vin̈aj Peka yuninal vin̈aj Remalías reyal dꞌa Israel, ix och vin̈aj Jotam yuninal vin̈aj Azarías reyal dꞌa Judá. 33 A vin̈aj Jotam chiꞌ, 25 abꞌil sqꞌuinal vin̈ ayic ix och vin̈ reyal chiꞌ, 16 abꞌil ix yacꞌ reyal vin̈ dꞌa Jerusalén. Jerusa sbꞌi ix snun vin̈, yisil ix vin̈aj Sadoc.

34 Masanil tas ix scꞌulej vin̈aj Jotam chiꞌ, te vachꞌ dꞌa yichan̈ Jehová, icha val sbꞌeybꞌal vin̈aj Azarías smam vin̈. 35 Ix sbꞌoꞌoch spuertail stemplo Jehová vin̈ dꞌa yibꞌan̈, palta a juntzan̈ lugar chaan̈ bꞌaj tzꞌoch ejmelal, maj yiqꞌuel-laj vin̈, ix yacꞌn̈ej silabꞌ ebꞌ anima yedꞌ sn̈usan incienso ebꞌ taꞌ.

36 A jantacto yabꞌixal vin̈aj Jotam yedꞌ tastac ix scꞌulej vin̈, tzꞌibꞌabꞌilcan bꞌaj aycan yabꞌixal ebꞌ vin̈ sreyal Judá.

37 A dꞌa jun tiempoal chiꞌ ix och ijan Jehová yacꞌancot vin̈aj Rezín sreyal Siria yedꞌ vin̈aj Peka yuninal vin̈aj Remalías yacꞌ oval yedꞌ Judá chiꞌ. 38 Ayic ix cham vin̈aj Jotam chiꞌ, ix mucji vin̈ dꞌa schon̈abꞌ vin̈aj rey David, vin̈ smam yicham vin̈. Ix lajvi chiꞌ axo vin̈aj Acaz yuninal vin̈ ix ochcan reyal sqꞌuexuloc.