2 A tas ix scꞌulej vin̈aj Jotam chiꞌ, vachꞌ dꞌa yichan̈ Jehová icha ix scꞌulej vin̈aj Uzías smam vin̈. Palta maj ochlaj vin̈ dꞌa yol stemplo Jehová icha ix yutej sbꞌa vin̈ smam vin̈ chiꞌ. Axo masanil anima, te chuc tas ix sbꞌeybꞌalej ebꞌ. 3 A vin̈aj Jotam chiꞌ ix checan bꞌojoc jun spuertail templo dꞌa yibꞌan̈. Tzijtum tas ix schec vin̈ bꞌojoc dꞌa yibꞌan̈ smuroal chon̈abꞌ bꞌaj mucbꞌil jun chꞌolan. 4 Ix schecan vin̈ bꞌochajxiqꞌue juntzan̈ nivac chon̈abꞌ dꞌa tzalquixtac dꞌa yol yic Judá yedꞌ yedꞌtal ebꞌ vin̈ soldado chaan̈ yajqꞌue bꞌaj stan̈vej ebꞌ vin̈ dꞌa caltac teꞌ. 5 Ix yacꞌ oval vin̈ yedꞌ ebꞌ amonita, ix acꞌji ganar ebꞌ yuj vin̈. A dꞌa jun abꞌil chiꞌ, ix yacꞌ qꞌuen tumin ebꞌ ix acꞌjioch dꞌa yibꞌan̈ yacꞌan dꞌa vin̈. Ix yacꞌ 75 quintal qꞌuen plata ebꞌ yedꞌ 37 mil quintal ixim trigo. An̈ejaꞌ icha pax chiꞌ ixim cebada ix yacꞌ ebꞌ. Icha chiꞌ ix scꞌulej ebꞌ dꞌa oxeꞌ abꞌil.

6 Te tecꞌan ix aj vin̈ dꞌa sreyal chiꞌ, yujto te vachꞌ sbꞌeybꞌal vin̈ dꞌa yichan̈ Jehová. 7 A jantacto yabꞌixal vin̈aj rey Jotam chiꞌ yedꞌ tastac scꞌulejnac vin̈ yedꞌ jantac oval yacꞌnac vin̈, aycan bꞌaj tzꞌibꞌabꞌilcan yabꞌixal ebꞌ vin̈ sreyal Israel yedꞌ Judá.

8 Ayic ix och vin̈ dꞌa reyal, 25 abꞌil sqꞌuinal vin̈. 16 abꞌil ix yacꞌ reyal vin̈ dꞌa Jerusalén. 9 Axo yic ix cham vin̈, ix mucji vin̈ yedꞌ ebꞌ smam yicham dꞌa schon̈abꞌ vin̈aj David. Ix lajvi chiꞌ, axo vin̈aj Acaz yuninal vin̈ ix ochcan reyal sqꞌuexuloc.