4 Masanil tas ix scꞌulej vin̈aj Uzías chiꞌ, vachꞌn̈ej dꞌa yichan̈ Jehová, icha scꞌulejnac vin̈aj Amasías smam vin̈. 5 Ix yacꞌ val och spensar vin̈ dꞌa Dios yacbꞌan pitzanto vin̈aj Zacarías. A vin̈aj Zacarías chiꞌ ix cꞌaybꞌan vin̈ dꞌa tas syutej scꞌanabꞌajan Jehová. Yacbꞌan ix scꞌanabꞌajej vin̈, vachꞌn̈ej ix ajelcꞌoch vin̈ yuj Jehová.

6 A vin̈aj Uzías chiꞌ, ix bꞌat vin̈ yedꞌ ebꞌ vin̈ soldado yacꞌ oval yedꞌ ebꞌ filisteo, ix smacꞌanem lan̈naj smuroal chon̈abꞌ Gat ebꞌ vin̈, Jabnia yedꞌ Asdod. Ix sbꞌoanqꞌue juntzan̈ chon̈abꞌ ebꞌ dꞌa yol yic Asdod chiꞌ yedꞌ juntzan̈xo chon̈abꞌ yic ebꞌ filisteo chiꞌ. 7 Ix och val Dios yedꞌ vin̈ ayic ix yacꞌan oval vin̈ yedꞌ ebꞌ filisteo chiꞌ yedꞌ ebꞌ árabe cajan dꞌa Gur-baal yedꞌ ebꞌ amonita. 8 Ix yacꞌan qꞌuen tumin ebꞌ amonita dꞌa vin̈, aton qꞌuen ix acꞌjioch dꞌa yibꞌan̈ ebꞌ yacꞌani. Ix yacꞌn̈ej yajalil vin̈ masanto dꞌa smojonal Egipto, yujto ix yicꞌ val yip yopisio vin̈ chiꞌ.

9 Ix sbꞌoxiqꞌue juntzan̈ bꞌaj tzꞌaj ebꞌ soldado vin̈ dꞌa yibꞌan̈ smuroal Jerusalén chiꞌ yedꞌ dꞌa yibꞌan̈ spuertail dꞌa schiquin yedꞌ dꞌa yibꞌan̈ puerta dꞌa chꞌolan yedꞌ dꞌa juntzan̈xo schiquintac. Te vachꞌ ix aj sbꞌoanxiqꞌue vin̈. 10 Ix sbꞌoanpax juntzan̈ yedꞌtal ebꞌ vin̈ soldado vin̈ dꞌa tzꞌinan luum yedꞌ pax bꞌaj tzꞌaj ebꞌ soldado chiꞌ dꞌa chaan̈. Ix schecanpax vin̈ joychaj jantac a ucꞌbꞌilaꞌ, yujto te nivan nocꞌ smolbꞌetzal nocꞌ vin̈ dꞌa acꞌlictac yedꞌ dꞌa yichtac vitz. Ay pax ebꞌ smunlajvum vin̈ smunlaj dꞌa avoj uva yedꞌ dꞌa juntzan̈xo avbꞌen ay dꞌa tzalquixtac yedꞌ dꞌa lum acꞌlictac. Te ay val och dꞌa scꞌol vin̈ smunlaj dꞌa tas tzꞌavchaji.

11 Ay pax jun nivan n̈ilan̈ ebꞌ soldado vin̈, ayic sbꞌat ebꞌ dꞌa oval, pojquiltac yaj ebꞌ, icha tas macan̈il yajecꞌ sbꞌi ebꞌ dꞌa yol scꞌabꞌ vin̈aj Jeiel vin̈ tzꞌibꞌum yedꞌ vin̈aj Maasías yajal. A vin̈aj Hananías sat yajal yaj dꞌa ebꞌ, ayoch yopisio vin̈ yedꞌ vin̈aj rey Uzías chiꞌ. 12 Axo masanil ebꞌ yajal yaj dꞌa junjun macan̈ ebꞌ vin̈ soldado chiꞌ icha tas yin̈tilal ebꞌ, ay 2 mil 600 ebꞌ. 13 Axo ebꞌ soldado ayoch dꞌa yalan̈ smandar ebꞌ, ay 307 mil 500 ebꞌ, listaxo yaj ebꞌ sbꞌat dꞌa oval, te tecꞌan ebꞌ scolvaj dꞌa vin̈ rey chiꞌ yic syacꞌan oval vin̈ yedꞌ ebꞌ ajcꞌool. 14 Ix schecan vin̈aj rey Uzías chiꞌ bꞌojoc juntzan̈ syamcꞌabꞌ ebꞌ soldado chiꞌ: Aton maclabꞌ jul-labꞌ, qꞌuen lanza, qꞌuen xumpil, maclabꞌ n̈icꞌool, yol jul-labꞌ yedꞌ mejmeech. 15 Ix sayan juntzan̈ ebꞌ vin̈ vinac vin̈ te jelan yic sbꞌoan juntzan̈ qꞌuen nivac máquina yic oval. Ix bꞌochaj qꞌueen bꞌajtac ayqꞌue ebꞌ soldado dꞌa chaan̈ dꞌa yibꞌan̈tac muro. A juntzan̈ qꞌuen máquina chiꞌ, a qꞌueen sjulanbꞌat qꞌuen nivac qꞌueen. Ix te pucaxbꞌat yabꞌixal vin̈ dꞌa najat. Ix och val Dios yedꞌ vin̈, yuj chiꞌ te ay smay ix aj sbꞌinaj vin̈.

16 Palta ayic ix tecꞌcꞌaj val yopisio vin̈ chiꞌ, ix yicꞌanchaan̈ sbꞌa vin̈. Yuj chiꞌ ix yicꞌcot vin̈ dꞌa yibꞌan̈. Ix spitej sbꞌa vin̈ dꞌa Jehová Dios, aton sDiosal ebꞌ smam yicham vin̈. Ix och vin̈ dꞌa yol stemplo Jehová, ix sn̈usan incienso vin̈ dꞌa altar. 17 Tzacꞌan yoch vin̈aj sacerdote Azarías yuj vin̈ yedꞌ pax 80 ebꞌ vin̈ sacerdote yic Jehová. Man̈ jabꞌoc ix xiv ebꞌ vin̈ yochi. 18 Axo yic ix cꞌoch ebꞌ vin̈ dꞌa vin̈ rey chiꞌ, ix yalan ebꞌ vin̈ icha tic dꞌa vin̈: Mamin rey Uzías, a ach tic man̈ opisiooc a n̈usan incienso dꞌa Jehová, palta a on̈ sacerdote on̈ yin̈tilal on̈ vin̈aj Aarón tic, a on̈ sicꞌbꞌilon̈canoch dꞌa jun opisio tic. Yuj chiꞌ mamin rey, vachꞌ tzach el dꞌa jun lugar tic, yujto toxo ix och a chucal dꞌa Jehová, yuj chiꞌ man̈xo ol ach icꞌjocchaan̈ yuuj, xchi ebꞌ vin̈ dꞌa vin̈.

19 A vin̈aj rey Uzías chiꞌ, ayic lin̈an och vin̈ dꞌa stzꞌey jun altar yic incienso dꞌa yol templo chiꞌ yedꞌnac jun chaynubꞌ yic incienso vin̈. Ix cot val yoval vin̈ dꞌa ebꞌ vin̈ sacerdote chiꞌ, axo val dꞌa jun rato chiꞌ ix elta yabꞌil lepra dꞌa snan̈al sat vin̈. 20 Ayic ix yilan vin̈aj sat sacerdote Azarías yedꞌ ebꞌ vin̈ ajun yedꞌ vin̈ chiꞌ to toxo ix elta yabꞌil lepra dꞌa snan̈al sat vin̈ rey chiꞌ, ix yicꞌanelta vin̈ ebꞌ vin̈ dꞌa elan̈chamel. Ix snibꞌej pax vin̈ rey chiꞌ tzꞌelta dꞌa elan̈chamel, yujto toxo ix javi yaelal dꞌa yibꞌan̈ vin̈ yuj Jehová.

21 Ix cann̈ej jun lepra chiꞌ dꞌa vin̈aj rey Uzías chiꞌ masanto ix cham vin̈, yuj chiꞌ schꞌocoj vin̈ ix aj dꞌa jun pat, majxo chajocochlaj vin̈ dꞌa yol stemplo Jehová. Axo vin̈aj Jotam yuninal vin̈ ix ochcan sqꞌuexuloc, yic scan vin̈ dꞌa spalacio yic syacꞌanpax yajalil vin̈ dꞌa jun chon̈abꞌ chiꞌ.

22 A jantacto yabꞌixal vin̈aj rey Uzías chiꞌ, ayic ix el yich masanto ix lajvi, tzꞌibꞌabꞌilcan yuj vin̈aj Isaías schecabꞌ Dios, vin̈ yuninal vin̈aj Amoz. 23 Ayic ix cham vin̈ Uzías chiꞌ, ix mucji vin̈ dꞌa smacbꞌen bꞌaj smucchaj ebꞌ vin̈ rey. Yujto ay lepra dꞌa vin̈, yuj chiꞌ maj yal smucchaj vin̈ dꞌa yedꞌtal ebꞌ vin̈ rey chiꞌ. Ix lajvi chiꞌ axo vin̈aj Jotam yuninal vin̈ ix ochcan reyal sqꞌuexuloc.