Ochnac vin̈aj Acaz reyal dꞌa Judá
28
Ayic ix och vin̈aj Acaz chiꞌ reyal, 20 abꞌil sqꞌuinal vin̈. 16 abꞌil ix yacꞌ reyal vin̈ dꞌa Jerusalén, palta man̈ vachꞌoc tas ix scꞌulej vin̈ dꞌa yichan̈ Jehová, maj scꞌulej vin̈ icha tas scꞌulejnac vin̈aj David smam yicham vin̈. 2 A sbꞌeybꞌal ebꞌ vin̈ sreyal Israel ix sbꞌeybꞌalej vin̈. Ix schecan vin̈ bꞌochaj qꞌuen qꞌueen yechel comon dios Baal. 3 Ix sn̈usan incienso vin̈ dꞌa schꞌolanil yic Ben-hinom, ix sn̈usanpaxtzꞌa yuninal vin̈ silabꞌil icha val schuc bꞌeybꞌal juntzan̈ chon̈abꞌ ix icꞌjiel yuj Jehová dꞌa yichan̈ ebꞌ israel dꞌa lum chiꞌ. 4 An̈ejtonaꞌ, ix sn̈us pax silabꞌ vin̈ yedꞌ incienso dꞌa juntzan̈ lugar bꞌajtac chaan̈ yedꞌ dꞌa yichtac te teꞌ cꞌayum xiil.5-6 Yuj chiꞌ ix acꞌjioch vin̈ yuj Jehová sDiosal dꞌa yol scꞌabꞌ vin̈ sreyal Siria. Te nivan anima ix icꞌjibꞌat dꞌa Damasco yuj ebꞌ sirio chiꞌ. An̈ejaꞌ ix acꞌjipaxoch vin̈ yuj Jehová dꞌa yol scꞌabꞌ vin̈aj Peka yuninal vin̈aj Remalías sreyal Israel. A dꞌa jun cꞌu, 120 mil ebꞌ soldado te tecꞌan yic Judá ix smilcham ebꞌ, yujto ix yactejcan Jehová sDiosal ebꞌ, aton sDiosal smam yicham ebꞌ. 7 Ay jun vin̈ soldado te tecꞌan dꞌa yin̈tilal Efraín scuchan Zicri, a vin̈ ix milancham vin̈aj Maasías yuninal vin̈ rey chiꞌ yedꞌ vin̈aj Azricam yajal dꞌa spalacio vin̈ rey chiꞌ yedꞌ vin̈aj Elcana sat yajal yuj vin̈ rey chiꞌ. 8 Vachꞌchom yetchon̈abꞌ sbꞌa ebꞌ yedꞌ ebꞌ israel chiꞌ, palta ix icꞌjibꞌat 200 mil ebꞌ yuj ebꞌ, aton ebꞌ ix ix, ebꞌ vinac unin yedꞌ ebꞌ ix unin, ix icꞌjibꞌat ebꞌ dꞌa Samaria. Man̈xo jantacoc pax tas ix yicꞌbꞌat ebꞌ israel chiꞌ.
9 A dꞌa Samaria chiꞌ, ay jun vin̈ schecabꞌ Dios scuchan Obed. Ix elta vin̈ scha ebꞌ soldado van scꞌochxi dꞌa Samaria chiꞌ. Ix yalan vin̈ dꞌa ebꞌ icha tic:
—A Jehová co Diosal, sDiosal pax ebꞌ co mam quicham, ix cot yoval scꞌol dꞌa Judá, yuj chiꞌ ix yacꞌoch ebꞌ dꞌa yol e cꞌabꞌ. Palta a exxo tic ix e milcham ebꞌ yedꞌ val yoval e cꞌool to ix qꞌue val cꞌoch dꞌa satchaan̈. 10 Axo ticnaic, tze naꞌa to tzeyacꞌoch ebꞌ aj Judá tic yedꞌ ebꞌ aj Jerusalén tic eyacꞌumaloc servil. Palta ¿tom malaj pax e mul a ex tic dꞌa yichan̈ Jehová? 11 A ticnaic, abꞌec tas ol valaꞌ: Aqꞌuec meltzaj masanil ebꞌ quetisraelal ix eyicꞌcot chiꞌ dꞌa tic, yujto ay val cot yoval Jehová dꞌayex, xchi vin̈aj Obed chiꞌ.
12 Ix lajvi chiꞌ ay jayvan̈ ebꞌ vin̈ yajal yaj dꞌa scal ebꞌ yin̈tilal Efraín, aton vin̈aj Azarías yuninal vin̈aj Johanán, vin̈aj Berequías yuninal vin̈aj Mesilemot, vin̈aj Ezequías yuninal vin̈aj Salum yedꞌ vin̈aj Amasa yuninal vin̈aj Hadlai, ix och ebꞌ vin̈ dꞌa sat ebꞌ vin̈ van sjax dꞌa oval chiꞌ. 13 Ix yalan ebꞌ vin̈ icha tic:
—Man̈ eyicꞌcot ebꞌ chiꞌ dꞌa tic, yujto a jun tic tzꞌoch co muloc dꞌa Jehová. ¿Tom tze say tas tzꞌaj svachꞌ och co mul dꞌay? Te nivanxo co mul tzꞌochi, yuj chiꞌ scot val yoval Jehová chiꞌ dꞌayon̈, xchi ebꞌ vin̈.
14 Yuj chiꞌ, ix actajel masanil ebꞌ ix icꞌjicot yuj ebꞌ soldado chiꞌ yedꞌ pax masanil tastac ix yicꞌcot ebꞌ, ix yacꞌancan ebꞌ dꞌa yichan̈ ebꞌ yajalil chon̈abꞌ yedꞌ dꞌa yichan̈ masanil anima. 15 Axo ebꞌ vin̈ ix bꞌinaj sbꞌi tic, a ebꞌ vin̈ ix tan̈van ebꞌ ix icꞌjicot chiꞌ. A dꞌa scal masanil tastac ix yiqꞌuecꞌ ebꞌ soldado chiꞌ, ataꞌ ix qꞌueta pichul ix acꞌjioch dꞌa ebꞌ bꞌeraneli. Ix acꞌjioch xan̈abꞌ ebꞌ, ix acꞌji va ebꞌ, ix yucꞌan pax aꞌ ebꞌ. Ix acꞌjioch aceite dꞌa ebꞌ echen yaji. Axo ebꞌ maxtzac yal-laj sbꞌeyi, ix acꞌjiqꞌue ebꞌ dꞌa yibꞌan̈ nocꞌ bꞌuru yuj ebꞌ. Ix cot ebꞌ vin̈ yajal chon̈abꞌ Samaria chiꞌ yacꞌxican ebꞌ dꞌa ebꞌ yetchon̈abꞌ dꞌa Jericó, aton bꞌaj te ay teꞌ palma. Ix lajvi chiꞌ ix meltzajxi ebꞌ vin̈ dꞌa Samaria chiꞌ.
16 A dꞌa jun tiempoal chiꞌ, ix schecbꞌat ebꞌ schecabꞌ vin̈aj rey Acaz dꞌa vin̈ sreyal Asiria, yic scꞌanan colval vin̈ dꞌa vin̈. 17 Yujto a ebꞌ aj Edom ix javi ebꞌ junelxo yacꞌ oval dꞌa ebꞌ aj Judá, ay ebꞌ anima ix yicꞌbꞌat ebꞌ. 18 Yacbꞌan chiꞌ axo ebꞌ filisteo, ix icꞌanpaxbꞌat tastac ay dꞌa juntzan̈ chon̈abꞌ dꞌa yichtac vitz yedꞌ dꞌa Neguev dꞌa yol yic Judá chiꞌ. Ix yicꞌanecꞌ chon̈abꞌ Bet-semes ebꞌ, Ajalón, Gederot, Soco, Timna yedꞌ Gimzo yedꞌ yaldeail junjun juntzan̈ chon̈abꞌ chiꞌ. Ix lajvi chiꞌ axo ebꞌ filisteo chiꞌ ix cajnaj taꞌ. 19 Emnaquil ix ajcan ebꞌ aj Judá chiꞌ yuj Jehová, yujto a vin̈aj Acaz sreyal ebꞌ, a vin̈ ix cuchbꞌanbꞌat ebꞌ dꞌa chucal, ix spitej val sbꞌa vin̈ dꞌa Jehová.
20 Ayic ix javi vin̈aj Tiglat-pileser sreyal Asiria chiꞌ dꞌa Judá, maj colvajlaj vin̈, palta to ix vachꞌ lajviel yuj vin̈. 21 Vachꞌchom ixto smolbꞌejelta juntzan̈ tastac caro stojol ay dꞌa stemplo Jehová vin̈aj Acaz chiꞌ yedꞌ tastac ay dꞌa spalacio vin̈ yedꞌ tastac ay dꞌa spat ebꞌ vin̈ yajal yaji, ix yacꞌan vin̈ dꞌa vin̈ sreyal Asiria chiꞌ, palta nabꞌan̈ej, majxo colvaj jabꞌoc vin̈ yedꞌ vin̈. 22 Vachꞌchom nivan yaelal ix javi dꞌa yibꞌan̈ vin̈aj Acaz chiꞌ, palta an̈ejaꞌ ix ochn̈ej smul vin̈ dꞌa Jehová. 23 Ix yacꞌan silabꞌ vin̈ dꞌa juntzan̈ scomon diosal ebꞌ aj Damasco. Yujto toxo ix acꞌji ganar vin̈ yuj ebꞌ, ix yalan vin̈ icha tic: A juntzan̈ sdiosal ebꞌ sirio tic scolvaji, yuj chiꞌ ol vacꞌ in silabꞌ dꞌay yic vachꞌ ol colvaj vedꞌoc, xchi vin̈. Icha chiꞌ ix aj scot val dꞌa yibꞌan̈ vin̈ yedꞌ ebꞌ yetchon̈abꞌ chiꞌ. 24 Ix lajvi chiꞌ, ix smolbꞌan juntzan̈ yamcꞌabꞌ yic stemplo Dios vin̈, ix smacꞌanpoj vin̈. Ix smacancan templo chiꞌ vin̈, ix schecan vin̈ bꞌojocqꞌue juntzan̈ altar dꞌa schiquintac scalleal Jerusalén chiꞌ. 25 Ix schecanpax vin̈ bꞌojocqꞌue juntzan̈ altar bꞌajtac chaan̈ dꞌa yoltac chon̈abꞌ dꞌa yol yic Judá chiꞌ. Ataꞌ sn̈us incienso vin̈ dꞌa comon dios. Icha chiꞌ ix yutej vin̈ stzuntzancot yoval scꞌol Jehová sDiosal smam yicham.
26 A jantacto tas ix scꞌulej vin̈, ayic ix el yich masanto ix lajvi, aycan bꞌaj tzꞌibꞌabꞌilcan yabꞌixal ebꞌ sreyal Judá yedꞌ Israel. 27 Axo yic ix cham vin̈, ix mucji vin̈ dꞌa chon̈abꞌ Jerusalén, palta man̈oc dꞌa yedꞌtal ebꞌ vin̈ rey ix mucji vin̈. Axo vin̈aj Ezequías yuninal vin̈ ix ochcan reyal sqꞌuexuloc.