Ochnac vin̈aj Acaz reyal dꞌa Judá
16
Ayic 17 abꞌilxo yoch vin̈aj Peka yuninal vin̈aj Remalías reyal dꞌa Israel, ix schaanel yich vin̈aj Acaz yuninal vin̈aj Jotam yacꞌan reyal dꞌa Judá. 2 Ayxo 20 abꞌil sqꞌuinal vin̈ ayic ix och vin̈ reyal chiꞌ. 16 abꞌil ix yacꞌ reyal vin̈ dꞌa Jerusalén. Te chuc tas ix scꞌulej vin̈ dꞌa yichan̈ Jehová, maj sbꞌeybꞌalej sbꞌeybꞌal vin̈aj David smam yicham vin̈. 3 An̈ej sbꞌeybꞌal juntzan̈ ebꞌ vin̈ sreyal Israel ix sbꞌeybꞌalej vin̈. Ix sn̈ustzꞌa yuninal vin̈ silabꞌil. Lajan val ix scꞌulej vin̈ icha val sbꞌeybꞌal juntzan̈ nación icꞌbꞌilel yuj Jehová ayic yochnac ebꞌ israel dꞌa luum tic. 4 An̈ejtonaꞌ ix yacꞌ silabꞌ vin̈, ix sn̈usanpax incienso vin̈ dꞌa juntzan̈ lugar chaan̈ bꞌaj tzꞌoch ejmelal dꞌa jolomtac vitz yedꞌ dꞌa yichtac te teꞌ cꞌayum xiil.5 A dꞌa jun tiempoal chiꞌ, a vin̈aj Rezín sreyal Siria yedꞌ vin̈aj Peka yuninal vin̈aj Remalías sreyal Israel, ix cꞌoch ebꞌ vin̈ dꞌa Jerusalén yic syacꞌan oval ebꞌ vin̈ yedꞌ vin̈aj rey Acaz chiꞌ. Ix oymaj ebꞌ vin̈ dꞌa spatictac Jerusalén chiꞌ, palta maj yacꞌlaj ganar ebꞌ vin̈. 6 An̈ejaꞌ dꞌa jun tiempoal chiꞌ, a vin̈ sreyal Edom ix acꞌan ganar chon̈abꞌ Elat, ix ochcan yicoc Edom chiꞌ. A ebꞌ aj Judá cajan taꞌ, ix pechjiel ebꞌ yuj vin̈, axo ebꞌ aj Edom chiꞌ ix cann̈ej cajan taꞌ.
7 Ix lajvi chiꞌ, ix schecanbꞌat jayvan̈ ebꞌ schecabꞌ vin̈aj Acaz dꞌa vin̈aj Tiglat-pileser sreyal Asiria, yic sbꞌat alchaj dꞌa vin̈ icha tic: Svacꞌoch in bꞌa dꞌa yol a cꞌabꞌ. Yuj chiꞌ cotan̈ yuj tzul in a colan dꞌa yol scꞌabꞌ vin̈ sreyal Siria yedꞌ vin̈ sreyal Israel, yujto van yacꞌan oval ebꞌ vin̈ vedꞌoc, xchi bꞌat vin̈.
8 Yuj chiꞌ, a vin̈aj Acaz chiꞌ, ix yiqꞌuelta qꞌuen plata vin̈ yedꞌ qꞌuen oro dꞌa stemplo Jehová yedꞌ qꞌuen ay dꞌa spalacio vin̈, ix sianbꞌat qꞌueen vin̈ dꞌa vin̈ sreyal Asiria chiꞌ. 9 Ix scꞌanabꞌajej vin̈ sreyal Asiria chiꞌ tas ix yal vin̈aj Acaz chiꞌ, yuj chiꞌ ix cot vin̈ yedꞌ ebꞌ soldado yacꞌ oval dꞌa Damasco. Ix yacꞌan ganar jun chon̈abꞌ chiꞌ vin̈. A ebꞌ cajan taꞌ, ix icꞌjibꞌat ebꞌ yuj vin̈ dꞌa Kir. Ix smilanpaxcham vin̈aj Rezín chiꞌ vin̈.
10 Ix lajvi chiꞌ ix bꞌat vin̈aj rey Acaz dꞌa Damasco scha vin̈aj Tiglat-pileser chiꞌ. Ataꞌ ix yil jun altar vin̈, ix stzꞌibꞌanbꞌat yechel jun altar chiꞌ vin̈ dꞌa vin̈aj sacerdote Urías dꞌa Jerusalén. 11 Icha chiꞌ ix aj sbꞌoanqꞌue jun altar vin̈aj sacerdote Urías chiꞌ, lajan ix aj icha yechel ix yacꞌcot vin̈aj rey Acaz dꞌa Damasco chiꞌ. Vachꞌxo yaji ayic ix jax vin̈aj Acaz chiꞌ dꞌa Jerusalén.
12 Ayic ix jax vin̈ dꞌa Jerusalén chiꞌ, ix yilan jun altar chiꞌ vin̈, ix snitzanoch sbꞌa vin̈ dꞌa stzꞌey yic sn̈usantzꞌa silabꞌ vin̈ dꞌa yibꞌan̈. 13 Ix yacꞌan nocꞌ silabꞌ vin̈ stzꞌa smasanil yedꞌ ofrenda yedꞌ tas svaji. Ix secanpaxem vino vin̈ dꞌa yibꞌan̈ altar chiꞌ dꞌa ofrendail. Ix stzicanpaxoch schiqꞌuil nocꞌ silabꞌ yic juncꞌolal vin̈ dꞌa spatictac altar chiꞌ.
14 Axo pax altar bronce ay dꞌa yichan̈ stemplo Jehová, ix yiqꞌuel vin̈ dꞌa scal jun acꞌ altar chiꞌ yedꞌ stemplo Jehová chiꞌ, ix yacꞌan can vin̈ dꞌa stojolal snorteal jun acꞌ altar chiꞌ. 15 Ix lajvi chiꞌ, ix yalan vin̈ dꞌa vin̈aj sacerdote Urías chiꞌ icha tic: A ticnaic a masanil nocꞌ silabꞌ tzꞌacꞌji dꞌa qꞌuin̈ibꞌalil yedꞌ dꞌa yemcꞌualil yedꞌ ofrenda dꞌa tas svaji yedꞌ vino, an̈ej dꞌa yibꞌan̈ jun acꞌ altar tic tzꞌacꞌji. An̈ejaꞌ juntzan̈xo silabꞌ syacꞌ ebꞌ chon̈abꞌ yedꞌ vic a in tic, a dꞌa yibꞌan̈ jun altar chiꞌ stzꞌai. Stzicchajpaxoch schiqꞌuil nocꞌ silabꞌ chiꞌ dꞌa spatictac. Palta axo jun altar bronce chiꞌ, vic tzꞌajcani yic ataꞌ tzin cꞌanbꞌej in bꞌa dꞌa Jehová.
16 Ix scꞌanabꞌajej vin̈aj Urías chiꞌ icha val ix aj yalan vin̈ rey chiꞌ. 17 Ix schecan vin̈ rey chiꞌ icꞌchajel yol sat smarcoal juntzan̈ carreta nabꞌa bronce dꞌa templo. Ix icꞌchajpaxel palangana ayem dꞌa yibꞌan̈. Ix yicꞌanpaxel qꞌuen yechel mam vacax nabꞌa bronce ayoch dꞌa yalan̈ jun nivan pila, axo dꞌa yibꞌan̈ qꞌuen qꞌueen dꞌa sat luum ix yacꞌcanem vin̈. 18 Yic vachꞌ scan vin̈ dꞌa sat vin̈ sreyal Asiria chiꞌ, yuj chiꞌ ix yiqꞌuel jun yedꞌtal bꞌaj scan ebꞌ rey dꞌa scꞌual icꞌoj ip vin̈ dꞌa stemplo Jehová yedꞌ spuertail ay dꞌa spatiqueli, aton bꞌaj tzꞌoch vin̈ rey dꞌa templo chiꞌ.