Ochnac vin̈aj Ezequías reyal
29
Ayic ix schaanel yich vin̈aj Ezequías yacꞌan reyal, 25 abꞌil sqꞌuinal vin̈. 29 abꞌil ix yacꞌ reyal vin̈ dꞌa Jerusalén. Abías sbꞌi ix snun vin̈, yisil ix vin̈aj Zacarías. 2 A tas ix scꞌulej vin̈, vachꞌn̈ej dꞌa yichan̈ Jehová, icha val sbꞌeybꞌal vin̈aj David smam yicham vin̈.Ix ochxi ejmelal dꞌa templo yuj vin̈aj Ezequías
3 A dꞌa bꞌabꞌel uj yic bꞌabꞌel abꞌil yoch vin̈aj Ezequías reyal, ix schecan vin̈ jacchajxi stemplo Jehová, ix schecan vin̈ vachꞌ bꞌochajxi spuertail. 4 Ix schecan vin̈ avtajcot ebꞌ vin̈ sacerdote yedꞌ ebꞌ vin̈ levita, ix molbꞌaj ebꞌ vin̈ dꞌa yamaqꞌuil templo chiꞌ dꞌa stojolal bꞌaj sjavi cꞌu. 5 Ix yalan vin̈ icha tic: Ex levita, abꞌec tas ol valaꞌ: Sacbꞌitejec e bꞌa, tze sacbꞌitan pax stemplo Jehová, aton co Diosal yedꞌ ebꞌ co mam quicham. Iqꞌuequelta masanil tas man̈ vachꞌoc ayoch dꞌa yool. 6 Yujto a ebꞌ co mam quicham, te pit yutejnac sbꞌa ebꞌ dꞌa Jehová co Diosal, te chuc tas cꞌulejnac ebꞌ dꞌa yichan̈. Actabꞌilcan yuj ebꞌ, yicꞌnaquel spensar ebꞌ dꞌa scajnubꞌ. 7 Smacannaccan spuertail ebꞌ, spuꞌannac tup scꞌacꞌal candil ebꞌ, maxtzac sn̈us incienso ebꞌ, maxtzac yacꞌ silabꞌ ebꞌ to sn̈usjitzꞌa masanil dꞌa stemplo co Diosal a on̈ israel on̈ tic. 8 Yuj chiꞌ, ix cot val yoval scꞌol Jehová dꞌa Judá yedꞌ dꞌa Jerusalén tic, cuseltac ix on̈ ajcan yuuj, te qꞌuixvelal pax ix on̈ ajcani, ix on̈ ochpaxcan sbꞌuchlabꞌejoc juntzan̈ chon̈abꞌ, icha val tzꞌaj eyilan ticnaic. 9 Yuj chiꞌ, ay ebꞌ co mam quicham chamnac dꞌa oval. Man̈ jantacoc ebꞌ ix quetbꞌeyum yedꞌ ebꞌ calcuninal icꞌchajnacbꞌat dꞌa chꞌoc chon̈abꞌil. 10 A ticnaic ix in naꞌa to ol in bꞌo jun trato yedꞌ Jehová co Diosal a on̈ israel on̈ tic, yic vachꞌ syiqꞌuel yoval scꞌol dꞌa quibꞌan̈. 11 Yuj chiꞌ, ex vetchon̈abꞌ, man̈ eyiqꞌuecꞌ tiempo e bꞌoan stemplo Jehová, yujto aꞌ ex sicꞌaneli, yic tzeyacꞌan servil, tze n̈usanpaxtzꞌa incienso dꞌa yichan̈, xchi vin̈.
12 Aton sbꞌi ebꞌ levita ix och dꞌa munlajel tic: A dꞌa scal ebꞌ yin̈tilal vin̈aj Coat: Vin̈aj Mahat yuninal vin̈aj Amasai yedꞌ vin̈aj Joel yuninal vin̈aj Azarías. Axo dꞌa scal ebꞌ yin̈tilal vin̈aj Merari: Vin̈aj Cis yuninal vin̈aj Abdi yedꞌ vin̈aj Azarías yuninal vin̈aj Jehalelel. Axo dꞌa scal ebꞌ yin̈tilal vin̈aj Gersón: Vin̈aj Joa yuninal vin̈aj Zima yedꞌ vin̈aj Edén yuninal vin̈aj Joa. 13 Axo dꞌa scal ebꞌ yin̈tilal vin̈aj Elizafán: Vin̈aj Simri yedꞌ vin̈aj Jeiel. A dꞌa scal ebꞌ yin̈tilal vin̈aj Asaf: Vin̈aj Zacarías yedꞌ vin̈aj Matanías. 14 Axo dꞌa scal yin̈tilal vin̈aj Hemán: A vin̈aj Jehiel yedꞌ vin̈aj Simei. Axo dꞌa scal ebꞌ yin̈tilal vin̈aj Jedutún: A vin̈aj Semaías yedꞌ vin̈aj Uziel. 15 Bꞌabꞌel, ix smolbꞌej ebꞌ scꞌabꞌ yoc ebꞌ vin̈, ix sacbꞌitan sbꞌa ebꞌ vin̈ smasanil icha yalan ley. Ix lajvi chiꞌ ix och ebꞌ vin̈ dꞌa yol templo chiꞌ, ix sacbꞌitanpax templo chiꞌ ebꞌ vin̈ icha yalan ley, icha ix yutej vin̈ rey yalani, icha syal schecnabꞌil Jehová.
16 Ix lajvi chiꞌ, ix och ebꞌ vin̈ sacerdote chiꞌ dꞌa yol templo yic sacbꞌitan ebꞌ vin̈. Masanil tas man̈ vachꞌoc ix ilchaj yuj ebꞌ vin̈, ix laj yiqꞌuelta ebꞌ vin̈, ix yicꞌanel ebꞌ vin̈ dꞌa yamaqꞌuil templo chiꞌ. Axo juntzan̈ ebꞌ vin̈ levita ix bꞌat julancanbꞌat dꞌa schꞌolanil stitac aꞌ Cedrón. 17 A dꞌa bꞌabꞌel cꞌu yic bꞌabꞌel uj chiꞌ ix syamoch ebꞌ vin̈ sacbꞌitan juntzan̈ yamaqꞌuil templo chiꞌ. Axo dꞌa svajxaquil cꞌual ix elcꞌoch ebꞌ vin̈ sacbꞌitan dꞌa stiꞌ templo chiꞌ. Vajxaqueto cꞌual ix yacꞌ pax ebꞌ vin̈ sacbꞌitan yol templo chiꞌ, yuj chiꞌ 16 cꞌual ix yacꞌ ebꞌ vin̈ sacbꞌitani, ix lajvielcꞌoch smasanil. 18 Ix lajvi chiꞌ, ix cꞌoch ebꞌ vin̈ dꞌa spalacio vin̈aj rey Ezequías chiꞌ, ix yalan ebꞌ vin̈ icha tic: Toxo ix co sacbꞌitej stemplo Jehová yedꞌ altar bꞌaj stzꞌa silabꞌ, smexail ixim pan tzꞌem dꞌa yichan̈ Jehová yedꞌ syamcꞌabꞌil junjun. 19 An̈ejtonaꞌ ix co sacbꞌitej juntzan̈ yamcꞌabꞌ elnaccan dꞌa yopisio yuj vin̈aj rey Acaz, ayic yochnac spitalil vin̈. Axo ticnaic, toxo ix co bꞌoxicanoch dꞌa yedꞌtal dꞌa yichan̈ yaltar Jehová, xchi ebꞌ vin̈.
20 Axo dꞌa junxo cꞌu, ix pet qꞌue van vin̈aj rey Ezequías chiꞌ, ix smolbꞌan masanil ebꞌ yajal chon̈abꞌ chiꞌ vin̈, ix bꞌat ebꞌ dꞌa stemplo Jehová. 21 Ix yicꞌanbꞌat ucvan̈ nocꞌ quelem vacax ebꞌ, ucvan̈ nocꞌ chꞌac calnel yedꞌ ucvan̈ nocꞌ quelemtac calnel yedꞌ ucvan̈ nocꞌ quelemtac chiva. A juntzan̈ nocꞌ chiꞌ ix yacꞌ nocꞌ ebꞌ silabꞌil yic tzꞌacꞌjican lajvoc smul ebꞌ yajal yaj dꞌa chon̈abꞌ chiꞌ yedꞌ masanil ebꞌ aj Judá chiꞌ, yic sacbꞌican pax stemplo Jehová chiꞌ. Ix yalan vin̈ rey chiꞌ dꞌa ebꞌ vin̈ sacerdote yin̈tilal vin̈aj Aarón to sn̈ustzꞌa silabꞌ chiꞌ ebꞌ dꞌa yibꞌan̈ altar yic Jehová. 22 Ix smilancham nocꞌ vacax chiꞌ ebꞌ vin̈ sacerdote chiꞌ, ix schaan schiqꞌuil nocꞌ ebꞌ vin̈, ix stzicanem ebꞌ vin̈ dꞌa yibꞌan̈ altar chiꞌ. An̈ejaꞌ icha chiꞌ ix yutejpax nocꞌ chꞌac calnel chiꞌ ebꞌ vin̈ yedꞌ pax nocꞌ quelemtac calnel chiꞌ.
23 Ix yicꞌanbꞌat nocꞌ chiva chiꞌ ebꞌ vin̈ dꞌa yichan̈ vin̈ rey yedꞌ dꞌa yichan̈ ebꞌ anima smasanil. Ix yacꞌanqꞌue scꞌabꞌ ebꞌ dꞌa sjolom nocꞌ yic tzꞌacꞌjican lajvoc smul ebꞌ. 24 Ix lajvi chiꞌ, ix smilancham nocꞌ ebꞌ vin̈ sacerdote chiꞌ, ix secanem schiqꞌuil nocꞌ ebꞌ vin̈ dꞌa yibꞌan̈ altar. A jun chiꞌ ofrenda yuj yacꞌji tup smul ebꞌ israel chiꞌ, icha ix aj yalan vin̈ rey chiꞌ.
25 Ix acꞌjipaxoch ebꞌ vin̈ levita yuj vin̈aj rey Ezequías chiꞌ dꞌa stemplo Jehová yedꞌ syamcꞌabꞌ ebꞌ vin̈ yic bꞌit: Aton qꞌuen platillo, salterio, cítara, icha yajcan stzolal yuj vin̈aj rey David yedꞌ vin̈aj Gad, aton vin̈ acꞌum razón dꞌa vin̈aj rey David chiꞌ, icha pax yaj yalancan vin̈aj Natán schecabꞌ Dios. A juntzan̈ checnabꞌil chiꞌ albꞌilcan yuj Jehová yuj ebꞌ schecabꞌ.
26 Lin̈anoch ebꞌ vin̈ levita yedꞌ yamcꞌabꞌ yic bꞌit acꞌbꞌilcan yuj vin̈aj rey David. Lin̈anpaxoch ebꞌ vin̈ sacerdote spuꞌan strompeta. 27 Yuj chiꞌ, ix yalan vin̈aj rey Ezequías chiꞌ to sn̈usjitzꞌa silabꞌ dꞌa yibꞌan̈ altar chiꞌ. Axo yic ix el yich sn̈usantzꞌa nocꞌ silabꞌ chiꞌ ebꞌ vin̈, ix el pax yich sbꞌitan ebꞌ vin̈ sbꞌitan chiꞌ, yic syicꞌanchaan̈ Jehová ebꞌ vin̈, ix spuꞌan strompeta ebꞌ vin̈. Ix cꞌanjipax juntzan̈ yamcꞌabꞌ yic bꞌit acꞌbꞌilcan yuj vin̈aj rey David chiꞌ. 28 Axo masanil anima, n̈ojanem ebꞌ ejmelal yacbꞌan van sbꞌitan ebꞌ vin̈ sbꞌitan chiꞌ, van spuꞌan pax strompeta ebꞌ vin̈ sacerdote. Masanto yic ix lajvi stzꞌabꞌat silabꞌ chiꞌ ix och vaan ebꞌ vin̈ sbꞌitani. 29 Ayic ix lajvi yacꞌji silabꞌ chiꞌ, ix em n̈ojan vin̈ rey yedꞌ masanil ebꞌ ajun yedꞌ chiꞌ ejmelal. 30 Ix yalan vin̈ yedꞌ ebꞌ vin̈ yajal chon̈abꞌ chiꞌ dꞌa ebꞌ vin̈ levita to syal vachꞌ lolonel ebꞌ vin̈ dꞌa Jehová yedꞌ juntzan̈ bꞌit sbꞌonaccan vin̈aj rey David yedꞌ pax juntzan̈ yic vin̈aj Asaf schecabꞌ Dios. Ix scꞌanabꞌajan ebꞌ vin̈ yedꞌ val stzalajcꞌolal, ix empax n̈ojan ebꞌ vin̈ ejmelal.
31 Ix lajvi chiꞌ, ix yalan vin̈ rey chiꞌ dꞌa ebꞌ anima: Yacbꞌan toxo ix e sacbꞌitej e bꞌa dꞌa yichan̈ Jehová icha yalan ley, cotan̈ec, iqꞌueccot e silabꞌ yedꞌ eyofrenda yuj eyacꞌan yuj diosal dꞌa stemplo Jehová, xchi vin̈. Yuj chiꞌ masanil ebꞌ anima chiꞌ, ix yicꞌcot silabꞌ ebꞌ yedꞌ yofrenda yuj yacꞌan yuj diosal ebꞌ. Axo ebꞌ ix el val dꞌa scꞌol yacꞌani, ix yacꞌ silabꞌ ebꞌ sn̈usjitzꞌa smasanil. 32 Masanil nocꞌ nocꞌ ix yicꞌcot ebꞌ anima chiꞌ silabꞌil sn̈usjitzꞌa smasanil chiꞌ, 70 nocꞌ mam vacax, 100 nocꞌ chꞌac calnel yedꞌ 200 nocꞌ quelemtac calnel. Ix n̈usjitzꞌa nocꞌ silabꞌil dꞌa Jehová. 33 A sbꞌisul masanil nocꞌ ix yacꞌ ebꞌ silabꞌil chiꞌ, 600 nocꞌ mam vacax yedꞌ 3 mil nocꞌ calnel yedꞌ nocꞌ chiva.
34 Yujto quenn̈ej sbꞌisul ebꞌ vin̈ sacerdote, maj tzacꞌvanlaj ebꞌ vin̈ spatzꞌanel masanil nocꞌ silabꞌ sn̈usjitzꞌa smasanil chiꞌ, yuj chiꞌ ix colvaj ebꞌ vin̈ yetlevitail ebꞌ vin̈, yacbꞌan sacbꞌitej pax sbꞌa juntzan̈xo ebꞌ vin̈ sacerdote, yujto a ebꞌ vin̈ levita elan̈chamel ix yacꞌoch ebꞌ vin̈ dꞌa scꞌol sacbꞌitan sbꞌa dꞌa yichan̈ juntzan̈ ebꞌ vin̈ sacerdote chiꞌ. 35 Ayto nan̈alxo nocꞌ silabꞌ chiꞌ ix acꞌchaji yedꞌ pax xepual nocꞌ silabꞌ yic juncꞌolal yedꞌ vino ix acꞌchaj ofrendail yedꞌ pax nocꞌ silabꞌ sn̈usjitzꞌa smasanil.